KOLOSE 3 - KABAR MAEH MA HANYU JANJI WAU

¹ Naun haut nasamelum kamulek mirabaya Kristus. Daya yiru harus naun ngakali nampan kaiyuh kawan hal sa hang surga, hang unengan Kristus marentah baya anri Alatalla.

² Hadap kunuan pikiran naun ma kawan hal sa hang yiru, ada ma kawan hal sa hang dunia.

³ Daya naun haut matei, nelang pamelum naun padina baya Kristus hawuang Alatalla.

⁴ Nah, putut pamelum naun sa sajati hanyeyiru Kristus nelang amun hanye lalea hanrian naun pada sagar lalea sinrah anri hanye hawuang pihante muliani.

Pamelum sa uhang anri pamelum sa wau

⁵ Daya yiru, tampare kawan kabahirien dunia sa ngajahujak diri naun, hanyeyiru dapa bela, kawan hal sa puang sanunuh, kabahirien, kabahirien sa jahat, nelang kasarakahen (kasarakahen hanyeyiru sarupa anri nyambah barhala).

⁶ Kawan hal masam yiru sa ngulah karikangen Alatalla nadap kawan ulun sa puang ngalut nuu ma hanye.

⁷ Dahulu hie naun raerai pada nampalus ngalut kawan kabahirien yiru, hang tawuk naun nakuasa dayani.

⁸ Kude itati ware naun ngumpe kawan hal sa jahat teka diri naun: ada lagi sangit, atawa iraraat atawa uweng kaingkam muar nadap ulun lain. Ada budas kaluar teka wawa naun kawan lengan sapa sumpah atawa lengan sa murun.

⁹ Ada ipusu isa ma sa lain, daya pamelum sa uhang anri kawan pidasaranni haut naumpe daya naun.

¹⁰ Naun itati haut naami pamelum sa wau. Naun hanyeyiru murunsia wau, sa saratang nasamau daya sa ngulah hanye, hanyeyiru Alatalla, manyu kala wangunni raerai. Tujuanni hanyeyiru nampan naun kataru Alatalla anri paruna.

¹¹ Daya gana teka yiru balalu kawan pibalainni ulun Yahudi anri ulun puang Yahudi uras wawai, ulun basunat anri ulun sa puang basunat, puang uweng lagi pibalainni ulun asing anri ulun biadab, walah anri ulun bebas, daya Kristus hanyeyiru ala katantuluhni nelang hanye mira baya anri here katuluhni!

¹² Naun hanyeyiru ulun wat Alatalla. Alatalla sinta naun nelang midi naun neu jari milikni sa hulung. Yiru sababni naun harus nantarang ahi lelo, naun harus maeh atei, randah atei, lamah liut, nelang tahan ngaret kahanangen.

¹³ Naun harus sabar isa anri sa lain, nelang ipangampun amun naan sa ngatei anri sa lain. Tuhan anri sanang atei ngampun naun, jari naun pada harus hamen ngampun isa anri sa lain.

¹⁴ Nelang sa mambatang, hanyeyiru: Naun harus ipasinta daya sinta yiru namaya kawan pulaksanai katuluhni hampe jari paruna.

¹⁵ Ware kawan kaputusan naun natantu daya kadamaian sa naami daya Kristus hawuang atei naun. Daya Alatalla nerau naun nampan jari anggota isa tenga, nampan naun welum hawuang kadamaian teka Kristus yiru. Wuah naun batarima kasih.

¹⁶ Ware kawan ajaran Kristus sa penu berkat marasap mawuang atei naun. Ware naun ipangajar nelang ipangami nasihat anri kaharatien. Ware naun manyanyi mazmur anri tawat hormat nelang kawan lagu rohani; nyanyi ma Alatalla anri pangingkaman tarima kasih hawuang atei naun.

¹⁷ Inun ala sa naulah atawa napantane naun, harus yiru naulah nelang napantane hawuang ngaran Tuhan Yesus. Batarima kasih ma Alatalla Ambah neu inun sa naulah Yesus ma naun.

Kawan hubungan pribadi hawuang pamelum sa wau

¹⁸ Kawan pulaksanai sa jari matueh wawei! Ware naun ngalut nuu ma matueh upu naun, daya kalayiru pipatutui pidasaran naun yalah ulun Kristen.

¹⁹ Kawan pulaksanai sa jari matueh upu! Ware sinta ma matueh wawei naun. Ada kasar nadap here.

²⁰ Kawan anak! Samula kawajiban naun yalah ulun Kristen nampan saratang ngalut nuu ma ineh ambah, daya yiru sa ngampi sanang atei Alatalla.

²¹ Kawan pulaksanai sa jari ambah! Ada ngampi hanang atei kawan anak naun hampe here putus asa.

²² Kawan pulaksanai sa jari walah! Hawuang katuluh hal, wuah naun ngalut nuu ma tuannu sa hang dunia yiti. Ada ngalut nuu ma here ekat hang tawuk here rahat nyaga naun, daya naun hamen natawat. Kude ngalut nuu ma here anri atei sa rela, daya naun mahormat Tuhan.

²³ Inun masam pagawian sa naami ma naun, ware naun ngulahni anri sagalis atei, yalah jaka Tuhan sa nalayanni naun, nelang puang ekat murunsia.

²⁴ Itung naun sagar narime upa teka Tuhan. Inun sa nasadia Tuhan ma ulun watni, yiru sa sagar naami ma naun. Daya ampu sa sabujurni rahat nalayanni daya naun hanyeyiru Kristus raerai.

²⁵ Nelang hie-hie sa ngulah hala, sagar nanggung kawan kahalaenni yiru; daya Tuhan puang ninung wangun ulun.