KOLOSE 1 - KABAR MAEH MA HANYU JANJI WAU

^1-2 Kawan pulaksanai ulun wat Alatalla hang Kolose sa satia mira baya anri Kristus! Yalah rasul Kristus Yesus, – sa naangkat Alatalla – aku, hi Paulus, baya anri pulaksanai takam hi Timotius, harap mudahan Alatalla Ambah takam ngami berkat nelang kasanangen ma naun.

Doa tarima kasih

^3-4 Kami haut karengei naun parisaya ma Yesus Kristus nelang naun sinta katuluh ulun wat Alatalla. Yiru sababni hang tawuk kami badoa ma naun, kami saratang ngantuh tarima kasih ma Alatalla, Ambah Tuhan takam Yesus Kristus.

⁵ Naun parisaya nelang naun sinta, daya naun harap neu inun sa nasadia hang surga daya Alatalla ma naun. Naun haut karengei neu hal yiru, tawuk Kabar Maeh sa tuu natahampe ma naun.

⁶ Kabar teka Alatalla yiru nawara ma litar dunia, nelang pamelum ulun saratang naberkat daya kabar yiru, sameh kala pamelum naun naberkat teka tawuk naun karengei neu lelo ahi Alatalla nelang naun tuu-tuu haut kaingkam.

⁷ Hal yiru natahampe ma Pulaksanai daya Epafras, hengau kami sa nasinta. Hanye hanyeyiru palayan Kristus sa satia bagawi neu ma kaparluan takam.

⁸ Teka hanye kami karengei sa anri kuasa teka Roh Alatalla naun tau ipasinta.

⁹ Yiru sababni kami saratang badoa ma naun dami kami karengei neu naun. Kami laku ma Alatalla nampan Roh Alatalla ngami ma naun kaharatien nelang kapintaren hampe naun karasa anri paruna inun kabahumen Alatalla.

¹⁰ Anri kalayiru naun kaiyuh welum ngalut kabahumen Alatalla, nelang saratang ngampi sanang ateini, hampe hawuang ala katantuluh naun tau mua kawan hal sa maeh. Nelang pangarasaen naun neu Alatalla sika sagar batambah pada.

¹¹ Mudahan makai kuasa teka Alatalla sa hante, naun natangkansing hampe naun sanggup ngaret kahanangen hawuang ala katantuluh anri sabar nelang sanang atei

¹² nelang anri ngantuh tarima kasih ma Ambah. Daya Ambah yiru sa ngulah naun patut narime inun sa nasadia Alatalla ma ulun watni hawuang karajaanni sa maraai.

¹³ Hanye haut nyanepah takam teka kuasa piieng nelang ngidar takam mawuang karajaan Anakni sa nasintani.

¹⁴ Daya Anakni yiru takam nabebas; baarati takam haut kaiyuh pangampunan dosa.

Kristus anri pagawianni

¹⁵ Kristus hanyeyiru gambar sa tena tuu teka diri Alatalla sa puang dinung; Kristus hanyeyiru anak taraulu, labis mambatang teka ala katantuluh sa haut naulah.

¹⁶ Daya itetei hanye Alatalla ngulah ala katantuluh hang surga nelang hang ambau tane, ala katantuluh sa dinung nelang sa puang dinung, tamasuk pada kawan roh sa bakuasa nelang sa marentah. Katantuluh dunia yiti naulah itetei Kristus nelang ma Kristus.

¹⁷ Kapihuan ala katantuluh naan, Kristus haut labis dahulu naan. Nelang daya hanye pada ala katantuluh naan hang paunenganni maisasaan.

¹⁸ Hanye ulu teka tengani, hanyeyiru ungkup, daya hanye putut pamelum ungkup yiru. Hanye anak taraulu, sa samambatang nasamelum kamulek teka pampatei, nampan hanye raerai sa jari mambatang teka ala katantuluh.

¹⁹ Alatalla raerai sa ngabahumen nampan ala katantuluh sa naan hang diri Alatalla, naan pada anri sukup ganap hang diri Anakni.

²⁰ Nelang itetei Anak yiru pada Alatalla nukas nampan ngulah ala katantuluh ikaeh kamulek anri hanye – hau ala katantuluh sa hang ambau tane, hau sa hang surga. Alatalla ngulah yiru itetei pampatei Anakni hang kayu balasangar.

²¹ Dahulu hie naun lawit teka Alatalla. Naun mamusuhi hanye daya pidasaran nelang pikiran naun jahat.

²² Kude itati, anri pampatei Anakni, Alatalla ngulah hubungan naun anri hanye jari maeh kamulek. Anri sara yiru naun kaiyuh nainsing nadap Alatalla hawuang kaadaan sa barasis, maeh nelang puang uweng nawada.

²³ Kude himat naun harus tatap satia parisaya nelang minri segah hang kaparisayaan naun. Ada hampe naun napas kaharapen sa haut naami ma naun tawuk naun narime Kabar Maeh teka Alatalla. Kabar yiru haut nawara ma tiap ulun hang litar dunia. Nelang neu yiru pada aku, hi Paulus, haut jari palayan.

Palayanan Paulus ma ungkup

²⁴ Itati aku sanang ngaret kahanangen neu ma kaparluan naun. Daya anri ngaret kahanangen dagingku, aku nyansukup inun sa magun harus naaret daya Kristus ma ungkupni, hanyeyiru tengani.

²⁵ Alatalla nunyu aku jari palayan ungkupni neu ma kaparluan naun. Aku harus nampe kabar teka Alatalla, katuluhni;

²⁶ hanyeyiru kabar sa salawah baabad-abad sa paitah narasia daya Alatalla ma katuluh ulun, kude itati nalalea ma ulun watni.

²⁷ Ma ulun watni yiru Alatalla hamen nantarang tuu leha kaehni nelang hanteni rasiani yiru ma katantuluh ulun murunsia. Rasia yiru hanyeyiru: Kristus naan hawuang diri naun, sa baarati naun sagar umba kaingkam pihante mulia Alatalla.

²⁸ Kristus yiru sa nawara kami ma tiap ulun. Kami ngampi itung nelang ngajar here katuluhni makai kawan kaharatien. Tujuan kami hanyeyiru nampan tiap ulun kaiyuh nainsing ma Alatalla, yalah ulun dewasa hawuang kawan hal rohani, daya haut mira baya anri Kristus.

²⁹ Nampan kaiyuh hal yiru aku bagawi bahimat. Aku bajuang anri sagalis kakuaten sa naami Kristus ma aku, sa bagawi hawuang diriku anri penu kuasa.