IBRANI 9 - KABAR MAEH MA HANYU JANJI WAU

Sara nyambah hang dunia nelang sara nyambah hang surga

¹ Hang janji sa palanungkai naan kawan aturan sumbayang, nelang naan pada unengan sumbayang ulahan murunsia.

² Erang kawua kemah naapinri sa bagian mukani naantuh Ruang Barasis. Hang yiru naan unengan ngimpeh palita, nelang naan pada meja anri rote sa nasarah ma Alatalla.

³ Hang bagian wuangni, hanyeyiru hang wading tenda sa karueh, naan ruang sa naantuh Ruangan Panga Barasis.

⁴ Hawuang ruangan yiru naan mezbah sa naulah teka amas unengan nutung dadupa, nelang naan pada Pati Janji sa katuluhni nalapis makai amas. Hawuang Pati yiru naan balanga amas mahuang manna, tungkeh Harun sa haut ngalungkung, baya rueh kabintap batu tulis sa hang ambauni nasurat sapuluh parentah teka Alatalla.

⁵ Hang ambau Pati yiru naan rueh Kerub, hanyeyiru makhluk baelat sa malamagan pihawian Alatalla. Elat teka karueh makhluk yiru pawerang hang ambau tutup Pati, hanyeyiru unengan pangampunan dosa. Kude katuluhni yiru puang tau titip-tarah natarang itati.

⁶ Kalayiru katuluhni naatur. Tiap anrau kawan imam masuk mawuang bagian muka kemah yiru neu nampalus tugas here.

⁷ Sa masuk ma bagian panga hawuang teka kemah yiru ekat imam hante. Hanye nampalus yiru ekat hinra erang taun. Yiru natampalusni anri nginsing ira neu nasarah ma Alatalla gana dirini raerai nelang gana kawan dosa sa naulah anri puang kataru daya umatni.

⁸ Makai aturan kalayiru, Roh Alatalla anri bawilah nantarang, salawah kemah bagian muka yiru magun minri, lalan masuk mawuang Ruang Panga barasis yiru huan tauka.

⁹ Yiti malamagan jaman itati; himat kawan pangamian anri kawan parapah eha sa nasarah ma Alatalla, puang kaiyuh ngampi paruna atei kunuan ulun sa nginsing pangamian.

¹⁰ Daya kawan upasara yiru ekat neu kawan kutaen, uuten, nelang wahai masam upasara ngabarasis. Katuluhni ekat kawan aturan lahir sa payu ekat hampe wayahni Alatalla ngulah sa wau.

¹¹ Kude Kristus haut hawi yalah Imam Hante teka kawan hal sa maeh sa haut naan. Kemah Tuhan hang unenganni nampalus tugasni yalah Imam Hante hanyeyiru kemah sa labis hante nelang labis paruna. Yiru puang naulah daya murunsia; aratini puang baasal teka dunia sa nacipta yiti.

¹² Kristus masuk Ruang Panga Barasis hawuang kemah yiru ekat hinra ma kalalawahni. Hang tawuk yiru hanye puang nginsing ira kambing randuk atawa ira anak sapi neu nasarah; hanye nginsing irani raerai, nelang makai yiru hanye nyanepah takam ma kalalawahni.

¹³ Ira teka kambing anri sapi upu baya habu teka parapah anak sapi, napakai neu natampitik ma kawan ulun sa najis manyu aturan agama nampan here barasis. Nah, amun ira anri habu yiru kaiyuh ngabarasis pinajis kawan ulun yiru,

¹⁴ labis likan ira Kristus! Itetei Roh sa kalalawah, Kristus nyarah dirini raerai ma Alatalla yalah parapah sa paruna. Irani ngabarasis atei aheng takam teka upasara agama sa puang bariran, nampan takam tau malayanni Alatalla sa welum.

¹⁵ Yiru sababni Kristus jari Ulun Helang ma isa janji wau, nampan ulun sa haut naherau daya Alatalla kaiyuh narime kawan berkat kalalawah sa haut najanji daya Alatalla. Katuluhni yiru kaiyuh jari daya naan sa matei, hanyeyiru Kristus; nelang pampateini yiru nyanepah ulun teka kawan kahalaen sa naulah here hang tawuk janji sa palanungkai magun payu.

¹⁶ Amun naan surat warisan, pada harus naan buktini ulun sa ngulah surat yiru haut matei.

¹⁷ Daya surat warisan puang payu salawah ulun sa ngulahni magun welum. Surat yiru payu ekat dami ulun yiru haut matei.

¹⁸ Daya yiru parjanjian sa palanungkai pada harus nasahkan makai ira.

¹⁹ Asalni hi Moses nampe katuluh parentah hukum Alatalla ma bangsa Israel. Udi yiru hi Moses ngalap ira anak sapi anri ira kambing randuk, balalu nyampurni makai ranu, udi hie nampitikni ma Buku Kawan Hukum teka Alatalla nelang ma katuluh bangsa Israel makai rawen hisop baya wulu babiri mariang.

²⁰ Nelang nampalus yiru hi Moses kaeau, “Iti ira sa mansah parjanjian teka Alatalla sa harus naalut naun.”

²¹ Udiyiru makai sara sa sameh, hi Moses nampitik pada ira yiru ma Kemah Tuhan anri ma katuluh kawan karangkapen pakai sumbayang.

²² Samula manyu hukum agama Yahudi, bilang ala katantuluh uras nabarasis makai ira; nelang dosa ekat tau naampun amun naan nunrak ira.

Kristus jari parapah pakai ngumpe dosa

²³ Makai sara kalayiru kawan barang sa malamagan kawan hal sa hang surga, parlu nabarasis. Kude ma kawan hal sa hang surga yiru naparlu parapah sa labis maeh.

²⁴ Daya Kristus puang masuk ma Ruang Barasis ulahan murunsia, isa ekat malamagan Ruang Barasis sa sabujurni. Kristus masuk ma surga raerai; hang yaru hanye itati nadap Alatalla ma kaparluan takam.

²⁵ Imam hante Yahudi tiap taun masuk ma Ruang Panga Barasis hawuang Lewu Tuhan anri nginsing ira erang kaukui eha. Kude Kristus puang masuk neu nyarah dirini kakete.

²⁶ Daya amun kalayiru, yiru himat hanye haut kakete wuah kahanangen teka tawuk dunia yiti naulah. Kude bawilah tuu, itati hang jaman pijumpuhan yiti, hanye hawi ekat hinra nampan muhut dosa anri ngurban dirini raerai.

²⁷ Alatalla haut nukas murunsia matei ekat hinra nelang udiyiru naadili daya Alatalla.

²⁸ Kalayiru pada Kristus ekat hinra nasarah yalah parapah nampan muhut dosa rama ulun. Hanye sagar hawi lagi ma karueh kalini, puang neu nyanyumpuh parsualan dosa, kude neu nyalamat kawan ulun sa nganrei pihawianni.