IBRANI 7 - KABAR MAEH MA HANYU JANJI WAU

Imam Melkisedek

¹ Melkisedek yiti hanyeyiru raja teka Salem nelang imam Alatalla sa Kuasani Puang uweng tikas. Tawuk hi Abraham mudi teka partampuran nyantalau kawan raja, hi Melkisedek hawi nahalu hanye palus mamberkat hanye.

² Balalu hi Abraham ngami ma Melkisedek sapersapuluh teka kawan inun sa narabutni. (Ngaran Melkisedek baarati, palanungkai, “Raja Kaadilan”; daya hanye raja teka Salem, balalu ngaranni baarati pada “Raja Damai”.)

³ Neu hi Melkisedek yiti puang uweng katarangan hang awe-awe neu hanye uweng ambah atawa ineh atawa datu nini; puang uweng pada katarangan neu kalahiranni, atawa pampateini. Hanye sameh kala Anak Alatalla; hanye samula imam sa kalalawah.

⁴ Jari, takam ninung hang yiti tuu leha hanteni hi Melkisedek yiti; hanye kalayiru hante hampe hi Abraham, ambah laluhur bangsa takam, ngami ma hanye sapersapuluh teka alakatantuluh sa iyuhni teka partampuran yiru.

⁵ Hawuang hukum agama Yahudi natukas kawan imam turunan Lewi harus ngalap sapersapuluh teka iyuh juat ulun Israel, hanyeyiru kawan pulaksanai here, biar here sameh turunan Abraham.

⁶ Hi Melkisedek puang turunan Lewi, kude hanye narime pada sapersapuluh teka katuluh sa narabut Abraham, nelang mamberkat hi Abraham sa haut narime kawan janji teka Alatalla.

⁷ Samula puang iyuh nabantah ulun sa naberkat samula labis imbe teka ulun sa mamberkat hanye.

⁸ Kawan imam sa narime pungutan sapersapuluh bagian yiru samula ulun sa tau matei. Kude manyu Surat Barasis, hi Melkisedek sa narime pangamian sapersapuluh bagian yiru samula ulun sa tatap welum.

⁹ Iyuh naantuh, hi Lewi – sa turunan ngalap sapersapuluh bagian teka ulun Israel – bayar pada bagian yiru mitah hi Abraham, hang tawuk hi Abraham bayarni ma hi Melkisedek.

¹⁰ Biar hi Lewi huan nakayaan, kude iyuh naantuh hanye haut naan hawuang tenga Abraham datu ninini, hang tawuk hi Melkisedek panalu anri hi Abraham.

¹¹ Hang kapit pimpinan kawan imam Lewi, hukum agama Yahudi naami ma ulun Israel. Daya kawan imam Lewi dahulu yiru puang kaiyuh nampalus anri paruna inun sa harus naulahni, balalu harus naan imam lain, hanyeyiru kala Imam Melkisedek, nelang puang teka babuhan Imam Harun lagi!

¹² Nah, amun kadudukan kawan imam baubah, hukum agama Yahudi pada harus baubah.

¹³ Sa nabahum hang yiti hanyeyiru Tuhan takam; Hanye teka suku lain, nelang huan suah sunah erang kaulun teka sukuni batugas yalah imam.

¹⁴ Katuluh ulun karasa Tuhan takam baasal teka suku Yehuda; nelang hi Moses puang suah ngantuh suku yiru tawuk hanye bapaner neu kawan imam.

Erang kaulun imam lain, kala hi Melkisedek

¹⁵ Hal sa napaner yiti magin tarang lagi, anri huletni erang kaulun imam lain kala hi Melkisedek.

¹⁶ Hanye naangkat jari imam, puang manyu kawan aturan murunsia, malengkan manyu welumni sa bakuasa nelang puang uweng pijumpuhanni.

¹⁷ Daya hawuang Surat Barasis naantuh, “Hanyu samula imam kalalawahni, kala imam Melkisedek.”

¹⁸ Jari, itati aturan sa uhang haut nasipi, daya puang kokoh nelang puang bariran.

¹⁹ Hukum agama Yahudi puang kaiyuh ngulah ala inun heneng jari paruna. Yiru sababni takam itati naami isa kaharapen sa labis maeh; makai yiru takam kaiyuh nyanrite Alatalla.

²⁰ Kamulek, katuluhni yiru nasinrah anri sumpah teka Alatalla. Puang uweng sumpah kalayiru hang tawuk kawan imam sa lain yiru naangkat.

²¹ Kude Yesus naangkat jari imam makai sumpah, hang tawuk Alatalla kaeau ma hanye, “Tuhan haut basumpah, nelang hanye puang sagar ngubah putusanni, ‘Hanyu samula imam hampe kalalawahni.’ ”

²² Makai yiti pada Yesus jari jaminan ma isa janji sa labis maeh.

²³ Naan lagi isa hal: Kawan imam sa lain yiru rama, daya here maisasaan matei hampe puang kaiyuh nyanyumpuh jabatanni.

²⁴ Kude Yesus welum hampe kalalawahni, jari jabatanni yalah imam puang paidar ma ulun lain.

²⁵ Daya sabab yiru ma kalalawahni Yesus kaiyuh nyalamat kawan ulun sa hawi ma Alatalla itetei hanye, daya hanye welum hampe kalalawahni nampan nampe pilakuan ma Alatalla ma kawan ulun yiru.

²⁶ Jari, Yesus yiru Imam Hante sa naparlu daya takam. Hanye barasis; hang hanye budas puang uweng kahaba kahalaen atawa dosa, hanye napisah teka kawan ulun badosa, nelang naenat hampe ma unengan sa labis ambau teka kawan langit.

²⁷ Hanye puang kala kawan imam hante sa lain, sa tiap anrau harus nyarah parapah daya kawan dosani dahulu, udiyiru wau daya gana kawan dosa umat. Yesus nyarah parapah ekat hinra ma kalalawahni, tawuk hanye nyarah dirini raerai yalah parapah.

²⁸ Hukum agama Yahudi ngangkat ulun sa puang paruna jari imam hante. Kude hanrian haut udi hukum yiru, Alatalla ngulah janji makai sumpah neu hanye ngangkat yalah Imam Hante, Anak sa haut natanyari jari Panyalamat sa paruna ma kalalawahni.