IBRANI 5 - KABAR MAEH MA HANYU JANJI WAU

¹ Tiap imam hante napidi teka ulun murunsia, nelang naangkat neu malayanni Alatalla yalah wakil here. Tugasni hanyeyiru nyarah ma Alatalla kawan pangamian anri kawan parapah pakai pangampunan ulun badosa.

² Imam hante yiru maleme hang wahai hal, daya yiru hanye tau kaiyuh lamah liut nadap kawan ulun sa puang karasa inun-inun nelang sa tawang lalanni.

³ Nelang daya hanye maleme, balalu hanye harus nyarah parapah, puang ekat daya kawan dosa ulun murunsia, kude pada daya kawan dosani raerai.

⁴ Puang uweng sunah erang kaulun sa ngangkat tengani raerai jari imam hante. Ulun jari imam hante, amun Alatalla nerau hanye neu ma yiru-sameh kala hi Harun.

⁵ Kalayiru pada Kristus. Hanye puang ngangkat tengani raerai jari Imam Hante. Alatalla raerai sa ngangkat hanye. Alatalla kaeau ma hanye, “Hanyu Anakku; hang anrau yiti aku jari Ambahnu.”

⁶ Hang unengan lain Alatalla kaeau pada, “Hanyu samula imam hampe kalalawahni, kala Imam Melkisedek.”

⁷ Hang tawuk Yesus welum hang dunia yiti, hanye badoa ilaku makai lengan mehet nelang nungkau nadap Alatalla, sa sanggup nyalamat hanye teka pampatei. Nelang daya hanye tunduk ma Alatalla anri penu hormat, balalu hanye nasanrengei.

⁸ Yesus samula Anak Alatalla, kude biar kalayiru, hanye paajar ngalut nuu itetei kahanangenni.

⁹ Balalu udi hanye naulah jari panyalamat sa paruna, hanye jari putut kasalamatan sa kalalawah ma katantuluh ulun sa ngalut nuu ma hanye,

¹⁰ nelang Alatalla pada nantarang hanye yalah Imam Hante, kala Imam Melkisedek!

Paringatan

¹¹ Neu kadudukan Yesus yalah Imam Hante, naan wahai sa parlu nawara kami ma naun, kude mahadin neu manarangni daya naun unte tuu kataru.

¹² Sabujurni haut hampe wayahni ma naun nampan jari guru, kude wangunni naun magun parlu paajar teka ulun lain neu kawan putut ajar Alatalla. Naun huan kaiyuh narime kutaen sa mape; naun magun harus ekat nguut susu.

¹³ ulun sa magun nguut susu, himat hanye magun genda; hanye huan uweng pangalaman neu inun sa bujur nelang inun sa hala.

¹⁴ Kutaen sa mape hanyeyiru ma ulun dewasa sa daya pangalaman, haut tau kataru midi saawe sa maeh, saawe sa jahat.