IBRANI 4 - KABAR MAEH MA HANYU JANJI WAU

¹ Nah, janji Alatalla magun napakai, nelang takam sagar nahuyu tarie manyu janjini. Jari, wuah takam bajaga nampan ada sunah erang kaulun teka naun salenga puang kaingkam tarie manyu janji yiru.

² Daya Kabar Maeh yiru haut nawara ma takam sameh kala nawara ma here. Kude ma here, kabar yiru puang uweng riranni. Daya tawuk here nyanrengeini here puang parisaya.

³ Kude takam sa parisaya narime patariean sa najanji Alatalla yiru. Yiru susuk anri inun sa naeau daya Alatalla, kalayiti, “Aku sangit nelang basumpah, ‘Here puang sagar masuk nampan kaiyuh tarie baya anri aku.’ ” Alatalla kaeau kalayiru biar pagawianni haut luput teka kalemah hanye ngulah dunia yiti.

⁴ Daya neu anrau kapitu, naan nasurat hawuang Surat Barasis kalayiti, “Hang anrau kapitu Alatalla tarie teka katantuluh pagawianni.”

⁵ Neu hal yiru nasurat lagi kalayiti, “Here puang sagar masuk ma tane yiru nampan kaiyuh tarie baya anri aku.”

⁶ Jari here sa pangadahulu karengei kabar neu Kabar Maeh yiru, puang narime patariean yiru.

⁷ Daya Alatalla haut nukas isa anrau sa lain lagi, sa naantuh “Anrau Yiti”. Bataun-taun udi yiru Alatalla pantane neu hal yiru itetei hi Dawid, hawuang ayat sa nakutip hunien, “Amun hang anrau yiti naun karengei lengan Alatalla, ada naun mape silu.”

⁸ Jaka atikala hi Yosua haut nunyu kawan ulun yiru tarie manyu janji Alatalla, himat Alatalla puang sagar pantane lagi neu isa anrau sa lain.

⁹ Jari ma ulun wat Alatalla magun naan janji neu tarie kala Alatalla tarie hang anrau sa kapitu yiru.

¹⁰ Daya ulun sa narime patariean sa najanji Alatalla ma hanye yiru, sagar tarie pada teka pagawianni, sameh kala Alatalla.

¹¹ Daya yiru, hayu takam ngakali bahimat nampan narime patariean sa najanji Alatalla yiru. Ada hampe sunah erang kaulun teka takam walang kala here sa dahulu daya puang parisaya ma Alatalla.

¹² Lengan Alatalla samula lengan sa welum nelang bakuasa; Labis kumat teka pedang barare nantuhian. Lengan yiru hanrasuk hampe ma helang jiwa anri roh; hampe ma helang kawan kakulepan anri taulang sumsum, hampe karasa salalem-lalemni pikiran anri niat atei murunsia.

¹³ Puang uweng sunah isa makhluk sa padina teka paninungan Alatalla. Ala katantuluh tabentur talampas hang hadapanni. Nelang takam harus ngami partanggungan jawab ma hanye.

Yesus Imam Hante sa mulia

¹⁴ Yiru sababni takam harus itegei mansing hang pangakuan kaparisayaan takam. Daya takam uweng Imam Hante sa mulia, sa haut masuk ma hadapan Alatalla hanyeyiru Yesus Anak Alatalla.

¹⁵ Imam Hante takam yiru puang imam sa puang tau umba ngingkam kawan kalemeen takam. Kabalikanni, hanye haut napurija hawuang ala katantuluh hal, sameh kala takam; ekat hanye puang ngulah dosa!

¹⁶ Daya yiru, hayu takam anri penu kaheeien nadap Alatalla sa marentah anri maeh atei. Alatalla sagar malelo takam nelang mamberkat takam nampan takam kaiyuh pangarawahen pas tuu manyu wayahni.