IBRANI 3 - KABAR MAEH MA HANYU JANJI WAU

Yesus labis hante teka hi Moses

¹ Pulaksanai katuluh sasameh Kristen sa haut naherau pada daya Alatalla! Suba pikir lalalem neu Yesus yiti! Alatalla ngutus hanye hulung neu jari Imam Hante hawuang agama sa naumba takam.

² Hanye satia ma Alatalla sa haut midi hanye ma pagawian yiru, pada kala hi Moses sadi satia nampalus tugasni hang lewu Alatalla.

³ Kude Yesus patut kaiyuh hormat labis hante teka hi Moses. Daya ulun sa ngamuan lewu harus kaiyuh hormat labis hante teka lewu yiru sanaamuanni.

⁴ Samula tiap lewu naan sa ngamuanni, kude sa mambangun ala katantuluh hanyeyiru Alatalla.

⁵ Hi Moses satia yalah palayan hawuang lewu Alatalla nelang nampe kawan hal sa sagar nawara daya Alatalla hang anrau hanrian.

⁶ Kude Kristus satia yalah Anak sa batanggung jawab hang ambau lewu Alatalla. Nelang takam yiti lewu Alatalla, amun takam tatap basamangat nelang tatap harap neu kaiyuh inun sa naharap takam.

Patariean ma ulun wat Alatalla

⁷ Daya yiru, kala lengan Roh Alatalla, “Amun hang anrau yiti naun karengei lengan Alatalla,

⁸ ada naun mape silu, kala datu nini naun, tawuk here mambarontak nawan Alatalla, nelang nyunri Alatalla hang padang gurun.

⁹ ‘Hang yaru datu nini naun murija aku, nelang nyunri aku,’ eau Alatalla, ‘padahal here haut kadinung pagawianku epat pulu taun lawahni.’

¹⁰ Yiru sababni aku muar anri here nelang aku kaeau, ‘Here saratang puang satia, nelang mawule ngalut nuu kawan parentahku.’

¹¹ Aku sangit nelang basumpah, ‘Here sagar puang masuk ma tane janji yiru nampan kaiyuh tarie baya aku.’ ”

¹² Pulaksanai katuluh, hati-hati ada hampe naan hang penah naun sunah erang kaulun sa ateini kalayiru jahat nelang puang uweng kaparisayaan, hampe hanye iwaleng nelang lawit teka Alatalla sa welum!

¹³ Jari, nampan puang uweng sunah erang kaulun teka penah naun wuah tipu dosa hampe nawan Alatalla, ware naun ipangami nasehat tiap anrau salawah takam magun welum hawuang jaman sa naantuh “Anrau Yiti” hawuang Surat Barasis.

¹⁴ Takam katantuluh samula hengau saparjuangan wat Kristus, asal takam hampe pijumpuhanni negei mansing kaharapen sa haut naan hang takam teka asalni.

¹⁵ Iti sa nasurat hawuang Surat Barasis, “Amun hang anrau yiti naun karengei lengan Alatalla, ada naun mape silu, kala datu nini naun, tawuk here mambarontak nawan Alatalla.”

¹⁶ Nah, hie kawan ulun yiru sa karengei lengan Alatalla balalu mambarontak nawanni? Angneh, yiru katuluh ulun sa napimpin daya Moses kaluar teka Mesir?

¹⁷ Nelang nadap hie Alatalla sangit epat pulu taun lawahni? Angneh, nadap here sa badosa, sa matei hang padang gurun?

¹⁸ Tawuk Alatalla basumpah kalayiti, “Here puang sagar masuk ma tane janji yiru nampan kaiyuh tarie baya aku” – nelang hie lagi sa nabahum daya Alatalla? Angneh, sa nabahum hanyeyiru kawan ulun sa mambarontak nawan Alatalla?

¹⁹ Itati takam kataru here puang kaiyuh masuk, daya here puang parisaya ma Alatalla.