IBRANI 2 - KABAR MAEH MA HANYU JANJI WAU

Kasalamatan sa tamam

¹ Yiru sababni takam harus itegei mansing hang kawan ajaran sa haut rengei takam, nampan takam ada nanan kaparisayaan takam.

² Kawan pesen sa haut natahampe daya kawan malekat ma datu nini takam bawilah tuu kapinuu, nelang ulun sa puang narimeni atawa puang ngalut nuu ni sagar nahukum manyu kala gawini.

³ Magin ni anri kasalamatan sa labis tamam teka kawan pesen yiru! Amun takam puang uweng parhatian anri kasalamatan yiru, batantu takam puang sagar lapas teka hukuman. Daya Tuhan sa samambatang iwara kasalamatan yiru, nelang kawan ulun sa dahulu nyanrengeini haut mambukti pikapinuuni ma takam.

⁴ Kamulek Alatalla umba nyantuhun kasaksian kawan ulun yiru anri ngulah wahai masam kaajaiban nelang kawan hal sa luar biasa nelang magi kawan pangamian teka Roh Alatalla manyu kabahumenni.

Panguka jalan ma murunsia nampan nasalamat

⁵ Kawan malekat puang kaiyuh kuasa teka Alatalla nampan marentah dunia wau sa hanrian, hanyeyiru dunia sa rahat naheu takam yiti.

⁶ Kabalikanni, hang isa bagian hawuang Surat Barasis nasurat kalayiti, “Murunsia yiru inun, u Alatalla, hampe hanyu hamen ngitung hanye? Murunsia ekat murunsia tuu eleh, kude hanyu ngitung nelang sayang hanye!

⁷ Ekat erang pitus hanyu nukas hanye randah butit teka malekat. Hanyu ngami ma hanye kadudukan sa mulia nelang nahormat,

⁸ nelang ngulah hanye bakuasa hang ambau ala katantuluh.” Nah, amun naantuh Alatalla ngulah murunsia “bakuasa hang ambau ala katantuluh”, yiru himat puang uweng sunah isa sa puang hang kapit kakuasaan murunsia. Biar kalayiru, itati takam puang kadinung murunsia bakuasa hang ambau ala katantuluh.

⁹ Kude takam haut kadinung Yesus bakuasa! Erang pitus hanye natukas randah butit teka malekat, nampan daya pikaeh atei Alatalla hanye tau matei ma katantuluh ulun murunsia. Takam kadinung hanye itati naami kadudukan sa mulia nelang nahormat daya hanye haut wuah kahanangen hampe matei.

¹⁰ Samula haut pipatutni Alatalla – sa ngulah ala katantuluh manyu kabahumenni – ngulah Yesus panyalamat sa paruna itetei kahanangen. Anri kalayiru Alatalla kaiyuh nantiring ulun rama nampan umba namulia baya Yesus. Daya hanye sa nguka lalan ma here nampan tau nasalamat.

¹¹ Yesus ngabarasis murunsia teka kawan dosa here; nelang here sa nabarasis yiru, uras anak teka isa Ambah. Yiru sababni Yesus puang umangan mangaku here yiru yalah kawan pulaksanai.

¹² Yesus kaeau ma Alatalla, “Aku sagar iwara ma kawan pulaksanaiku neu hanyu. Aku sagar nawat hanyu hawuang kumpulan here.”

¹³ Yesus kaeau pada, “Aku harap witu Alatalla.” Nelang hanye kaeau kamulek, “Iti aku, baya kawan anakni sa haut naami Alatalla ma aku.”

¹⁴ Daya gana kawan ulun sa naantuhni anak yiru, hanyeyiru mahluk murunsia sa tau matei, balalu Yesus raerai sameh kala here nelang welum hawuang wangun murunsia. Hanye ngulah kalayiru, nampan mitah pampateini hanye kaiyuh nyantalau Iblis sa bakuasa hang ambau pampatei.

¹⁵ Makai sara yiru hanye nyanepah kawan ulun sa salawah hanye welum nasamalah daya takut anri pampatei.

¹⁶ Bawilah tuu puang malekat sa nakarawahni, malengkan anak tukui Abraham.

¹⁷ Yiti baarati hanye harus sameh anri kawan pulaksanai hawuang katuluh hal. Balalu anri kalayiru hanye tau jari Imam Hante sa satia uweng ahi lelo. Mitah palayanan ni yiru dosa murunsia kaiyuh naampun.

¹⁸ Nelang daya hanye haut suah wuah kahanangen nelang napurija, hanye kaiyuh ngarawah kawan ulun sa wuah purija, daya hanye haut suah napurija nelang wuah kahanangen.