IBRANI 13 - KABAR MAEH MA HANYU JANJI WAU

Kalaawe ngampi sanang atei Alatalla

¹ Ware naun tatap ipasinta isa anri sa lain kala kawan ulun Kristen ipulaksanai.

² Ada ngangkurun narime hang lewu naun kawan ulun sa huan naun kataru. Daya anri nampalus kalayiru, suah ulun, anri puang hanye karasa, haut narime malekat hang lewuni.

³ Itung kawan ulun sa hawuang panjara, yalah kala naun pada naan hawuang panjara baya here. Nelang kawan ulun sa nababaran, ware naun kaitung anri here yalah kala naun pada nababaran kalayiru.

⁴ Katantuluh ulun harus malihara nelang hormat ma adu untung, daya sabab yiru ulun ilaki wawei harus satia isa anri sa lain. Ulun sa puang sanunuh nelang ulun sa ibela sagar naadili daya Alatalla.

⁵ Ada pamelum naun naparentah daya sinta ma duit, kude ware naun kaingkam sukup anri inun sa naan hang naun. Daya Alatalla haut kaeau, “Aku budas puang sagar maladar atawa sagar nanan hanyu.”

⁶ Daya yiru takam heei kaeau, “Tuhan samula pangarawahku, aku puang takut. Inun sa tau naulah murunsia nadap aku?”

⁷ Ada puang kaitung anri kawan pamimpin sa nampe pesen Alatalla ma hanyu. Kalaawe here welum nelang kalaawe here matei, nelang alut kaparisayaan here.

⁸ Yesus Kristus tatap sameh, hau sadi, itati, palus hampe ma kalalawahni.

⁹ Ada maladar katuluh masam ajaran sa aneh-aneh nyantawang naun. Atei takam harus natangkansing daya pikaeh atei Alatalla, yiru sa maeh; ada daya kawan aturan neu anakuta. Kawan ulun sa dahulu ngalut nuu ma kawan aturan yiru puang uweng kahaba riranni.

¹⁰ Takam uweng isa mezbah uneng nyarah parapah ma Alatalla. Nelang kawan imam sa malayanni hawuang Kemah Tuhan, puang uweng hak nguta parapah sa naan hang ambau mezbah yiru.

¹¹ Ira eha sa nasarah jari parapah umak ngampun dosa, naendei daya imam hante ma Ruang Panga Barasis, kude bangkai eha yiru natutung hang luar kemah.

¹² Yiru sababni Yesus pada matei hang luar pintu gerbang tumpuk nampan ngabarasis ulun watni teka dosa makai irani raerai.

¹³ Daya yiru, hayu takam tulak nunung hanye hang luar kemah nelang umba naampahe baya hanye.

¹⁴ Daya hang ambau tane puang uweng unengan muneng sa kalalawah ma takam; takam ngantara unengan muneng sa hanrian.

¹⁵ Daya yiru, anri itetei Yesus, ware takam saratang nawat nante Alatalla; yiru kala parapah tarima kasih takam ma hanye, sa nasarah takam itetei lela lengan neu nawat nante ngaranni.

¹⁶ Ada puang kaitung ngulah sa maeh nelang ipangarawah, daya yiti kawan parapah sa ngampi sanang atei Alatalla.

¹⁷ Alut parentah kawan pamimpin naun nelang tunduk ma here. Daya here saratang ngatawani amirue naun, nelang here harus batanggung jawab ma Alatalla. Amun naun ngalut nuu ma here, here tau bagawi anri sanang atei; jaka puang, himat here sagar bagawi anri mahanang atei, nelang yiru puang uweng kauntunganni ma naun.

¹⁸ Ware naun saratang badoa ma kami. Kami harap kunuan atei kami bungas barasis, daya hawuang katuluh hal kami saratang hamen nampalus inun sa bujur.

¹⁹ Hulung aku ilaku tatuu, nampan naun badoa ma aku nampan Alatalla hinang ngendei aku mulek nunung naun.

Doa panutup

²⁰ Alatalla haut nyamelum Tuhan takam Yesus teka pampatei. Daya pampateini yiru hanye itati jari Pakatik Hante ma takam, hanyeyiru kawan babirini. Pampateini yiru pada nyantuhun janji hampe kalalawah sa naulah Alatalla anri takam.

²¹ Mudahan Alatalla putut kasanangen yiru nampenu naun makai kawan sa maeh sa naparlu daya naun neu nampalus kabahumenni. Mudahan anri itetei Yesus Kristus, Alatalla ngulah hawuang takam, inun sa nakasinnienni. Wuah Kristus natawat hampe kalalawahni! Amen.

Panutup surat

²² Aku laku nampan naun mantaru kawan lengan patataanku yiti anri sabar, daya suratku puang bangat ambau.

²³ Wuah naun karasa pulaksanai takam hi Timotius haut nalapas teka panjara. Amun hanye haut ma unenganku yiti, aku sagar ngendei hanye tawuk aku ganta naun die.

²⁴ Tahampe tabe kami ma katuluh pamimpin anri ma katuluh ulun wat Alatalla. Tarime pada tabe teka kawan pulaksanai hang Italia.

²⁵ Mudahan Tuhan mamberkat Pulaksanai katuluhni.