IBRANI 12 - KABAR MAEH MA HANYU JANJI WAU

Alatalla Ambah takam

¹ Nah, neu takam raerai, hang kalilingan takam naan rama tatuu saksi! Daya yiru, hayu takam ngumpe katantuluh sa nyameat takam anri dosa sa magun ireket hang takam. Nelang ware takam anri sagalis atei nampalus partandingan sa naan hang hadapan takam.

² Wuah paninungan takam tatuju ma Yesus, daya hanye sa ngele parisaya takam nelang maliharani teka panukuan hampe pijumpuhan. Yesus tahan ngaret kahanangen hang kayu balasangar! Hanye puang paduli matei hang kayu balasangar yiru samula isa hal sa ngumangan. Hanye ekat kaitung neu kaaraien sa sagar naingkamni hanrian. Itati hanye maharung hang tiba kawan padadusan Alatalla nelang marentah baya anri hanye.

³ Suba pikir kalaawe rarani Yesus nadap kawan ulun badosa sa nawan hanye anri kalayiru kehetni! Daya yiru ada puung nelang wawai kaharapen.

⁴ Daya hawuang parjuangannu nawan dosa, naun huan suah bajuang hampe harus nunrak ira.

⁵ Nelang ada puang kaitung patataan Alatalla yiti, sa naami ma hanyu kala kawan anakni: “Anakku, pantaru mamaeh ajaran Tuhan, nelang ada puung amun hanye nyangit hanyu.

⁶ Daya Tuhan ngampi lelan tiap ulun, sa nasintani, nelang hanye meweh tiap ulun sa nakakuni kala anakni.”

⁷ Ware naun ngaret walawas teka Alatalla kala isa ajaran teka erang kaulun ambah. Daya, inun suah erang kaulun anak puang nahukum daya ambahni?

⁸ Amun naun puang umba nahukum kala kawan anakni sa lain, yiti baarati naun puang anak sah, malengkan anak sa puang sah.

⁹ Takam uweng ambah hang dunia. Hanye ngajar takam, nelang takam mahormat hanye. Nah, labis likan nadap Ambah rohani takam sa hang surga, batantu takam harus labis likan ngalut nuu ma hanye nampan takam welum.

¹⁰ Ulun matueh takam sa hang dunia ngajar takam naan batasni manyu inun sa naingkam here maeh. Kude Alatalla ngajar takam neu pikaeh takam raerai, nampan takam kaiyuh barasis baya anri hanye.

¹¹ Samula hang tawuk takam naajar, hukuman yiru puang ngampi rauh atei takam, malengkan ekat ngampi hanang atei. Kude hanrian udi yiru, ma takam sa haut naajar, hukuman yiru ngulah takam welum manyu kabahumen Alatalla, nelang hasilni takam kaingkam sanang.

Patitah anri paringatan

¹² Daya yiru, ampikansing tangan naun sa kekel anri ulualepnu sa kaketer yiru!

¹³ Takia saratang hang lalan sa rata, nampan pee naun sa kepa yiru puang pawalehu, kude likan balalu ware.

¹⁴ Kakali nampan welum ruhui anri katuluh ulun. Kakali pada nampan welum barasis. Hulung ma Tuhan. Daya puang sunah erang kaulun kaiyuh kadinung Tuhan amun hanye puang welum kalayiru.

¹⁵ Jaga ada hampe naan sunah erang kaulun sa kaluar teka lingkungan pikaeh atei Alatalla, nampan ada naan isa jari kala kayu barasun hang penah naun hampe ngulah mahadin nelang nanrusak rama ulun makai rasunni.

¹⁶ Jaga nampan ada naan sa welum puang sanunuh atawa puang mahargai kawan hal rohani, kala sa naulah daya Esau. Hanye ngari hakni yalah anak taraulu, ekat umak erang mangkok kutaen.

¹⁷ Naun karasa udi yiru hi Esau sindi kaiyuh berkat yiru teka ambahni, kude hanye natampik. Daya biar anri tungkau hanye ngantilau lalan nampan nangkaeh kahalaenni, kasampatan ma yiru haut puang uweng lagi.

¹⁸ Kawan pulaksanai puang hawi nadap ala inun-inun kala sa nahadap daya bangsa Israel sadi. Here nadap inun sa tau nakama, hanyeyiru Gunung Sinai anri apuini sa malelap; here nadap piieng, kalam kabut anri riwut barat;

¹⁹ here nadap lengan trompet anri lengan suara sa mehet. Tawuk kawan ulun Israel karengei lengan yiru, here ilaku tatuu nampan lengan yiru puang bapaner lagi anri here.

²⁰ Daya here puang tahan karengei parentah sa natahampe daya lengan yiru. Daya lengan yiru kaeau, “Katantuluh sa hanggatuk gunung yiti, puang paduli inun yiru eha atawa hie-hie, harus napedak makai watu hampe matei.”

²¹ Inun sa dinung daya kawan ulun Israel yiru kalayiru tamam hampe hi Moses kaeau, “Aku takut nelang neter!”

²² Kabalikanni, naun haut hawi ma Bukit Sion, tumpuk Alatalla sa welum, hanyeyiru Yerusalem hang surga anri baribu-ribu malekatni.

²³ Naun umba isa kumpulan sa rami – kumpulan kawan anak taraulu Alatalla, sa kawan ngaranni nadaftar hawuang surga. Naun hawi nadap Alatalla, Hakim katantuluh ulun murunsia. Naun nadap roh-roh kawan ulun maeh, sa haut naulah paruna.

²⁴ Naun hawi nadap Yesus, Ulun Helang ma janji wau yiru; naun nadap ira natampitik sa manjamin kawan hal sa lawit labis maeh teka sa najamin daya ira Habel.

²⁵ Daya yiru hati-hati ada hampe naun puang hamen nyanrengei hanye sa bapaner yiru. Here sa puang hamen nyanrengei hanye sa hawi ma dunia nelang iwara kabar teka Alatalla, puang kaiyuh rari. Duan likan takam yiti sa karengei hanye sa bapaner teka surga! Amun takam puang hamen nyanrengei hanye, puang budas takam tau lapas!

²⁶ Hang tawuk yiru lenganni ngampi geger litar hang ambau tane. Kude itati hanye bajanji, “Hinra lagi, aku sagar ngampi geger puang ekat hang ambau tane kude hang langit pada.”

²⁷ Lengan “hinra lagi” nantarang himat katantuluh dunia sa haut naulah sagar nagagunsang nelang nasamawai nampan sa patanan ekatni sa puang tau tagagunsang.

²⁸ Daya yiru, ware takam ngantuh tarima kasih ma Alatalla, daya takam narime teka hanye karajaan sa puang tau tagagunsang. Wuah takam batarima kasih nelang baibadat ma Alatalla anri hormat nelang takut, manyu kala sa nakasinnien dayani.

²⁹ Daya Alatalla takam kala apui sa nyanrakit.