IBRANI 10 - KABAR MAEH MA HANYU JANJI WAU

¹ Hukum agama Yahudi ekat ngami gambaran sa ranang-ranang neu kawan hal sa maeh hanrian, puang gambaran sa sabujurni teka kawan hal yiru. Puang tau pada hukum yiru tau ngampi paruna ulun sa hawi nyambah Alatalla anri nginsing pangamian, biar tiap taun saratang nyarah kawan parapah sa sameh.

² Atikala kawan ulun sa nyambah Alatalla yiru tuu-tuu haut nabarasis teka dosa, here puang lagi sagar uweng kaingkam badosa, nelang parapah puang sagar nasarah lagi.

³ Kude bawilah kawan parapah sa nasarah tiap taun yiru ekat pakai ngampi itung ulun neu kawan dosa here,

⁴ daya samula ira sapi anri ira kambing randuk puang kaiyuh muhut dosa.

⁵ Yiru sababni hang tawuk Kristus masuk ma dunia, hanye kaeau ma Alatalla, “Hanyu puang katuju parapah anri pangamian; kabalikanni hanyu haut nyadia tenga ma aku.

⁶ Hanyu puang katuju anri parapah natutung atawa parapah neu pangampunan dosa.

⁷ Balalu aku kaeau, ‘Iti aku, u Alatalla! Aku hawi lepuh nampalus kabahumennu, kala sa nasurat neu diriku hawuang Surat Barasis.’ ”

⁸ Mulani Kristus kaeau, “Hanyu puang katuju parapah anri pangamian; hanyu puang katuju anri parapah eha sa natutung yalah pangamian nelang parapah neu pangampunan dosa.” Kristus kaeau kalayiru, biar katuluh parapah yiru nasarah manyu hukum agama Yahudi.

⁹ Udiyiru Kristus kaeau, “Iti aku, u Alatalla! Aku hawi lepuh nampalus kabahumennu.” Jari Alatalla nyamawai katuluh parapah sa dahulu yiru, palus ngantini makai parapah Kristus.

¹⁰ Yesus Kristus haut nampalus inun sa nakabahumen Alatalla nelang nyarah dirini yalah parapah. Anri pangamian yiru, sa natampalusni ekat hinra hampe ma kalalawahni, takam katantuluh nabarasis teka dosa.

¹¹ Tiap imam Yahudi nampalus tugasni yalah imam tiap anrau, nelang kakete hanye nyarah kawan parapah sa sameh. Kude kawan parapah yiru budas puang kaiyuh muhut dosa.

¹² Kabalikanni, Kristus nyarah ekat isa parapah neu pangampunan dosa, nelang parapah yiru payu ma kalalawahni. Udi nyarah parapah yiru, Kristus maharung hang tiba kawan Alatalla nelang marentah baya anri hanye.

¹³ Itati Kristus nganrei hampe Alatalla ngulah kawan musuhni talau nyambah hanye.

¹⁴ Jari makai isa parapah, Kristus ngampi paruna kawan ulun sa haut nabarasis teka dosa.

¹⁵ Neu hal yiru Roh Alatalla ngami pada kasaksianni ma takam. Roh Alatalla kaeau,

¹⁶ “ ‘Iti janji sa sagar naulahku anri here hang kawan anrau hanrian,’ eau Tuhan, ‘Aku sagar ngimpeh kawan hukumku hawuang atei here, nelang nyuratni hawuang pikiran here.’ ”

¹⁷ Alatalla pada kaeau, “Aku sagar puang ngitung kawan dosa nelang kawan kajahaten here.”

¹⁸ Jari, kawan dosa nelang kawan kajahaten yiru haut naampun, balalu puang parlu lagi nasarah parapah neu pangampunan dosa.

Hayu takam nyanrite Alatalla

¹⁹ Nah, Pulaksanai katuluh, daya pampatei Yesus yiru takam itati heei masuk Ruang Panga Barasis.

²⁰ Yesus haut nguka lalan sa wau ma takam, hanyeyiru lalan sa ngami pamelum. Lalan yiru mitah tenda, hanyeyiru tenga Yesus raerai.

²¹ Nelang takam itati uweng erang kaulun imam hante, sa batanggung jawab hang ambau lewu Alatalla.

²² Daya yiru, hayu takam nyanrite Alatalla anri atei sa mawitu bujur nelang kaparisayaan sa mansing; anri atei sa haut nabarasis teka kaingkam bakahalaen, nelang anri tenga sa haut nawui makai ranu sa barasis.

²³ Ware takam itegei mansing hang kaharapen sa nakaku takam, daya Alatalla iyuh naparisaya nelang hanye sagar nampalus janjini.

²⁴ Nelang ware takam ipangatawani, nampan takam tau mapakat ngami samangat nampan sinta sasameh murunsia nelang nampalus kawan hal sa maeh.

²⁵ Ware takam tatap baya bakumpul, nelang ada laya kala ulun lain. Takam harus labis satia ipanagur panakansing, daya takam karasa himat puang lawah lagi Tuhan sagar hawi.

²⁶ Daya amun kabar sa bujur teka Alatalla haut natahampe ma takam, kude takam magun saratang anri sangaja ngulah dosa, budas puang uweng lagi parapah pakai muhut dosa takam.

²⁷ Ekat isa naan ma takam hanyeyiru nadap pangadilan Alatalla anri apui kasangitenni sa sagar nutung galis kawan ulun sa nawan hanye!

²⁸ Ulun sa puang ngalut nuu ma hukum sa naami daya Moses, nahukum mati puang uweng ampunan lagi, amun gana kasaksian rueh telu kaulun, hanye bawilah tuu naan kahalaen.

²⁹ Tuu leha weat hukuman sa harus nasanawu ma ambau ulun sa ngiik narah Anak Alatalla. Ulun yiru nganggap mahawai ira parjanjian Alatalla, hanyeyiti pampatei Kristus sa ngabarasis hanye teka dosa. Hanye ngampahe Roh sa ngami ahi lelo.

³⁰ Takam karasa hie hanye sa kaeau, “Aku sagar iwaleh! Aku sagar nukum!” nelang sa kaeau, “Tuhan sagar mangadili ulun watni.”

³¹ Tuu leha maka sanringinenni amun lawu ma tangan Alatalla Sa Welum!

³² Itung kalaawe kaadaan kawan pulaksanai hang wayah sa haut paitah. Hang tawuk yiru, udi sahaya Alatalla nyahaya ma naun, naun rama wuah kahanangen; kude naun tatap bajuang anri bahimat.

³³ Naan wayahni naun naampahe nelang naulah anri puang maeh hang hadapan ulun rama. Naan wayahni pada naun umba wuah kahanangen baya here sa naulah kalayiru,

³⁴ nelang naun umba kaingkam kahanangen atei ulun sa napanjara. Nelang tawuk katuluh milik naun narampas, naun narime yiru anri sanang atei, daya naun karasa naun magun uweng ala sa labis maeh, sa sagar tahan hampe kalalawahni.

³⁵ Daya sabab yiru, ada wawai kaharapen, daya amun naun tatap parisaya, himat naan upa sa hante neu yiru!

³⁶ Naun parlu basabar, nampan naun kaiyuh nampalus kabahumen Alatalla anri kalayiru naun narime inun sa najanjini.

³⁷ Daya hawuang Surat Barasis nasurat, “Ekat erang pitus lagi, hanye sa sagar hawi yiru, sagar hinang hawi; hanye puang sagar ngampi unte pihawianni.

³⁸ Nelang ulun watku sa mawitu bujur sagar parisaya palus welum; kude amun naan hang penah here sa undur, aku puang sagar sanang anri hanye.”

³⁹ Takam yiti puang ulun sa undur nelang tawang. Kabalikanni, takam samula ulun sa parisaya ma Alatalla nelang nasalamat.