EPESUS 3 - KABAR MAEH MA HANYU JANJI WAU

Pagawian Paulus ma ulun puang Yahudi

¹ Yiru sababni aku, hi Paulus, napanjara gana Kristus Yesus ma kaparluan naun sa puang Yahudi.

² Batantu naun haut karengei neu Alatalla, daya pikaeh ateini, haut ngami ma aku tugas yiti ma kaparluan naun.

³ Alatalla nguka rasia ransanani nelang iwara ma aku. (Neu hal yiti hang ambau haut nasuratku anri imbe,

⁴ nelang amun naun mambasani, naun sagar kataru rasia neu Kristus kala aku haut kataru yiru.)

⁵ Dahulu hie rasia yiru puang suah nawara ma murunsia, kude itati Roh Alatalla haut nantarangni ma kawan rasul anri kawan nabini.

⁶ Rasia yiru hanye yiti: Itetei Kabar Maeh yiru, ulun puang Yahudi umba kaingkam kawan berkat Alatalla sa dahulu hie ekat nasadia ma ulun Yahudi. Kawan ulun puang Yahudi haut jari anggota teka isa tenga sa sameh, nelang umba narime inun sa najanji Alatalla itetei Kristus Yesus.

⁷ Alatalla ngami ma aku ahi lelo – hanyeyiru tugas – nampan iwara Kabar Maeh yiru. Aku narime ahi lelo yiru itetei kuasa Alatalla sa bagawi hawuang diriku.

⁸ Hang penah katantuluh ulun wat Alatalla, aku sa panga hina. Kude Alatalla ngami ma aku pangamian yiti: hanyeyiru tugas nampan iwara ma kawan ulun puang Yahudi Kabar Maeh neu katatauen Kristus sa puang sagar galis;

⁹ nelang pada nampan itetei aku katuluh ulun karasa kalaawe Alatalla, ngulah alam semesta yiti, nampalus ransanani sa teka sadi hurap narasia ma dunia.

¹⁰ Bahum Alatalla hanyeyiru nampan itati, itetei ungkup, katantuluh sa negei kuasa hang awan karasa kabijaksanaan Alatalla hawuang ala katantuluh.

¹¹ Alatalla nampalus yiru susuk anri ransanani sa kalalawah, sa natampalusni anri itetei Kristus Yesus Tuhan takam.

¹² Anri parisaya ma Kristus nelang daya ibaya anri hanye, takam naami kabebasan nampan nyanrite Alatalla anri penu kaparisayaan.

¹³ Daya yiru, pilakuanku hanyeyiru: ada naun gaer neu inun sa naaretku daya gana naun, daya katuluhni yiru budas neu ma pikaeh naun.

Sinta Kristus

¹⁴ Daya sabab yiru aku nyudu ulu alep ileku hang hadapan Alatalla Ambah.

¹⁵ Teka hanye tiap kulawaraga hang surga nelang hang ambau tane narime pidasaranni sa hulung.

¹⁶ Aku badoa mudahan Alatalla sa panga mulia hamen nampan ngampi kansing atei naun makai Rohni.

¹⁷ Mudahan daya naun parisaya ma Kristus, Kristus muneng hang wuang atei naun, nelang pamelum naun miandan nelang nakuasa daya sinta.

¹⁸ Aku badoa mudahan sinrah anri katantuluh ulun wat Alatalla, naun kaiyuh nyelem tuu leha bukani anri panjangni nelang ambauni anri lalemni sinta Kristus,

¹⁹ sa makai akal murunsia puang kaiyuh napantaru salalem-lalemni. Mudahan naun kataru sinta Kristus yiru, hampe naun penu anri kapribadian Alatalla sa paruna.

²⁰ Anri kuasa Alatalla sa bahimat bagawi hawuang diri takam, Alatalla kaiyuh nampalus labis wahai teka inun sa tau nalaku atawa napikir takam.

²¹ Wuah Alatalla namulia turun manurun hawuang ungkup, itetei Kristus Yesus. Tawat ma Alatalla palus kalalawahni! Amen.