EPESUS 2 - KABAR MAEH MA HANYU JANJI WAU

Teka pampatei nuju pamelum

¹ Dahulu hie naun matei manyu rohani daya naun badosa nelang malangar kawan parentah Alatalla.

² Hang tawuk yiru naun umba kawan kabiasaan dunia yiti; baarati naun ngalut nuu ma panguasa riwut-barat, hanyeyiru roh sa itati nguasa atei kawan ulun sa puang ngalut nuu ma Alatalla.

³ Dahulu hie takam katuluh sameh pada kala here; takam welum manyu pidasaran murunsia takam nelang nampalus inun sa ngampi sanang tenga anri pikiran takam. Hang tawuk yiru takam uras kawan ulun sa wuah kasangiten Alatalla pada, sameh kala ulun lain.

⁴ Kude tuu leha hanteni pikaeh atei Alatalla! Hanye kala yiru sinta takam,

⁵ hampe hang tawuk takam magun matei manyu rohani daya kawan palangaran takam, hanye nyamelum takam kamulek baya anri Kristus. Jari, ekat daya pikaeh atei Alatalla, naun nasalamat dayani.

⁶ Daya takam ibaya anri Kristus Yesus, Alatalla nyamelum takam kamulek baya hanye, nampan takam marentah pada baya hanye hang wuang surga.

⁷ Alatalla nampalus yiru nampan hang jaman hanrian udi ati, murunsia kaiyuh kadinung tuu leha hanteni sinta Alatalla. Sinta yiru nalalea Alatalla itetei pikaeh ateini ma takam anri itetei Kristus Yesus.

^8-9 Alatalla sinta naun, yiru sababni hanye nyalamat naun daya naun parisaya ma Yesus. Kasalamatan naun yiru puang hasil ngakali naun raerai. Yiru numba lelo Alatalla. Jari, puang sunah erang kaulun sa iyuh sakah neu hal yiru.

¹⁰ Takam samula ulahan Alatalla, anri itetei Kristus Yesus, Alatalla ngulah takam nampan takam nampalus kawan hal sa maeh sa haut nasadiani ma takam.

Isa gana Kristus

¹¹ Kawan pulaksanai sa puang ulun Yahudi! Itung kaadaan naun hang tawuk dahulu hie: Naun naantuh “ulun puang basunat”, daya ulun Yahudi sa mangaku tenga nasunat (nabahumku sa haut kaiyuh siri sa naulah murunsia hang tenga here).

¹² Hang tawuk yiru naun puang ibaya anri Kristus, naun samula ulun asing sa puang tamasuk ulun pidian Alatalla. Naun puang tamasuk hawuang ikatan janji sa naulah Alatalla anri ulun watni. Naun welum hawuang dunia yiti anri puang uweng kaharapen nelang puang uweng Alatalla.

¹³ Kude itati, daya naun haut ibaya anri Kristus Yesus, naun sa dahulu hie lawit, haut nasanrite daya pampatei Kristus.

¹⁴ Daya Kristus raerai samula pandamai takam. Hanye namaya kawan ulun Yahudi anri ulun puang Yahudi jari isa bangsa. Pipik pagar pakai nampisah here, hanyeyiru pipautan, haut nasanenuh daya Kristus anri ngurban dirini raerai.

¹⁵ Hukum agama Yahudi, kawan parentah anri kawan aturanni haut nasamawai daya Kristus nampan rueh bangsa yiru jari isa bangsa murunsia wau, sa mira baya anri hanye. Makai sara yiru Kristus ngulah pikaehan pidamaian.

¹⁶ Daya pampateini hang kayu balasangar Kristus namaya rueh bangsa yiru, nelang nangkaeh here anri Alatalla, hampe pipautan yiru wawai.

¹⁷ Yiru sababni Kristus hawi nampan iwara Kabar Maeh neu pikaehan yiru ma naun; hau ma naun ulun puang Yahudi sa dahulu hie lawit teka Alatalla, hau ma ulun Yahudi sa rite anri Alatalla.

¹⁸ Anri itetei Kristus, takam katuluh-hau ulun Yahudi hau ulun puang Yahudi-daya Roh Alatalla isa yiru, kaiyuh nyanrite Ambah.

¹⁹ Daya yiru, naun puang lagi tamasuk ulun asing atawa ulun luar. Naun itati uras kawan ulun waraga Alatalla. Naun hanyeyiru kawan ulun pidian wat Alatalla.

²⁰ Naun pada nabangun hang ambau piduduk isa naandak daya kawan rasul anri kawan nabi, nelang Kristus Yesus jari watu mambatangni.

²¹ Hanye sa nyusun katuluh bangunan yiru jari Lewu Alatalla sa hulung ma Tuhan.

²² Daya welum ibaya anri Kristus, naun pada rahat nabangun baya kawan ulun lain jari erang kawua lewu ma Alatalla; hang yiru Alatalla muneng anri Rohni.