1 YOHANES 2 - KABAR MAEH MA HANYU JANJI WAU

Kristus pangarawah takam

¹ O kawan anakku! Aku nyurat surat yiti ma naun nampan naun ada ngulah dosa. Kude amun naan sa ngulah dosa, wat takam uweng erang kaulun pangarawahen, hanyeyiru Yesus Kristus sa adil yiru; hanye sagar ilaku ma takam hang hadapan Ambah.

² Itetei Yesus Kristus takam kaiyuh kaampunan teka kawan dosa takam. Puang ekat kawan dosa takam, kude katuluh dosa murunsia.

³ Amun takam ngalut nuu ma katuluh parentah Alatalla, yiru sirini takam kataru Alatalla.

⁴ Ulun sa kaeau, “Aku kataru Alatalla,” kude puang ngalut nuu ma kawan parentahni, ulun yiru mapusu, nelang Alatalla puang uweng hawuang ateini.

⁵ Kude ulun sa ngalut nuu ma lengan Alatalla, ulun yiru sinta ma Alatalla anri paruna. Yiru sirini takam welum baya anri Alatalla.

⁶ Hie sa kaeau hanye welum baya anri Alatalla, hanye harus welum takia ngapung bakas pee Kristus.

Parentah sa wau

⁷ Pulaksanai katuluh sa nasinta! Sa nasuratku yiti puang parentah sa wau. Yiti parentah sa uhang sa haut natahampe ma naun kalemah naun nuku parisaya ma Kristus; hanyeyiru kabar teka Alatalla sa haut rengei naun dahulu hie.

⁸ Kude biar kalayiru, parentah sa nasuratku yiti pada wau; daya kabenaranni iyuh nadinung hang diri Kristus pada hang diri naun. Daya piieng magin wawai nelang piraai sa tuu haut nuku basahaya.

⁹ Ulun sa kaeau hanye naan hawuang piraai kude ulun yiru magun muar ma pulaksanaini, ulun yiru magun naan hang piieng hampe itati.

¹⁰ Ulun sa sinta ma pulaksanaini, welum hawuang piraai hampe puang uweng hang hanye sa tau ngulah hanye badosa.

¹¹ Kude ulun sa muar pulaksanaini, hanye naan hawuang piieng. Hanye takia hawuang piieng, nelang hanye puang karasa maawe hanye tulak, daya piieng yiru ngulah hanye puang tau kadinung.

¹² Aku nyurat ma naun, kawan anak, basa naun haut naampun teka kawan dosa naun daya Kristus.

¹³ Aku nyurat ma naun kawan Ambah, daya naun kataru hanye sa haut naan kalemah teka asalni. Aku nyurat ma naun kawan iya muda, daya naun haut nyantalau hi Jahat.

¹⁴ Aku nyurat ma naun, kawan anak, daya naun kataru Alatalla Ambah. Aku nyurat ma naun kawan Ambah, daya naun kataru kawan lengan Alatalla sa haut naan kalemah teka asalni. Aku nyurat ma naun kawan iya muda, daya naun tingkas. Lengan Alatalla uweng hawuang atei naun, nelang naun haut nyantalau hi Jahat.

¹⁵ Ada sinta ma dunia yiti, atawa inun heneng sa naan hang wuang dunia yiti. Amun naun sinta ma dunia, naun puang sinta ma Ambah.

¹⁶ Alakatantuluh sa naan hawuang dunia yiti – sa nakasinnien daya pidasaran murunsia sa badosa, sa nadinung balalu nakasinnien nelang sa nawawara – alakatantuluh hal yiru puang baasal teka Ambah, malengkan teka dunia.

¹⁷ Dunia anri alakatantuluh sa naan hawuangni sa nakasinnien daya murunsia, sagar wawai. Kude ulun sa ngalut kabahumen Alatalla, tatap welum hampe ma kalalawah.

Musuh Kristus

¹⁸ O kawan anakku, pijumpuhan jaman haut rite! Kapihuanni haut nawara ma naun himat musuh Kristus sagar hawi; nelang itati haut hawi rama ulun sa nawan Kristus. Yiru siri pijumpuhan alam haut rite.

¹⁹ Kawan sa nawan Kristus hanyeyiru kawan ulun sa haut nanan takam, daya here sabujurni puang ulun takam. Amun here kawan ulun takam, himat here tatap baya takam. Kude here nanan takam, nampan bawilah tuu puang uweng sunah erang kaulun teka here sa tuu-tuu tamasuk babuhan takam.

²⁰ Kude naun haut narime Roh Alatalla sa naampinau daya Yesus Kristus, nelang yiru sababni naun kataru ajaran sa bujur.

²¹ Jari aku nyurat yiti ma naun puang daya naun puang kataru ajaran sa bujur, kude likan daya naun haut kataru, nelang naun haut karasa, himat puang ipusu sa naan hawuang ajaran sa bujur yiru.

²² Sa ipusu hanyeyiru ulun sa kaeau Yesus Kristus yiru puang Raja Panyalamat sa haut najanji daya Alatalla. Ulun yiru musuh Kristus; hanye puang mangaku Ambah atawa Anak.

²³ Ulun sa puang mangaku Anak, baarati pada puang narime Ambah. Nelang ulun sa mangaku Anak baarati hanye narime Ambah pada.

²⁴ Daya yiru, kabar sa haut rengei naun kalemah teka naun nuku parisaya harus najaga daya naun mamaeh hawuang atei. Amun kabar yiru napantaru daya naun mamaeh, naun sagar saratang welum baya anri Anak nelang anri Ambah.

²⁵ Nelang yiti sa najanji daya Kristus ma takam, hanyeyiru: welum sajati nelang palus ma kalalawah.

²⁶ Aku nyurat yiti ma naun neu kawan ulun sa rahat ngunu nipu naun.

²⁷ Kude neu naun raerai, Kristus haut ngami Rohni ma naun. Nelang salawah Rohni naan hang naun, puang parlu naan ulun lain sa ngajar naun. Daya Rohni ngajar naun neu alakatantuluh; nelang inun sa naajarni yiru bujur, puang ipusu. Daya yiru ware naun ngalut nuu, ma kawan sa naajar daya Roh yiru, nelang ware naun tatap welum baya anri Kristus.

²⁸ Jadi, o anak-anakku, ware naun tatap welum baya anri Kristus, nampan die hang tawuk hanye hawi, takam nadap hanye anri penu kaheeien nelang puang sanina daya umangan.

²⁹ Naun haut karasa Kristus welum manyu kabahumen Alatalla. Daya yiru naun harus karasa pada tiap ulun sa welum kala manyu kabahumen Alatalla hanyeyiru anak Alatalla.