1 YOHANES 1 - KABAR MAEH MA HANYU JANJI WAU

Lengan isa welum

¹ Isi surat yiti hanyeyiru neu Lengan sa ngami pamelum, hanye yiru firman sa samula haut naan kalemah teka asalni. Kami haut karengei hanye nelang kadinung hanye makai mete kami raerai. Kami haut maneneng hanye nelang negei hanye makai tangan kami.

² Tawuk pamelum yiru nelalea, kami kadinung hanye. Yiru sababni kami ngami kasaksian neu hanye. Kami iwara ma naun neu pamelum sa sajati nelang ma kalalawah, sa naan baya Ambah, nelang sa haut nalalea ma kami.

³ Inun sa haut dinung kami nelang rengei kami, yiru pada sa nawara kami ma naun, nampan naun sinrah kami umba kaingkam welum ibaya anri Ambah nelang anri Anakni Yesus Kristus.

⁴ Kami nyurat yiti nampan atei takam tuu-tuu arai mehewu.

Alatalla hanyeyiru piraai

⁵ Kabar sa haut rengei kami teka Anakni nelang sa natahampe kami ma naun hanye yiti: Alatalla yiru piraai nelang hang hanye budas puang uweng piieng.

⁶ Amun takam kaeau takam welum ibaya anri hanye, padahal takam welum hawuang piieng, takam ipusu, hau anri papaneran atawa anri ulah gawi.

⁷ Kude amun takam welum hawuang piraai kala Alatalla naan hawuang piraai, himat takam welum rantep, ruhui rahayu isa anri sa lain, nelang ira Yesus Kristus, Anakni, ngabarasis takam teka panan dosa takam.

⁸ Amun takam kaeau takam puang badosa, takam nipu diri takam raerai; Alatalla puang muneng hawuang atei takam.

⁹ Kude amun takam mangaku kawan dosa takam ma Alatalla, hanye sagar nampalus janjini palus ngulah inun sa adil. Hanye sagar ngampun takam teka kawan dosa takam nelang ngabarasis takam teka panan kahalaen takam.

¹⁰ Kude amun takam kaeau himat takam puang badosa, takam nganggap Alatalla yiru ipusu nelang takam puang nyimuh lengan Alatalla yiru hawuang atei takam.