1 TIMOTIUS 3 - KABAR MAEH MA HANYU JANJI WAU

Pamimpin ungkup

¹ Bujur tuu lengan yiti, “Ulun sa hamen jari pamimpin ungkup, hanye sindi isa pagawian sa tuu baharaga.”

² Erang kaulun pamimpin ungkup patut erang kaulun sa puang uweng nawada, matueh waweini ekat isa, kaiyuh nahan diri, sabar, bijaksana, tartip, hanye arai narime ulun hang lewuni, nelang tau ngajar ulun;

³ ada ulun pamahamui, atawa ulun gaha babur. Kabalikanni hanye harus lamah liut nelang katuju damai. Hanye puang mata duitan.

⁴ Hanye harus tau ngatur lewu reanni arni maeh, nelang ngajar kawan anakni ngalut nuu nelang hormat ma hanye.

⁵ Daya amun ulun puang tau ngatur lewu reanni raerai, kalaawe wangun hanye kaiyuh ngatur ungkup Alatalla?

⁶ Erang kaulun pamimpin ungkup puang iyuh ulun sa wau jari Kristen, daya die hanye jari sakah balalu tasapa kala Iblis dahulu sadi.

⁷ Hanye harus erang kaulun sa ngaranni maeh hawuang masyarakat; daya amun puang kalayiru, himat hanye sagar nawawarah ulun, balalu lawu mawuang jabak Iblis.

Palayan ungkup

⁸ Palayan ungkup patut pada erang kaulun sa maeh nelang jujur; puang mata duitan nelang puang hamen nguut anggur kajut hene.

⁹ Here harus itegei mansing hang ajaran kaparisayaan Kristen sa haut nalalea daya Alatalla makai atei kunuan sa maeh.

¹⁰ Ware here nauji dahulu, nelang amun bawilah here puang uweng wadaanni, wau here iyuh malayanni ungkup.

¹¹ Matueh wawei here pada harus erang kaulun sa maeh, puang ulun sa katuju ngulah paner. Here harus tau nahan diri nelang jujur hawuang ala katantuluh.

¹² Palayan ungkup harus ekat naan erang kaulun matueh wawei. Hanye harus tau ngatur kawan anakni pada lewu reanni anri maeh.

¹³ Kawan ulun sa malayanni anri maeh hawuang ungkup, sagar nahormat nelang magin heei bapaner neu kaparisayaan here ma Kristus.

Rahasia agama takam

¹⁴ Aku harap puang lawah lagi aku sagar nunung hanyu. Kude biar kalayiru, aku pada nulis surat yiti ma hanyu,

¹⁵ nampan amun aku unte hawi, hanyu haut karasa kewangun takam harus welum yalah kaluarga Alatalla, hanyeyiru ungkup Alatalla sa welum. Ungkup yiti sa jari ari panangkur nelang panyangga ajaran sa bujur teka Alatalla.

¹⁶ Puang uweng sunah erang kaulun sa kaiyuh nawan kalaawe hanteni rahasia agama takam: Hanye nantarang tenga hawuang wangun murunsia, nelang nakaku bujur daya Roh Alatalla, nelang nadinung daya kawan malekat. Kabar neu yiru nawara ma penah kawan bangsa, nelang hanye naparisaya hang litar dunia nelang naenat ma surga.