1 KORINTUS 8 - KABAR MAEH MA HANYU JANJI WAU

Neu kutaen sa nasarah jari parapah ma barhala

¹ Itati neu kutaen sa nasarah jari parapah ma barhala. Samula bujur kala eau ulun, “Takam katuluhni haut pandai.” Kude kapandaien yiru ngulah ulun jari sakah, kude ahi lelo mambangun pribadi ulun.

² Ulun sa minda hanye wahai pangarasaen, sabujurni pangaraenni huan hampe lalem.

³ Kude ulun sa tuu-tuu sinta Alatalla, hanye tena taru Alatalla.

⁴ Neu hal nguta kutaen sa haut nasarah ma barhala, takam karasa, sa barhala yiru sabujurni puang uweng. Nelang takam karasa pada Alatalla ekat isa; puang uweng Alatalla lain.

⁵ Samula wahai pada inun sa naantuh alah atawa tuhan; hau sa naan hang langit atawa sa hang ambau tane.

⁶ Kude ma takam, Alatalla ekat isa. Hanye ambah sa nyanyari ala katantuluh. Takam welum ma hanye. Nelang Tuhan ekat isa pada, hanyeyiru Yesus Kristus. Itetei hanye ala katantuluh nasanyari, nelang daya gana hanye takam kaiyuh welum.

⁷ Biar kalayiru, puang katuluh ulun karasa neu hal yiru. Naan sa dahuluni nyambah barhala. Balalu, daya yiru here hampe itati pada pagun kaingkam kawan kutaen, sa haut nasarah ma barhala, samula ma kutaen barhala. Jari amun here nguta kutaen yiru, here kaingkam badosa; daya kaharapen here huan mansing.

⁸ Sabujurni kutaen yiru puang ngulah hubungan takam anri Alatalla batambah rantep. Amun takam nguta kutaen yiru, takam puang kaiyuh kauntungan inun heneng. Kabalikanni pada amun takam puang nguta kutaen yiru, takam sika puang rugi.

⁹ Kude, ware naun hati-hati! Ada hampe ngulah kawan ulun lain jari badosa-daya kaharapenni huan mansing daya gana naun bebas ngulah inun heneng.

¹⁰ Sa nabahumku hanyeyiru: Amun naun, sa naan kaharapen sa mansing, rahat maharung ikuta hang lewu barhala. Udiyiru naan ulun sa kadinung naun maharung ikuta hang yiru. Amun kaharapen ulun yiru puang mansing, angneh yiru sagar ngulah ulun yiru heei nguta kutaen sa nasarah ma barhala yiru?

¹¹ Nelang daya yiru, kaharapen naun yiru ngulah ulun sa kaharapenni puang mansing yiru balalu tawang. Padahal Kristus matei pada ma ulun yiru.

¹² Nelang amun naun ngulah kahalaen kalayiru ma kawan pulaksanai sa Kristen-hanyeyiru naun nanrusak kaharapen here sa maleme-balalu naun badosa ma Kristus.

¹³ Yiru sababni, amun kutaen ngulah pulaksanaiku badosa, himat aku puang budas sagar nguta daging lagi. Daya takut pulaksanaiku badosa daya gana aku.