Yihokora 1 - Testamende Ghomupya Nopisalemi 1986

Yihokora yaJohannesi yomurukwaro runo

¹ Murukwaro runo, mwapwa kutjanga yihokora yi gha wanine Jesus Kristusi kwaNyambi thinda, no gha yi tu nongwenenine. Kemo gha himine kuneghedha kwawapika Nyambi, eyi sho yi kone kuhokoka pawangu‐wangu. Kristusi gha tumine muengeli wendi kwaJohannesi, gha mu dimukithe yithithatero yino.

² Johannesi ne gha nongononine n̂ando dhaNyambi, no manongweneno ghaJesus Kristusi kuyoyiheya eyi gha monine.

³ Mukaruvigha oyu ghana kutoya no kuyuva man̂ando ghano ghoyipumba, no kukunga eyi ha tjanga mo. Yoyishi nako ne pepi dhidi.

Dirumeritho dyaJohannesi kumambunga kwoko nomawadi ghomuAsiya

⁴ Johannesi ghana kutjangera kumambunga kwoko nomawadi ghomuAsiya: Thin̂eke no thiraro yaNyambi kukwenu. Oyu gha kara noyu gha karire noyu mbo gheya. No karo kwawamipepo kwoko nodhiwadi, edhi dhemana kughutho ghodipuna dyendi,

⁵ naJesus Kristusi ghokanonga komakurupero. Oyu ha tangire kushamuruka karo pakatji kwafu wahe. Mukakupiterera hafu wahe hopakaye. No kukwetu twe gha haka Kristusi oyu gha tu ndendehsherire manyinga ghendi, pakutushutura kumaharwero ghetu.

⁶ No gha tu tendire twanduna mughufumu wendi no twapristeri waNyambi Wihe. KuKwendi dikuto nongcamu, kuroruhe nororuheya.

⁷ Mu mone, nomavuyi ghana kwiya, no kehe diko dina kumumona ngambi wa ha mu shosherire. No mako ghomahe ghopakaye mbo ghana diri no kukudhekera. Yashemwa, kemo sho yi kare.

⁸ Yame matangero nomahurero, dyo ghana kughamba Fumu, oyu gha kara noyu gha karire noyu mbo gheya, mukangcamu dhodhihe.

Jesusi ghana kukuhokora kwaJohannesi muPatmosi

⁹ Yame Johannesi ghomuyendhenu, oyu gha kununga naKristusi yira yamwe. Yo na karera mumathimbameno yira yamwe. Ho na kukon̂otwedha pofotji nenu no mbona tungu nenu mukaye kokapya kaNyambi. Na pwire kuyevura no na kara muthirudhi ethi ha toya eshi, Patmosi, payitenda yange yopan̂ando dhaNyambi edhi na nongononine eshi, ghushemwa waKristusi ghu kone kuhokoka.

¹⁰ Na karire mwaMupepo waNyambi mudiyuwa dyaFumu. Ko kuyuva kunyima dhange diywi dyodikuru, dyokwanduka yira torombita.

¹¹ Diwyi dina kuninga eshi: “Yame matangero no mahurero. No ghu tjange eyi ghuna kumona murukwaro. Ho yi tume kumambunga kwoko nomawadi ghomuAsiya eshi: KwawakaEfesusi, nawakaSimirna, nawakaPergamumu, nawakaTiyatira, nawakaSardisi, nawakaFiladelfiya nawakaLaghodisiya.”

¹² Ko kuthetuka kwange ni mone eshi, yidye ghana kughamba nange. Oku shime na thetukera, ko kumona kwange yikuro yomashero kwoko noyiwadi yomangondo.

¹³ Pakatji kayo ghemanine ghumweya yira Mwana munu. Gha vatire thikoverero thothire, ethi gha ghangire mumuyidi noghufa ghomangondo.

¹⁴ Huki dhopamutwi wendi ne dhikenu yira difuno no yira makerekeshe. Meho ghendi ne yira maretha ghomudiro.

¹⁵ Mapadhi ghendi ne kurwedhima yira thikuvo thokutwedhima mudidhiko. Diywi dyendi ne yira meyu ghokupoposha mudipenga.

¹⁶ Munyara dhendi dhorudyo ghana kwaterera manungwedhi kwoko nomawadi. No mukanwa kendi muna shwagha dimende dyoditwe. Rupara rwendi yira diyuwa dyokusheghenya.

¹⁷ Pakumumona kwange ha ni wera kumapadhi ghendi yira mufu. Ko kunikambeka nyara dhendi no gha ningire kukwange eshi: “Wa yapa! Yame matangero nomahurero.

¹⁸ Nomukamoyo, na fire no mone eshi, kupara na kupara kate kuroruheya. No na kara nomatjapi ghawafu noghokufa.

¹⁹ Tjange yinu yi wa mona, eyi yina kara po no yi mbo yi kara.

²⁰ Kumona ghuna kumona manungwedhi kwoko nomawadi, murudyo rwange noyikuro kwoko noyiwadi yomangondo. Ame na kukuyuvitha tango eshi, nye ya ninga yi. Manungwedhi kwoko nomawadi, gha ninga eshi, haengeli nomambunga kwoko nomawadi. Yikuro ne ghomambunga ghothinda kwoko nomawadi.”