Titusi 3 - Testamende Ghomupya Nopisalemi 1986

Yikara yoghukriste

¹ Vurukithe hanu ghudhundeka eshi, ha kone kutawa kwawakuru no kumuragho, ha kone kukara ghutawedhi no ha kwinduke mu kutawa yoyihe yoyihunga.

² Awo ha pire ghughandhi kwaghumweya no ha pire marwanamvo. Ha kone kukara hanongo, gho ha ghayare kehe pano kwawahe.

³ Pakutanga twa karire twathuta natwe, twathururu, twa pemukire, twa karire twapika hoyirumbera yonyara-nyara, munyinya twa parire munya, ha tu dhimbire no twa kudhimbire.

⁴ Ene munyima ho weyire ghuhunga waNyambi ghoMushuturi wetu, noruhakitho rwendi rwa hokokire kwawanu.

⁵ Aye gha tu shuturire, ene kadi payitenda yetu yoyihunga, ne pamurandu ghothin̂eke thendi thinda. Eyi gha yitenderire yi, pamushamurukero ghoghuwadi ghomakushwero ghomaharwero, no paMupepo ghoKupongoka yu gha tapa moyo ghoghupya.

⁶ Nyambi gha mu tapathanithire Mupepo ghoKupongoka, pakumutushuruthera paJesus Kristusi ghoMushuturi wetu.

⁷ Kemo dyo twapwa kuhungeka pan̂eke dhendi no gha tu yaritha moyo ghororuheya oghu twa taterera.

⁸ Edhi no ne n̂ando dhoghushemwa. Yodigho na kuhima me eshi, ghu kone kudhundeka thikuma pakunongonona yinu yino. Eshi awa ha piruka kwaNyambi, ha kone kukon̂omeka muyitenda yoyiwa no yomudyo yokwawanu.

⁹ Ene wa kupaka muman̂anani ghawathuta no mumarukwaro ghomashimurukero no muyita, no mun̂anani dhokumuragho, yoyishi, eyi ne yapira mudyo no yafwe‐fwere.

¹⁰ Noyu wa koghaghura paruwadi, ngambi yu ghana kureta shime makutavaghaneno, mbadi wa kona kukwata ko.

¹¹ Yoyi wa dimuka eshi munu ghokemo, gha pemuka mundhira. Pamaharwero ghendi ghana kukutetera thinda ndhango.

Yirughana yimweya nomarumeritho

¹² Apa na kukutumena Atermasi ngambi Tigikusi, wa kuyereke kwiya kuno kukwange muNikopolisi. Yoyishi na himi kuna kara ko muthivaka thokufu.

¹³ Tokomene thirughana thoye thokwaSenasi ghomukamuragho, naApolosi eshi, ghu wa ghamwene muruyendo rwawo rokughutho, ho koneke thiwana eshi mbadi ha kona kupira thinu.

¹⁴ Mu honge karo hayendhetu ha kare nawo muyirughana yoyiwa, no ha wa ghamwene oku hadi muyinyanda yawo yoshemwa. Munyima yipara yawo, po mbo yikara mughuyeghave.

¹⁵ Waheya wa hadi nange kuno hana kutumena dirumeritho. Tape karo dirumeritho dyetu kwawayendhetu mumatawero. N̂eke dhi kare nenu mwahe!