Titusi 1 - Testamende Ghomupya Nopisalemi 1986

Mbapira kwaTitusi

¹ Edhi dhina kutunda kwaPaghulusi ghomukareri waNyambi, nomupostoli waKristus Jesusi. Ame na tambura thirughana thokutwara awa gha torora Nyambi kumatawero, no kuwadimukitha ghushemwa. Ghushemwa ghu, ghokutwara kughukareri waNyambi,

² no kutapa makurupero ghokumoyo ghororuheya. Nyambi yi gha ghamba n̂ando dhendi dhoghushemwa, gha tu toyedhera kare moyo ghororuheya.

³ Pano gha dhi hokora panako dhokurikanya edhi na yuvitha muyiyaghura. Ethi ne thothirughana thange thi gha nipa Nyambi wetu ghoMushuturi.

⁴ KwaTitusi ghomwanange ghomuhakwa, mumatawero gha twa nongonona twahe. N̂eke nothiraro thaNyambi no thaKristus Jesusi ghoMushuturi wetu thi kare noye.

Thirughana thaTitusi muKreta

⁵ Eyi na kuthigherire muKreta, noyihima yino eshi, ghuroghithe yoyiheya yi yathighara ko no yende ku kehe mbara, ghu ka pake mo hakungi hombunga thika di na yi kurawera.

⁶ Mukungi gha kare katughuru ghoyikara mwene. Gha tjimape kwamukamadi wendi. Hanendi ha kare hatawi no mbadi ha kona kuwana dina dyoyipara yodishawana, no kadi wa kwiman̂anyena muragho.

⁷ Mukungi ne muyendithi ghoyikara yomundhugho dhaNyambi. Yodigho, aye mbadi gha kona kukara munu ghothidakwi, endi mukamarwanamvo ngambi mushani ghoshosho dhodhiyi.

⁸ Aye gha kone kukara mundambo wawagenda no mukakuhima yoyihunga, gha kare munu ghomaghano, muhungami, gha pongoke no gha kwate mutjima wendi.

⁹ Aye gha tanare kuman̂ando ghomakurupero, agha ha mu honga. Munyima po mbo gha kona naye kutjokedha hamweya kuyihonga yoghushemwa no kukanunutha n̂anani dhawakan̂ore.

¹⁰ Padi hengi, thikuma ne pakatji kawapiruki awa ha shwagha mudiko dyaWajuda, awa heman̂anyena muragho nawa ha ghambanga yinu yokupira mudyo no kupemukitha hanu.

¹¹ Tunwa twawo tupwe kuvuka. Awo ha reta thivunganyi pamadhiko ghomahe, payihonga yawo yombango, mukupira honyi eshi ha wanene po manyinga.

¹² Yofotji ghopapawo muporofeta wawo hathinda gha ningire eshi: “Hakreta ne hakambango, hayishereka no hava.”

¹³ Ghushupi ghuno ne wa ghushemwa. Yodigho, wa kona kuwathundawedha thikuma, eshi nawo ha kone kuwana matawero ghoshemwa.

¹⁴ Awo ha kone kuthigha ndani mbango dhaWajuda nomiragho dhawanu wa ha pemuka ghushemwa.

¹⁵ Kwawakushuki ne yoyiheya yakushuka. Ene kwawashinyi nawakakupira matawero, mbadi ya kushuka. Yoyishi makurembwerero ghawo ne gha shinyiha.

¹⁶ Karo ha kununeka eshi ha dimuka Nyambi, ene ha mu kanana muyitenda yawo. Awo ne hayi kadi wa kuyuva, no mbadi ha kona kutenda yoyiwa.