Mateghusi 5 - Testamende Ghomupya Nopisalemi 1986

Yiyaghura yomudirundu

¹ Apa gha monine Jesusi mbunga dhawanu, ko kudhina kwendi kudirundu. Pakuhungumana, heyire hakathishongero wendi kukwendi,

² no gha tangire kuwahonga.

Hakaruvigha roshemwa

³ “Hakaruvigha awa ha kudimuka eshi hahepwe kughutho waNyambi, yoyishi wawo ghufumu ghodiwiru.

⁴ Hakaruvigha hakakutokota, yoyi mbana wa hengaghura.

⁵ Hakaruvigha haturumuki, yoyi mbana wana ditunga edi ha wa turekera.

⁶ Hakaruvigha hakakufa ndhara nodinota mughuhunga wawo, yoyi mbana wekutitha.

⁷ Hakaruvigha hakathin̂eke, yoyi mbo hana wa neghedha thin̂eke.

⁸ Hakaruvigha awa ha kushuka mumutjima, yoyi mbo hana mono Nyambi.

⁹ Hakaruvigha hakakutenda thiraro, yoyi mbo hana wa toyo hana Nyambi.

¹⁰ Hakaruvigha awa ha mona rupetho payitenda yawo yoyihunga, yoyishi wawo ghufumu ghodirwiru.

¹¹ “Mwakaruvigha mwe ngeshi hana kumushamuna no kumukutha‐kutha no kumurundera yoyimango muDina dyange.

¹² Mu shamberere no mu shogherere, yoyishi ghushwi wenu ghomudiwiru ne ghukuru, no karo kemo dyo ha pethire haporofeta awa ha karire kughutho wenu.”

Mungwa ghomuve nomunyenge ghokaye

¹³ “Amwe ne mwamungwa ghomuve, ene ngeshi ghuna hamupa mungwa ne no nye sho gha ghu tove munu, ghu kare karo mungwa mwene? Ghumango vene keho. Hasha kughumwaghera panunda, ha ghu djata‐djate hanu.

¹⁴ “Yamwe mwamunyenge ghokaye. Mbara kadi dha kukona kundeka, ngeshi ku dha tenama padirundu.

¹⁵ Karo munu kadi wa kumuneka munyenge no kughufurumeka thinu, ghuhunga ne peghuru ndani no ghu munekere wahe awa ha di mundhugho.

¹⁶ Mu muneke munyenge wenu kemo kwawanu, eshi ha kone kumona yirughana yenu yoyiwa no ha fumaneke Wihenu ghomudiwiru.

Mayarithero ghomuragho

¹⁷ “Mwa ghayara eshi neyire kukushutura muragho ngambi haporofera. Mbadi neyire kukushutura, ene kukurikanyitha yoyiheya.

¹⁸ Ghushemwa na kumutongwera yi: Diwiru nomuve mbo yina pu, kumuragho wa Nyambi ne mbadi mbo ka tunda ko nokamyandhu‐myandhu temba oku mbadi na rikanyitha yoyiheya me.

¹⁹ “Oyu ghokushutura kumuragho ngambi kambiru‐mbiru nokuhonga kemo hanu, mbo ghana piri dikuto mughufumu ghodiwiru.

²⁰ Yoyi na kumutongwera eshi: Ngeshi mbadi sho ghu piterere ghuhunga wenu kughuhunga wawakamarukwaro nowa Wafarasayi, ngo mbo mu kufere eshi kwingena mughufumu ghodiwiru.

Mayarithero ghomuragho: makushemwethaneno

²¹ “Mwa yuva edi ya ghamba kwawakuru eshi: ‘Wa pagha; no kehe mukakupagha mbana mu twara kundhango.’

²² Ene na kumutongwera eshi: Keheyu ghokupatera muyendhendi, gha pwa kutetera kare ndhango. Karo kehe yu ghokumangopitha muyendhendi kumandengure, ghana kupwa kutetera kundhango dhishokuru. Noyu ghokushwahura muyendhendi eshi ghodibotwa, ghana kupwa kutetera mudirara dyo mudiro.

²³ “No ku ghuna twara ndupu dhoye kualtare, munyima ghuna kuvuruka eshi thinu pakatji koye namuyendhoye,

²⁴ thi thighe tango popo paaltare no ghu yende tango ghu ka tende thiraro namuyendhoye, po sho ka huke na ghu tupure thitapa thoye.

²⁵ “Ngeshi ku ghuna tendi murandu kwamuyendhoye, ghu kwinduke wangu kukuyuva namuyendhoye oku shime mwa karera mundhira dhokundhango. Maghana sho gha kutware kwamupanguri, namupanguri sho gha kutape kwawamaporitha, nawo maghana sho ha kupake mutorongo.

²⁶ Shemwa na kukutongwera: Mbadi wa kona kushwagha mo oku mbadi ghuma mana kuruwera kasende kohura.

Mayarithero ghomuragho: Rungu

²⁷ “Mwa yuva edi ha ninga eshi: ‘Mbadi wa kona kutjora mayekero.’

²⁸ Ene me na kumutongwera eshi: Kehe yu ghokukengurura mukamadi nokumurumbera, ghana tjoro mayekero nendi mumutjima wendi.

²⁹ “Ngeshi ha di kutemaghuritha diho dyoye dyorudyo, di korongoremo no ghu di tundithe papoye ghu di mwaghe. Yoyishi hasha papoye kutunda po thipo thofotji, kadi yira wa kumwaghera yirama yoyiheya mudirara.

³⁰ Endi ngeshi ha di kuharuritha dyoko dyoye dyorudyo, di tete ko no ghu di mwaghe. Yoyishi hasha kukoye ngeshi ha thi tundu po thipo thofotji kuyirama yoye, kadi yira wa kuyimwagherera mudirara.

Mayarithero ghomuragho: Matjorero ghomayekero

³¹ “Apa ya ninga eshi: ‘Kehe yu ghana kuyakunuka kwamunu wendi, gha mu pe ndani mbapira dhomakuyakunukero.’

³² Ene na kumutongwera eshi: Yomuhe ghokukuyakunuka namunu wendi, pamurandu ghoruhonda, ghana tjoro mayekero. Noyu ghokukuyeka namukamadi ghokukuyakunuka naghumweya, ghana tjoro naye mayekero.

Mayarithero ghomuragho: Medhero

³³ “Shime mwa yuva karo kwawakuru di ha ninga eshi: ‘Mbadi wa kona kwedha mbango, no yi wedha kwaFumu, ghu kone kuyikutha.’

³⁴ Ne, na kumutongwera eshi: Perere poye eshi wedhe, nokudiwiru temba, yoyishi dyodipuna dyaNyambi.

³⁵ Nokumuve temba, yoyishi dyodimbaro dyendi. NokuJerusalema temba, yoyishi dhombara dhaFumu shokuru.

³⁶ Karo perere poye eshi wedhe kumutwi ghoye, yoyishi mbadi wa kona kutenda kahuki kofotji ka kare kakenu ngambi keru.

³⁷ Ngo mu tawe vene eshi kemo ngambi kadi kemo. Yoyishi wingi wayo yi, mughuyi yina kushwagha.

Mayarithero ghomuragho: Yikuhuthangedhera

³⁸ “Mwa yuva edi ya ninga eshi: ‘Diho kudiho, diyegho kudiyegho.’

³⁹ Ene na kumutongwera eshi: Mwa kon̂omeka munu ghomupata. Ngeshi ha kungcambura ghumweya kuditama dyorudyo, mu pirwere karo ditama dimweya.

⁴⁰ No ngeshi ghumweya ha shana kukutwara kundhango, no ghana shana kukuhurura thokwishi, mu pe karo thopeghuru.

⁴¹ No karo ghumweya ha kuthineneka eshi, ghu mu shimbere thinu thendi kilometeri yofotji, thi mu shimbere we makilometeri mawadi.

⁴² Mu pe yu ghana kukukumbera thinu, no wa yumena mukakukuyadhima.

Mayarithero ghomuragho: Ruhakitho rokwamunyathi

⁴³ “Shime mwa yuva ya ninga eshi: ‘Hake muyendhoye no ghu dhimbe n̂ore dhoye.’

⁴⁴ Ame ne na kumutongwera eshi: Mu hake han̂ore dhenu, no mu raperere hakakumukutha‐kutha.

⁴⁵ Kemo sho mu kare hana Wihenu ghomudiwiru. Aye gha sheghenyithera diyuwa dyendi kwawamango nokwawahunga. No gha rokitha mvura wendi kwawakakutenda ghuwa nokwawakakwipitha.

⁴⁶ Yoyishi ngeshi ha mu haka keho wa ha mu haka ne, yiruwera munye sho mu wane po? Mbadi hana tendanga haketethi nawo kemo ndi?

⁴⁷ Endi ngeshi ha mu rumeritha hayendhenu keko, nye muna kutenda yokupiterera hamweya? Mbadi hana kutenda hahayidena nawo kemo ndi?

⁴⁸ “Mu kare mwahunga thika di gha hungama Wihenu ghomudiwiru.”