Mateghusi 25 - Testamende Ghomupya Nopisalemi 1986

Yinu yoyipumba: Maghanekero ghawakamadighana dikumi

¹ “Ghufumu ghodiwiru, ndani mbo ghu kara yira hakamadighana wa ha tumburire maramba ghawo ha ka taterere mwenga.

² Hakwoko mbadi ha karire nomaghano, nokwoko ha karire nomaghano.

³ Hayero ha shimbire maramba ghawo, ene mbadi ha shimbire nomaghori.

⁴ Oku hanya‐nyami hana shimbi maramba ghawo nomaghori pambadi.

⁵ Oku shime mukawenga ko kayenda gha di, ko kukotha kwawo no kupothomokera muturo.

⁶ “No pakatji koghuthiku, gha karire methero eshi: ‘Mwenga yu ghana kwiya! Mu mu tjingawere!’

⁷ Ko kupinduka hakamadighana wahe no kuroghitha maramba ghawo.

⁸ Hayero ha ningi kwawanya‐nyami eshi: ‘Mu tu peko maghori ghenu, yoyishi kuna kudhimana maramba ghetu.’

⁹ Ene hanya‐nyami ha huthire eshi: ‘Ava ko, mbadi ghana rikanya kukwetu no kukwenu. Mu yende vene kuthitora mukakughurere maghori.’

¹⁰ “Oku shime ha yendera hayero kukughura maghori, ko kuna kuma mwenga. Awa ha roghithire ghawo, hengenine pofotji namwenga kumukandi no kutjapera thero.

¹¹ “Munyima heyire hakamadighana hamweya witha eshi: ‘Mukadikuto, mukadikuto, tu yandhwerere!’

¹² Ene mwenga gha huthire eshi: ‘Na kumutongwera eshi: Mbadi na mu dimuka!’

¹³ “Mu rawe ne, yoyishi mbadi mwa dimuka diyuwa nonako, edhi mbo yi hokoka yi.

Yinu yoyipumba: Maghanekero ghomanyinga

¹⁴ “Shime ya kara karo yira kwamurume yu, ghana kushana kuyenda muruyendo. Ha kongwedha kwendi hapikendi pofotji no kuwatapera ghugavo wendi.

¹⁵ Kwayofotji gha mu pire manyinga kwoko ghomangondo, ghoghuwadi gha mu pire mawadi noghoghuhatu gha mu pire dyofotji. Aye gha tapire kwa kehe yu popamaghano ghendi, ko kuyenda kwendi muruyendo.

¹⁶ “Oyu gha tamburire manyinga kwoko ghomangondo, gha tangire wangu popo kugharughanitha, ha wanena po karo makwoko.

¹⁷ Kemo karo noyu gha wanine mawadi: gha wanenine po karo mawadi.

¹⁸ Ene mupika yu gha wanine dinyinga dyofotji, gha kumbire dikumbo mumuve, no gha horekire mo manyinga ghahekudyendi.

¹⁹ “Munyima dhonako dhodhire, ha ka huka hekudya wawapika wa no gha tendire paro nawo.

²⁰ Oyu gha tamburire manyinga kwoko ghomangondo, gheyire no gha retire karo kwoko ghamweya ghuninga eshi: ‘Mukadikuto, manyinga kwoko ghomangondo wa ni pire, gha mweya karo kwoko ghano gha na wanena po.’

²¹ Ko kuninga hekudyendi kukwendi eshi: ‘Yiwa kemo, mupika ghomuhunga noghomatjimapero. Koyoyimbiru wa tjimapire, no na kukutumba koyoyingi. Wiye muyishamberera yange.’

²² “Ko kwiya ghumweya ghomanyinga mawadi ghomangondo eshi: ‘Mukadikuto, manyinga mawadi ghomangondo wa ni pire. Agha no, nomawadi gha na wanena po.’

²³ Hekudyendi gha mu tongwerire eshi: ‘Yiwa kemo, owe ne ghomuhunga nomupika ghomatjimapero. Koyoyipu wa tjimapire, ho na kukutumba koyoyingi. Wiye muyishamberera yange.’

²⁴ “Munyima gheyire yu gha wanine dinyinga dyofotji dyomangondo ghuninga eshi: ‘Mukadikuto, na kudimuka eshi we ne ghomurume ghomukukutu, oyu ghana kukesha eyi wa dhira kukuna, no kukokora eyi wa dhira kutapeka.

²⁵ Yoyishi na yapire yo na ka vumbekerire dinyinga dyoye mumuve. Dinyinga dyoye ne dino na ka hutha.’

²⁶ “Hekudyendi gha mu tongwerire eshi: ‘Ghothimango! Ghothiva we! Owe ne wa dimukire eshi, ame ne kukesha yi na dhira kukuna no kukokora yi na dira kutapeka?

²⁷ Ngo wa twarire manyinga ghange kubanga, pakuhuka kwange, ngo na wanena po yiwedherera.

²⁸ Mu mu kungure dinyinga no mu tape koyu gha di nodikumi.

²⁹ Yoyishi kwayomuhe ghokuwana, mbana yi mu vurithera no mbo ghana wana kamwagha‐mwaghe. Ene yu gha pira, mbana mu kungura ghumbiru ghu gha di nagho.

³⁰ No mu vukumene mupika ghokupira thighamwena mudikokore dyodidhungi panunda. Ko sho ha ka dire nomahumangayegho.’

Yinu yoyipumba: Ndhango dhoghuhura

³¹ “Apa mbo gheya Mwanamunu mughufumu wendi, nawaengeli wendi wahe, mbo ghana hungumana padipuna dyoghufumu wendi.

³² Mako ghomaheya, mbana gha kongwedha kughutho wendi, no mbo ghana yakunutha hanu, thika di ghana kuyakunutha mukakuditha ndjwi kun̂ombo.

³³ Ndjwi mbo ghana dhimeka kurudyo, non̂ombo ne kurumoho.

³⁴ “Po mbo gha ninga Fumu, kwawakakwimana kurudyo rwendi eshi: ‘Mwiye mwe gha kandadheka Tate! Mu tumbure ghutungi yira yiyora. Eyi ne yapwa kumuroghithera kutunda kumatangero ghokaye.

³⁵ Yoyishi na fire ndhara, amwe ne mwa ni pire thokudya. Na fire dinota, amwe ne mwa ni pire thokunwa. Na karire mugenda, amwe ne mwa ni pire maturo.

³⁶ Na fire wira, amwe ne mwa ni vatekire. Na korwire, amwe ne mwa ni korwithire. Mudorongo na karire, amwe ne mwa ni dhingurire.’

³⁷ “Munyima mbana mwipura wa hatendire mahimeno ghaNyambi eshi: ‘Fumu, kupi twa kumonine nondhara, ho twa kukorerire, ngambi ku ghuna fu dinota, ho twa kupire thokunwa?

³⁸ No kupi twa kumonine mughugenda, ho twa kupire maturo, ngambi muwira ho twa kuvatekire?

³⁹ Kupi twa kumonine muyikorwa ngambi mudorongo ho twa kudhingurire?’

⁴⁰ Ndani po mbo gha wa hutha Fumu eshi: ‘Shemwa na kumutongwera: Thika di mwa yi tendire kwayofotji ghopawaminange wano, kukwange mwa yi tendire!’

⁴¹ “Fumu mbo ghana ningi kwawakarumoho rwendi eshi: ‘Mu finyaghuke, mu tunde kukwange, mwakathikuto! Mu yende kumudiro ghororuheya, oghu gha kuroghithera Shatani nawaengeli wendi!

⁴² Yoyishi na fire ndhara, ene mbadi mwa ni pire thokudya. Na fire dinota, ene mbadi mwa ni pire thokunwa.

⁴³ Na karire mughungenda, mbadi mwa ni pire maturo. Na fire wira, mbadi mwa ni vatekire. Na korwire no na karire mudorongo, mbadi mwa ni rekurire.’

⁴⁴ “Awo ne mbana hutha eshi: ‘Fumu, kupi twa kumonine nondhara, ngambi nodinota, ngambi mughugenda, ngambi muwira, ngambi muyikorwa, ngambi mudorongo, ho twa shwenine kukughamwena?’

⁴⁵ Aye mbo ghana wa hutha eshi: ‘Thika di mwa dhirire kuyitenda kwayofotji ghopawange wano, no kukwange temba mbadi mwa yi tendire.’

⁴⁶ Hanu wa mbana wana mahumbithero ghororuheya. Ene wa ha tendire mahimeno ghaNyambi ne moyo ghororuheya.”