Lukasi 1 - Testamende Ghomupya Nopisalemi 1986

Mbudhi dhaJesus Kristusi thika di gha dhi tjangire N̂ando kwa Teghofilighusi

¹ Muhakwa wange Teghofilighusi! Hengi ha yerekire kutjanga yithimwetwedha eyi ya hokokire mukatji ketu.

² Podigho ha tu thimwetwedherire awa ha yi monine, hayuvithi hombudhi dhodhiwa.

³ Yodigho ha ni ghayara name eshi tango ni yi shane‐shane thiwana yithimwetdwedha yi, ndani po ni yi kutjangera mokurongama.

⁴ Kemo sho kone kudimuka eshi yinu yi ha kuhongire ne, yaghushemwa.

Kuna kuyuvitha mushamurukero waJohannesi ghoMukadiyoghero

⁵ Mumayuwa ghaHerodesi, ghofumu ghoJudeya, gha karire mupristeri ghumweya ghodina dyoSakariyasi. Oyu gha tundire mumbunga dhaAbiyani. Namukamadi wendi Elisabeti, gha tundire mudira dyaAroni.

⁶ Mughuwadi wawo ha karire hahunga kughutho waNyambi. Awo ha rikanyithire mumiragho no ha kwatire yoyihe yomuyihima yaFumu.

⁷ Ene mbadi ha wanine mwana, yoyishi Elisabeti ne gha karire mbumi. Karo mughuwadi wawo ha kuruparire thikuma.

⁸ Oku shime gha karera muyirughana yendi yoghupristeri mukukarera Nyambi murufo rwendi,

⁹ ko kumwiyera yihima yoyikara yoghupristeri, eshi gha yende mutembeli waFumu kukutjotjomekedha hapo kuthinyaku.

¹⁰ Mbunga dhodhihe dha karire panunda ghurapera, no kutaterera muyambo ghohapo.

¹¹ Ko kumuhokokera muengeli waFumu oyu ghemanine kurudyo rothinyaku.

¹² Apa gha mu monine Sakariyasi, gha tutukwire no gha yapire thikuma.

¹³ Ene muengeli gha ningire kukwendi eshi: “Wa yapa, Sakariyasi yoyishi ndapero dhoye dhina pu kuyuverera. No mukamadi ghoye Elisabeti, n̂anyi gha kushamuruke mwana ghokatughuru. Ho mbo ghu mu te eshi Johannesi.

¹⁴ Aye mbo ghana kara divetu‐vetu dyoyishamberera yoye no yiyumbaghuka yoye. No hengi mba shamberera kumushamurukero wendi.

¹⁵ Yoyishi mbo ghana fumana mumeho ghaFumu. Vinyu no warende mbadi mbo gha yi nwa. Aye mbo ghana yara naMupepo ghoKupongoka kutunda kumushamurukero wendi.

¹⁶ No mbo ghana pirura diko dyaIsragheli kwaFumu Nyambi wawo.

¹⁷ Aye mbo ghana kara mukamushongwe waFumu mumupepo nomungcamu dhofotji yira Eliya. Mbo ghana shemwithanitha hakerekandongo nawanahoka wawo, mbo ghana thighura hathururu kundhira dhodhihunga. Kemo mbo gha tenda diko kumwiyero waFumu.”

¹⁸ Ha ningi Sakariyasi kwamuengeli eshi: “Panye sho ni yi dimukere? Yoyishi ame na kurupara, mukamadi wange naye gha kurupara.”

¹⁹ Muengeli gha mu huthire eshi: “Yame Gabriyeli mukakukarera Nyambi. No na pu kutuma eshi ni ghambe noye, gho ni kuyuvithe mbudhi dhino dhoyishamberera.

²⁰ Mone ghuna kukara ghothipurupuru no kughamba temba, kate mudiyuwa edi mbo yi hokoka yinu yino. Yoyishi ghuna shwena kutawa kuman̂ando ghange agha mbo gha rikanya munako dhagho.”

²¹ Hanu ha mu tatererire Sakariyasi, no ha tetukire eyi gha dhighamenine mutembeli.

²² Apa gha shwaghire mo mbadi gha konine kughamba nawo. Ko kudimuka kwawo eshi runa ka mu hokokera rupara mutembeli. Aye dyo gha kumumamunine kenge yo nawo mughupuru‐puru wendi.

²³ Apa dha pwire nako dhoyirughana yendi yomutembeli, ko kuhuka kudighumbo.

²⁴ Munyima dhomayuwa gha, munu wendi ko kukara ghuremu. No gha kuhorekire tughonda kwoko, ho gha ningire eshi:

²⁵ “Kemo ghana tendi Fumu nange. Ghana ni thetuka mumayuwa ghano, pakunitunditha kunyanda kwange mukatji kawanu.”

Mayuvithero ghombudhi dhomushamurukero waJesusi

²⁶ Mukaghonda koghukwoko noghofotji koghuremu waElisabeti, ko kutuma Nyambi muengeli Gabriyeli kwambuyama muNasareti muditunga dyaGalileya.

²⁷ Mbuyama gha mwandekerire Josefu, murume ghomwanahoka waDavita. Dina dyambuyama ne Maria.

²⁸ Apa gha kumine muengeli kukwendi gha mu ningire eshi: “Ghurumere, wa yara n̂eke! Fumu noye gha di.”

²⁹ Aye gha tutukwire kuman̂ando gha, no gha tetukire eshi, nye dina kuninga dirumeritho di.

³⁰ Muengeli gha mu tongwerire eshi: “Wa yapa, Maria, yoyi ghuna wana n̂eke kwaNyambi.

³¹ Mone, ghuna kukara mudira, no mbo ghuna shamuruka mukaye katughuru, ho mbo mu te dina dyendi eshi Jesusi.

³² Mbo ghana pupana no mbana mu ta eshi Mwana Shokuru. Fumu Nyambi mbo ghana mu pa dipuna dyakerekandongo wendi Davita.

³³ No mbo ghana raghura mundhugho dhaJakopu yira fumu kuroruheya. Ghufumu wendi mbadi mbo ghuhura.”

³⁴ Maria gha ningire kwamuengeli eshi: “Ngepi mbo yi kara, ame ni shi kara nomurume?”

³⁵ Muengeli gha mu huthire eshi: “Mupepo ghoKupongoka ghana kwiya kukoye. Nongcamu dhaShokuru dhina kutembera peghuru dhoye. Yodigho oyu mbo shamuruka, mbana mu ta eshi mupongoki Mwana Nyambi.

³⁶ Ghu mone eshi, Elisabeti ghomwapoye, naye karo nga wana katughurughana mughukurukadhi wendi, oyu ha tire eshi mbumi. Kaghonda kano kokaghonda kendi koghukwoko noghofotji.

³⁷ Yoyishi kwaNyambi ne mbadiko thokumukanga.”

³⁸ Ko kuhutha Maria eshi: “Nomupika Nyambi me. Yi kare thika kenge di ghuna ghamba.” Ko kudhongonoka muengeli tarara.

Maria ghana ka dhingura Elisabeti

³⁹ Maria mbadi gha kudhugha‐dhughire, ghemanine wangu no gha yendire kumarundu kudighumbo dyaJuda.

⁴⁰ Ko kengena kwendi mudighumbo dyaSakariyasi, no gha rumerithire Elisabeti.

⁴¹ Apa gha yuvire Elisabeti dirumeritho dyaMaria, ko kushamba mwanuke ghomudira dyendi. NaElisabeti ha yara naMupepo ghoKupongoka.

⁴² Ha kugherera eshi: “Owe wa fumana pakatji kawakadhi, no gha fumana mwanuke ghomudira dyoye.

⁴³ Ngepi ya kona kukara yi eshi nyina Hekudyange gheye kukwange?

⁴⁴ Yoyi mone eshi, pakuyuva dirumeritho dyoye mughuma wadyo mumatwi ghange, ghana yumbaghuka ghushamba mwanuke ghomudira dyange.

⁴⁵ Mukaruvigha oyu gha tawa eshi, yoyiheya eyi gha mu tongwerire Fumu ne mbo yina rikanya!”

Dimbo dyomakughero dyaMaria

⁴⁶ Munyima ha ningi Maria eshi: “Mudhimu wange ghu kughe Nyambi,

⁴⁷ no moyo wange ghuna kushamberera mwaNyambi ghoMughamweni wange;

⁴⁸ ghana kengi kumakufupipithero ghamupikendi; yoyi mone eshi kutunda kudyarero mako ghomahe mbana ni ti eshi mukaruvigha.

⁴⁹ Aye mukangcamu dhodhihe, ghana ni tendera yinu yoyikuru. Dya pongoka Dina dyendi.

⁵⁰ Aye gha neghedha thin̂eke thendi kutunda kwawanahoka kate kwawaneghani awa ha mu kutekera.

⁵¹ Nodyoko dyendi gha ni tendera yitenda yongcamu. Hakadihuna mumitjima dhawo gha wa hanyaghura po;

⁵² hakamakuto gha wa tunditha pamapuna ghawo no gha yeyura hakakukushwahura.

⁵³ Hakakufandhara gha wekutitha noyitapa yoyiwa no hatungi gha wa tjidha nyara‐nyara.

⁵⁴ Ghana ghamwena mupikendi Isragheli nothighayara thomaturekero ghothin̂eke.

⁵⁵ Thika di gha tongorire kwakerekandongo wetu kwaAbrahamu no kwawanahoka wendi, kate kuroruheya.”

⁵⁶ Maria ha ka kara kwaElisabeti yira tughonda tuhatu, munyima ha ka huka kudighumbo dyawo.

Mushamurukero waJohannesi ghoMukadiyoghero

⁵⁷ Apa gha rikanyine mayuwa ghokushamuruka Elisabeti, ko kureta kwendi mwanuke ghokatughuru mukaye.

⁵⁸ Hakamaparaghumbo nohendi ha yuvire eshi Fumu ghana mu neghedha thin̂eke thothikuru, ko kushamberera nendi pofotji.

⁵⁹ No mudiyuwa dyoghukwoko noghuhatu, heyire kukuken̂a mwanuke, gho ha himine kumuta Sakariyasi kudina dyawihe.

⁶⁰ Nyina ne gha ningire eshi: “Kadi kemo! Kumuta eshi yo Johannesi.”

⁶¹ Awo ha mu hutha eshi: “Noyofotji temba ghomudiko dyoye ghodina dyokemo!”

⁶² Ko kurava kwawo wihe eshi ngepi di sho gha mu te mwanuke.

⁶³ Ha rombo kwendi thikwere no gha tjangire po eshi: “Johannesi dina dyendi.” Ko kutetuka waheya.

⁶⁴ Popo vene ko kuyahuka Sakariyasi no gha tangire kughamba, ho gha kughire Nyambi.

⁶⁵ Ko kututukwa waheya hakamaparaghumbo, nothiko thothiheya thomumarundu ghaJudeya ha ghambire yoyinu yi.

⁶⁶ Waheya awa ha yi yuvire, ya wa dhekire mumitjima dhawo no ha ningire eshi: “Ngepi di mbo gha kara yu mwanuke?” Yoyishi nyara dhaNyambi ne nendi dhi di.

Dimbo dyomakughero dyaSakariyasi

⁶⁷ Sakariyasi ghowiha mwanuke, gha yarire naMupepo ghoKupongoka no gha pumbire eshi:

⁶⁸ “Gha fumane Fumu, Nyambi waIsragheli yoyi ghana dhingura kiko dyendi muthin̂eke no ghana di roghithera makomweneno.

⁶⁹ Ghana twimekera Mukomononi ghongcamu, ghomukadiko dyaDavita ghomupikendi.

⁷⁰ Kemo dyo gha yi ningire pakare‐kare patunwa twawaporofeta wendi hokupongoka.

⁷¹ Mukutushutura twe kwawan̂ore dhetu no mumoko gha wa ha tu dhimba.

⁷² Aye gha ferire n̂eke hakerekandongo wetu, no kuvuruka ghundambo wendi ghokupongoka.

⁷³ Aye gha mwedherire kerekandongo wetu Abrahamu

⁷⁴ gha tu ghamwene mumoko ghawan̂ore dhetu. No tu mu karere mukupira woma,

⁷⁵ mughupongoki nomughuhunga mumayuwa ghomahe ghomoyo wetu.”

⁷⁶ “Owe mwanuke, mbana ku ti eshi, ghomuporofeta waShokuru yoyi mbo ghuna kara ghomukamushongwe waFumu kukumuroghithera ndhira dhendi.

⁷⁷ Mbo ghuna dimukitha diko dyendi makomweneno. Makomweneno ghomathigherero ghomaharwero ghawo.

⁷⁸ Matumero kuthin̂eke thaNyambi wetu. Thika muvo ghodiyuwa dyo mbo gha hokoka no kutusheghenyena ko kayenda.

⁷⁹ Mbo ghana reta munyenge kwawa ha kara mumakokore no kwawa ha kara mumumvure ghokufa, no kurongeka mayira ghetu mundhira dhothiraro.”

⁸⁰ Na mwanuke gha kurire no gha karire nongcamu mwaMupepo. Aye gha karire mumamboreya, kate kudiyuwa di gha kuhokorire gha kuneghe muIsragheli.