Hakakolose 4 - Testamende Ghomupya Nopisalemi 1986

¹ Namwe mwanumwene, mu rughanithe ghuhunga hapikenu, pathina muragho eshi namwe karo mwa kara noHekudyenu ghomudiwiru.

Mu rapere no munyangwe noghunya‐nyami

² Mu tanare mum ndapero! Mu rawe no mu tumere.

³ No mu turaperere namwe karo eshi, Nyambi gha tu yandhwerere mbudhi tu kone kuyuvitha thithithatero thaKristusi, ethi na karera me mun̂otwa.

⁴ Mu raperere eshi name mbo ni kone kuyuvitha mbudhi thiwana thika di ha dhi nipa.

⁵ Mu tende noghunya‐nyami nawanu wa ha dhira kukara mumbunga dhenu. Amwe ne mu rughanithe yi mu kehe nako.

⁶ Mukuninga eshi, eyi muna kughamba mwe, mwa kona ndani kukara noghunongo no kunongonona ghushemwa, no ngepi di ghokuhuthera kwakehe yu ghana kumwipura.

⁷ Tigikusi ghomutawi muyendhange, oyu na haka thikuma. Mbo ghana mu tongwera yoyihe eshi, ngepi di muna kupinduka. Aye ne mukareri ghokukurpera no gha rughana pofotji nange muthirughana thaFumu.

⁸ Ame kutuma na kutuma kukwenu eshi, na mu yuve edi tudi kuno. No kemo dyo sho gha tundithe yitokota yenu.

⁹ Onesimusi ghomutawi yu na kuruperire ghomuyendhange, oyu na haka yofotji ghopapenu, mbo gha neya nendi. Awo mbo hana na mu tongwera eshi, yinye yi yidi kukwetu.

Dirumeritho

¹⁰ Arisitagusi yu nidi nendi mun̂otwa, ghana tumu dirumeritho kukwenu. Na Markusi karo, ghomwepa Barnabasi, ghana mu rumeritha mwahe. Kukwendi yu mwa wana yirughana pakutanga: no ngeshi mbo gheye kukwenu, mwa kona kumutambura nomoko mawadi.

¹¹ Karo na kumutumena Jesusi yu hatoya eshi, Justusi dirumeritho kukwenu. Awa Hajuda hashahatu, pithawo hana kurughana pofotji nange mughutungi waNyambi. Awo ne wo haghamweni wange hashokuru.

¹² Epafrasi, ghumweya ghopapenu, naye ghana mu rumeritha. Aye gha kara muthirughana thaKristus Jesusi no ghana mu rapereranga kehe pano thikuma eshi, mu tanare mu kure mumidhimu no mu kare ghutawedhi ghokuyara kumahimeno ghaNyambi.

¹³ Oyu ne na kona kumunongwenena eshi gha rughana yinu yoyingi kukwenu no kwawatawi homuLaghodisiya no muHirapolisi.

¹⁴ Lukasi ghonganga yu na haka thikuma, na Demasi hana mu rumeritha thikuma.

¹⁵ Mu tware dirumeritho dyange kwawatawi homuLaghodisiya no kwaWakanimifa no kumbunga dhi dha kupakerera kehe pano mumayugho ghawo.

¹⁶ Apa dha kupwa kumutoyera dhi mbapira, mwa kona kudimuka eshi, ha ka dhi toye karo kughutho ghombunga dhenu dha Wakalaghodisiya noyu mbo gha shwagha muLaghodisiya, naye karo mwa kona kuyimutongwera.

¹⁷ Mu mu tongwere Argipusi eshi: “Tolomene nomoko mawadi kuthirughana thi wa wana kwaFumu, eshi ghu kone kuyikumithamo.”

¹⁸ Pano nonyara dhange nothinda na kutjanga. Ghurumere Paghulusi. Ni vuruke muno mun̂otwa nidi. Thin̂eke mbo thi kare nenu.