Hakakolose 3 - Testamende Ghomupya Nopisalemi 1986

Amwe ne pofotji naKristusi mwa vumbukire

¹ Ngeshi pofotji mwa vumbukire naKristusi, mu shane yinu yomudiwiru, oku gha kara Kristusi no gha hungumana kurudyo rwaNyambi.

² Mu ghayare yinu yomudiwiru, kadi yopamuve.

³ Yoyishi mwa fire, no moyo wenu wapwa kundeka pofotji naKristusi mwaNyambi.

⁴ Apa mbo gha hokoka Kristusi ghomoyo wenu, namwe mbo muna hokoka pofotji Nendi mughufumu.

Yipara yopakare noyoyipya

⁵ Yodigho, mwa kona kupagha yinu yopamuve eyi yidi mumwenu, yira rungu, kupira ghukushuki, didovo dyodimango, yirumbera yoyimango, noghunu yira hanyambi hombango.

⁶ Payinu yi yokenge yo, po gheya mahumbithero kwawanu wa ha kara ha thururu kuKwendi.

⁷ Pakare‐kare, namwe mwa tendire yinu yiapa mwa parire mumwayo.

⁸ Ene mwa kona kuthigha yinu yoyiheya yi pashadyarero yira: ghughandhi, thidhimbo nomatuka. Dishanga dyodishawana ne dya kara mutunwa twenu,

⁹ no mwa kwangera. Amwe ne mwa thigha yikaritha yawatukuru,

¹⁰ ho muna kupara pan̂anyi‐n̂anyi mumoyo wamunu ghomupya. Oyu gha kutendurura shime kuthishwi thaMuvareki wendi no kate kughudimuka ghoghuyara waNyambi.

¹¹ Eyi ne kadi yihima yaWahirika naWajuda. Yomaken̂eno endi yoghupumuru, makutjakero ghomandimi, kupira mi, ghupika endi muhoro. Muyinu yoyiheya yi ne, mo gha kara Kristusi.

¹² Amwe, mwatorori waNyambi yu gha mu haka thikuma. Yodigho mwa kona kupara thiwana pofotji. Mu kuyuve, mu kumbirupithe, mu kare noghunongo noghudhughutjima.

¹³ Mu kare ghudhidhimeka no mu kuthigherere, ngeshi ghumweya oku gha nepitha muyendhendi. Thika di gha mu thigherera Fumu, namwe kemo dyo sho mu tende karo mukuthigherera hayendhenu.

¹⁴ Muyinu yoyiheya yi, thothikuru po ne eshi, mwa kona kukuhaka pofotji. Edi dyodinungo di mwa ku kwata pofotji mumakupakerero ghokuyara.

¹⁵ Thiraro thi gha tapire Kristusi, tha kona kunegha yiparitha yenu. Nyambi gha mwitha kare eshi, mu kare yipo yoyirama yofotji mukupara pofotji muthiraro. Mu tumerange roruhe.

¹⁶ Mbudhi dhaKristusi dha kona kuyarerera mughutungi wadho mumwenu. Mukuhonge no mukuhangathane noghunyanyami ghoghuhe. Mumitjima dhenu, mwa kona kwimba matumero mumipisalemi, membo ghomakughero no membo ghokupongoka kwaNyambi kudifumanekere dyendi.

¹⁷ No yoyiheya yi muna kughamba no kutenda, muyighambe no muyitende muDina dyaHekudyetu Jesusi no mu tumere Nyambi Wihe paPendi.

Yikara yopofotji

¹⁸ Mwakamadi, mu kare ghutawedhi kwawatutughuru wenu, thika di ya rikanya kwawanu wa ha tawa mwaFumu.

¹⁹ Mwarume namwe, mwa kona kuhaka hakamadi wena no mwa wa rwera difupa.

²⁰ Amwe mwana, mu kare noghutumanethi kwawawihenu muyinu yoyihe. Yoyishi, dyo gha yihimena kwawanuke wa ha tawa muMwendi.

²¹ Mwawiha, mwa shana kehe pano murandu kwawana eshi wangu hapire mukakuwakorera.

²² Mwapika, mu kare noghutawedhi kwawa mwa rughanena pakaye kano. Mwa rughana eshi ha kughe yirughana yenu no mu wane fuma kwawanu ho kenge yo. Ene mu rughane nomutjima ghoghuwa, kudfumanekero dyaFumu.

²³ Yoyiheya yi muna kutenda, mu yitende nomutjima ghoghuhe thika di gha yihima Fumu. Mbadi kwawanu.

²⁴ Yoyi mwa dimuka eshi, amwe ne mbo muna wana ndjambi dhenu kwaFumu edhi gha mu turekera. Kristusi ne yoFumu yu muna kurughanena.

²⁵ Ene yu ghana kutenda ghuyi, mbo ghana pu kuhumbitha popaghuyi wendi ghu gha tenda. Fumu ne mbadiko yu gha pongora.