Hakafilipi 4 - Testamende Ghomupya Nopisalemi 1986

¹ Yodigho, mwayendhange homwahakwa nawa na ruranga. Amwe ne yishamberera yange, n̂ata dhodikuto, mwahakwa, kemo dyo mwa kona kutanara mumakupakerero naFumu.

Yipara yoghukriste

² Ame kuna kutjokedha Ewodiya ho na kutjokedha karo Sintige eshi mu kare nomutjima ghofotji mwaFumu.

³ Kemo karo nowe murughani muyendhange. Na kukanderera eshi, hakamadi wo ha rwire nange pofotji muthirughana thombudhi dhodhiwa, naKlemensi nawarughani nange hamweya, awa ha tjanga murukwaro romoyo.

⁴ Mu shamberere keho pano mwaFumu! Yo na kuhukuruka karo eshi: mu shamberere.

⁵ Mu neghedhe thin̂eke thenu kwawanu wahe. Yoyishi Fumu ne pepi ghadi.

⁶ Mwa kudhekera kuyinu yimweya. Ene mu yuvithe dirura dyenu pamandapero nomakuhemeno nomatumero kwaNyambi.

⁷ Nothiraro thaNyambi thi thapiterera maghano ghomahe, mbo thina kara mumitjima dhenu nomuyighayara yenu mwaKristus Jesusi.

⁸ Karo mwayendhange, yoyiheya yoghushemwa, yoyiheya yoyihunga, yoyiheya yokukushuka, yoyiheya yoyiwa, yoyiheya yomudikuto, ngambi yi hahaka hanu noyi hafumaneka — ngambi yoghutumanethi endi yinu yomakughero — amwe mwa kona kuyighayadhara thiwana.

⁹ No yi mwa kuhongire kukwange no yi mwa yuva no kumona, mwa kona kuyirughanitha. NaNyambi yu gha tapa thiraro, mbo ghana kara nenu.

Matumero kuyitapa yoruhakitho yawakambunga

¹⁰ Ame na shamberera thikuma mwaFumu eshi, amwe muna kuneghedha mumayuwa gha ghana kapitapo, shime ha mu ni ghayara. Amwe mwa ni vurukire, ene mbadi mwa wanine ruvedhe rokutenda thinu.

¹¹ Eyi na kuyighambera, kadi eshi kunyanda na kunyanda, yoyishi na kuhonga yinu yoyihe.

¹² Ame ne na dimuka kunyanda no na dimuka eshi nye ruvigha: Yoyiheya yi na kumonena me: mukukara mumakuta endi mukufa ndhara, muruvigha, ngambi mukunyanda.

¹³ Ame ne na kona yoyihe papendi Yu gha nipa ngcamu.

¹⁴ Karo mwe mwa tendire ghuhunga pakunighamwena mumaghukukutu ghange.

¹⁵ Amwe Mwakafilipi mwa dimuka karo eshi, kutunda pa na tangire kuyuvitha mbudhi dhodhiwa, apa na tundire muMasedoniya, nodhofotji temba mbunga dhi dhakupakererire nange muyiwana no muyitapa.

¹⁶ Apa na karire karo muTesalonika, amwe mwa ni tumenine rwingi kupiterera rofotji yinu yokunighamwena mukunyanda kwange.

¹⁷ Ame mbadi na kushana yitapa. Ene na mu hakera eshi, mu yare muyikara yenu: ndani po sho mu wane ghushwi mwathinda.

¹⁸ Ame ne na wana yoyihe no yina ni vurera. Kutunda pa nana wanine kwaEpafroditusi yu mwa ni tumenine, yina rikanya keho yoyihe eyi na nyanda. Muyambo wenu ghothiwe thothiwa kughutho waNyambi, ghomuyambo ghu gha menya‐menyena Ye no ghomuyambo ghu gha tambura Ye noghushamberera.

¹⁹ No Nyambi wange mbo ghana mupa ruvigha mu kehe thinyanda thenu thika mukamwagha‐mwaghe kendi, mughutungi ghomwaKristus Jesusi.

²⁰ Difumanekero kwaNyambi wetu noWihetu kate kuroruheya! Amen.

Dirumeritho

²¹ Dirumeritho kwawahe wa ha kundama kwaNyambi paKristus Jesusi. Hayendhange awa nidi nawo kuno, hana mu rumeritha thikuma.

²² Hatawi wahe, thikuma ne hakamarombe ghafumu shokuru, nawo hana mu rumeritha karo thikuma.

²³ N̂eke dhaHekudyetu Jesus Kristusi, mbo dhina kara mumidhimu dhenu.