Hakafilipi 2 - Testamende Ghomupya Nopisalemi 1986

¹ Ngeshi mwa wana mahengawero mwaKristusi. Nomatjokedhero ghomuruhakitho, makurupero ghopaMupepo, no mu kuhakathane ho mu pare pofotji.

² Mu rikanyithe keho yishamberera yange pakukupakerera pofotji: muruhakitho rofotji mutjima ghofotji, mukufa pofotji.

³ Mwa kutendera yenu mwathinda, ngambi kukununeka, ene mukukumbirupitha, gha kone ghumweya kukutekera muyendhendi kupiterera thinda.

⁴ Kadi yomuhe ghopapenu yu gha kona kukukutekera thinda. Ene gha kutekere hamweya karo.

Thitamenedhi thaJesus Kristusi

⁵ Yighayara yenu yi kare pofotji mumwenu, thika di yakara karo mwaKristus Jesusi.

⁶ Oyu gha karire muthishwi thaNyambi, yipara yendi yarikanyine kwaNyambi, mbadi gha kupambekire kughunyambi.

⁷ Ene Aye, gha kumbirupithire apa gha gha karire muthishwi thoghupika no gha karire munu vene. No apa gha hokokire mughunu,

⁸ thinda gha kumbirupithire pakukara ghutawedhi kate kukufa, kemo, kufa ku kwapathikurushe.

⁹ Yodigho Nyambi gha mu kutekerire karo thikuma no gha mu pire Dina dyokupiterera mena ghomahe,

¹⁰ eshi muDina dyaJesusi, yomuhe ghomudiwiru no ghopamuve gha kuvame manwi,

¹¹ no kehe rudimi runongonone eshi: “Jesus Kristusi ne Fumu!” kudifumanekero dyaNyambi Wihe.

Hashimbi homunyenge ghokaye

¹² Mwahakwa, amwe mwa karire ghutawedhi kehe pano, apa na karire nenu. Thikuma ne mu kare ghutawedhi ngambi mbadipo me. Mu rughanene makomweneno ghenu nodikuto nowoma.

¹³ Yoyishi Nyambi yo ghana kurughana mumwenu. Aye yo ghana kumuhimena no kumutenda eshi, mu rughane yihima yendi yokupongoka.

¹⁴ Mu rughane yoyihe mbadi no ghushivana no ghukanunutha.

¹⁵ Mu koneke eshi, mu kupongore mu kare noghuhunga. Mu kare hana Nyambi hokupira murandu mukatji kawanu hohayi no hamango. Mu tende mukatji kawo thinu yira hakamunyenge ghokaye.

¹⁶ Pakutwara kughutho n̂ando dhomoyo Mudiyuwa dyomwiyero waKristusi, po mbo ni kara noyinu yokuninyamunitha. Yoyishi, ayo mbo yina kara eshi, kadi nyara‐nyara na rughanine no kadi nyara‐nyara na twamenine.

¹⁷ Matawero ghenu ne muyambo mukukarera Nyambi. Ngambi ngo gha notokere po manyinga ghange yira muyambo ghoyinwa, ame na kushamberera mumwange. Kemo na kushamberera pofotji nenu mwahe.

¹⁸ Pathinu thofotji mwa kona kushamberera namwe kemo, mu shamberere pofotji nange.

Matumeno ghawa Timoteghusi naEpafroditusi

¹⁹ Ame na kurupera mwaFumu Jesusi eshi, ni kone kumutumena wangu Timoteghusi kukwenu, name karo ni kone kuhedhumuka mutjima wange, pa kuna yuva eshi, ngepi di mudi.

²⁰ Keho me, mbadi na wana ghumweya yu na dimuka thiwana. Shimengwa yodiye pithendi keho, yo mbo na gha yaritha dirura dyenu mughuhunga.

²¹ Thingi thawo wahe kuna kukushanena dirura dyawo hathinda, kadi dyaJesus Kristusi.

²² Ene namwe mwa yidimuka vene eshi, ngepi di ha mu kurupera yu Timoteghusi. Thika mwana nawihe, gha yuvithe pofotji nange mbudhi dhodhiwa.

²³ Ame na kurupera eshi, ni mu tume kukwenu wanguwangu. Oku na mono eshi ngepi di hana kunitenda.

²⁴ Yo na kukurupera name, ngeshi ku ghana himi Fumu, ngo name karo nothinda ngo mbo neya wangu kukwenu.

²⁵ Ame kughayra na kughayara eshi, ghuhunga thikuma kukwenu pakumutumena muyendhange Epafroditusi kukwenu. Yo murughani nange no mukayita muyendhange yu mwa ni tumenine kuno eshi, na gha ni ghamwene mumaghukukutu ghange.

²⁶ Aye kurura ghana kumurura roruhe no yina mu kashitha thikuma pakuyuva mwe yikorwa yendi.

²⁷ Shemwa, momu ghafe. Ene Nyambi, gha mu fererire n̂eke Epafroditusi. Keho kadi kukwendi pithendi keho, no kukwange karo eshi, maghana sho ni kare nothitukutjima.

²⁸ Ame kutuma na kumutuma wangu kukwenu, na mu mumone karo. Eshi mwa kuna kone kushamberera, name ho yi ni tunde yindhivi.

²⁹ Mu mu tambure moko mawadi yira muyendhenu mwaFumu no mu kutekere hanu thika kenge yo.

³⁰ Yoyishi pathirughana thendi thokwaKristusi, tho gha ningire eshi ghafere. Aye gha tapire moyo wendi thinda eshi, gha ni ghamwene, amwe ne mbadi mwa tapire moyo wenu mukunighamwena.