Hakafilipi 1 - Testamende Ghomupya Nopisalemi 1986

Mbapira Kwawakafilipi

¹ Edhi dhina kutunda kwaPaghulusi naTimoteghusi, hakareri waKristus Jesusi. Dhino ne dhokwawahe hoMufilipi, awa ha kundama kwaNyambi paKristus Jesusi, nawakuru wawo hoyirughana yongirishe nawadiyakoni wawo.

² N̂eke nothiraro thaNyambi Wihe no thaHekudyetu Jesus Kristusi, thi kare nenu.

Matumero nondapero dhokumbunga

³ Ame na kutumera Nyambi roruhe, pakumuvurukanga.

⁴ Mumandapero ghange na mu rapereranga mwahe noghushamberera.

⁵ Yoyishi mwe, kutunda mudiyuwa dyokutanga kate kudyarero, twa rughana pofotji mukuyuvitha mbudhi dhodhiwa.

⁶ Ame na yidimuka thiwana eshi, Nyambi yu gha tangire thirughana thothiwa mumwenu, mbo ghana thi tendi kate paghuhura no mbo ghana thiyaritha, mudiyuwa dyomwiyero waKristus Jesusi.

⁷ Yo yina karera karo ghuhunga kukwange pakumughayara mwahe. Yoyishi ame na mu vurukanga mwaheya, yoyi mwa kara mumutjima wange. No mwa yerana pofotji kun̂eke dhi gha nipa Nyambi. Mun̂otwa dhange no mukumughamwena mwe, na tanarera mumbudhi dhodhiwa no kutanaritha ghushemwa wadho.

⁸ Nyambi ne yokanonga kange. Aye yo gha dimuka eshi, ngepi di na kumurura mwaheya noruhakitho rwaKristus Jesusi mumutjima wange.

⁹ No karo ho na kukanderera eshi, ruhakitho rwenu ruvure no rukure, thikuma ne mumaghano no muyikara.

¹⁰ Kate mbo mu kone kupongora paghuhunga yinu. Ndani po mbo mu pira makoghawero no murandu temba mudiyuwa dyomwiyero waKristusi.

¹¹ Yipara yenu yopaJesus Kristusi, yiyare nombuyo dhodhihunga. Kudifumanekero no kumakughero ghaNyambi.

Matapathaneno ghokumbudhi dhon̂otwa

¹² Ame thi na haka ethi sho mu kone kudimuka mwayendhange. Ya ni hokokera mukutapathanitha mbudhi dhodhiwa.

¹³ Kemo dyo ya kara eshi hakungi wahe wafumu shokuru no hamweya wahe po ha dimukera eshi, ame ne pamurandu waKristusi na karera mukan̂otwa.

¹⁴ Pan̂otwa dhange, ha tanaritha karo hayendhange, mumatjimapero ghawo ghokwaFumu. Nawo hana kutokomena ghuyuvitha kehe pano n̂ando dhaNyambi ghupira woma.

¹⁵ Padi hamweya wa ha yuvitha Kristusi, yoyishi wo ha kara nonya kukwange nothinu thokukwange. Ene hamweya, ha yitenda nomahimeno ghomawa.

¹⁶ Awa tuna toyo paghuhura, ha yuvitha Kristusi yoyishi, ha ni haka no ha dimuka eshi, ethi ne thothirughana thange eshi, kutanaritha mbudhi.

¹⁷ Keho wa tuna toyo pakutanga, ha yuvitha Kristusi mumwawo hathinda no mihingo dhodhiyi. Thitambo thawo ne kukukutitha shime n̂otwa dhange.

¹⁸ Keho ne nye yoyiheya yi? Ngambi ha yuvitha Kristusi nodifurumeko, ngambi mughuhunga, ngambi pamihingo dhimweya dhodhadhonadho, kukwange me ne yina kunishambereritha shime kughutho.

¹⁹ Yoyi na dimuka eshi, yina tamba mumaghamweno ghange. Karo kuraperera muna kuniraperera, noMupepo waJesus Kristusi nange ghudi.

²⁰ Edi ne dyodirura dyange dyodikuru. No makurupero eshi, mbadiko thi mbo ni tenda ethi mbo thi ni fitha honyi. Ame na himi karo pashan̂anyi‐n̂anyi no thika roruhe no ghutjimapa mumoyo wange ghoghuhe, mukufumaneka Kristusi mumoyo wange no mukufa.

²¹ Yoyishi, mughuyumi kukwange ne yoKristusi. Mukufa kwange ne moyo ghororuheya.

²² Ngeshi ku na kupara, na kona kurunduruka nokamwagha‐mwaghe koyirughana. Ethi sho ni kone kutorora, mbadi tha kudimuka me.

²³ Ame ne matamanyi nidi: na ruru kuyenda kutja no kukara naKristusi. Yoyishi, thothokupiterera thikuma.

²⁴ Ene muyihima yenu, thokupiterera thikuma ne ngo nipare.

²⁵ Eyi na kuyinongwenena yi, yoyi na dimuka eshi mbo na shamberera. Kemo dyo mbo ni kara nenu mwaheya pofotji, kate mbo mu kone kukura mumatawero no kuwana yishamberera mumatawero ghenu.

²⁶ Ngeshi mbo niye karo kukwenu, mbo muna kara nokamwagha‐mwaghe koyinu yokukugha Kristusi papange.

Matjokedhero ghomadhi‐dhimekero, makupakerero no makumbirupithero

²⁷ Thinu thothikuru ne thino eshi, yipara yenu yikununge pofotji nombudhi dhaKristusi. Ngeshi mbo niye, mbo na na yimono nothinda. Ngambi ngeshi mbadi mbo ni kona kwiya, mbo na na yiyuvu mumbudhi eshi, shemwa muna tanara pofotji mukurwera matawero mumbudhi dhodhiwa.

²⁸ Yoyishi, mbadiko thiyapithitha ethi sho thi mu yapithe kwawan̂ore dhenu. Ethi ne thidimukitho thokufa kwawo. Kukwenu ne maghamweno no kwaNyambi thatunda.

²⁹ Nyambi gha mu tawedhire mu karere Kristusi. Ene mbadi kutawa muMwendi keho, no pakumunyandera karo.

³⁰ Name namwe twa kara noyita yofotji, eyi nga mu ni monanga oku na kurwa me no thika di mwa yuva eshi, shime ha ni ru nopashadyarero.