Hakaefesusi 6 - Testamende Ghomupya Nopisalemi 1986

Hakuru nawanuke

¹ Mwanuke mu kare noghutawedhi kwawakuru wenu yira hatawi, yoyishi muragho ghu wa ghamba ngeno eshi:

² “Fumaneke wiho nanyoko” oghu ne muragho ghoghukuru thikuma. Apa ne poghadi karo matoyedhero eshi:

³ “kemo mbo wana ruvigha nomoyo ghokuhenga pamuve.”

⁴ Namwe mwawiha, mbadi mwa kona kurughanitha hanenu eshi, ha kare mumeman̂anyeno. Ene mu wa korere nomuragho nomashingero, thika di gha yihima Fumu.

Hanumwene nawapika

⁵ Mwapika, mu kare ghutawedhi kwawahekudyenu pano pamuve. Ho mu tende yi mudikuto no ghukumbirupitha. Ene nomitjima dhodhihunga, yira kwaKristusi.

⁶ Mwa tenda kemo, wangu ha mu mone hahekudyenu eshi mu wane fuma. Ene mu rughane yira hapika Kristusi wa ha tenda mahimeno ghaNyambi nomutjima ghoghuhe.

⁷ Ngambi kenge di mwa kara mwapika, mu tende thirughana thenu nomitjima dhodhiwa, yira kwaFumu ene kadi yira kwawanu.

⁸ Amwe ne mwa yidimuka shemwa eshi, Fumu mbo ghana ruwera kehe yu ghokutenda yinu yoyiwa. Gha kare mupika ngambi mukahoro.

⁹ Namwe mwahekudyawo, mu rughane kemo nawapikenu! Mu thighe kuwapetha. Mu dimuke eshi Fumu ghomudiwiru, nawo Fumu wawo noFumu wenu namwe. Yodigho Aye, noyofotji, temba yu gha haka kupiterera ghumweya.

Yitwa yawakriste

¹⁰ Paghuhura karo shime yino: mu shane ngcamu mwaFumu momu mungcamu dhendi dhishokuru.

¹¹ Mu shupate yitwa yi ghana kumupa Nyambi. Eshi mu tanare, mbadi gha kona kumuhongaghura Shatani noghuringi‐ringi wendi.

¹² Yita yetu ne kadi yokwawanu, ene yokwawakuru, kwawakamangcamu, kwawaraghuri hokaye kano komakokore, no kumipepo dhodhimango dhomuwiru.

¹³ Yodigho, mu shupate yitwa yi gha mupa Nyambi. Eshi mbo mu tareke mudiyuwa dyoghukore. No pa mbo yihura yita, mbo mu kare thika di mwa kara.

¹⁴ Mu kare kenge yo ghutanara. Mu kughange nomukata ghoghushemwa mumambunda ghenu, ghuhunga yira thishupata thothikuvo thopamiyidi dhenu.

¹⁵ No mukwinduke mukuyuvitha mbudhi dhothiraro, yira makuha ghokumapadhi.

¹⁶ Thikuma ne mu tumbure matawero ghenu. Gha kare yira thingandekitho thomunyara dhenu. Yoyishi nayo mbo mu dhimitha maretha ghomayi.

¹⁷ Mu tambure ghushwi ghomakomweneno nodimende dyaMupepo. Edhi ne dhon̂ando dhaNyambi.

¹⁸ Mu yitendange yoyihe kehe pano ghurapera no ghukumbera kwaNyambi paMupepo wendi. Mu rawe no mu rapere roruhe kwawatawi wahe.

¹⁹ Namwe mu ni raperere karo kwaNyambi eshi, gha nipe man̂ando ni kone kuyuvitha mbudhi dhothiraro noghutjima.

²⁰ Pamurandu ghombudhi dhino, po na karera me nothitumi thomuyihakaboyi. Mu raperere eshi, ni kone kuyuvitha mbudhi noghutoghoro thika di gha ni tuma.

Nando dhoghuhuhura

²¹ Tigikusi, mutawi muyendhange yu na haka thikuma, mukareri ghoshemwa waFumu. Mbo ghana mu tongwera karo yoyihe yokwange noyirughana yange.

²² Ho na kumutuma kukwenu, eshi mu kone kudimuka mupindu wetu, no gha hedhumune mitjima dhenu.

²³ Thiraro kwawayendhange, noruhakitho nomatawero ghaNyambi naHekudyetu Jesus Kristusi!

²⁴ Thin̂eke thi kare nawa ha haka Hekudyetu Jesus Kristusi noruhakitho rokudhira kupwa.