Hakaefesusi 4 - Testamende Ghomupya Nopisalemi 1986

Ghufotji ghongirishe

¹ Ame ne kutuywera na kuyimutuywera mumitjima dhenu, no mukan̂otwa me pamurandu ghokukarera Fumu: Mu ninge yipara yenu yikupakerere pofotji nomethero gha mwa wanine KwaNyambi.

² Mukumbirupithe kehe pano, mu kare noghunongo noghudhughutjima no mukudhidhimekerange muruhakitho.

³ Amwe mu kon̂omeke ghufotji ghu gha mupa Mupepo mukatji kenu eshi, mu kare nothiraro mukatji kenu.

⁴ Yirama ne yofotji noMupepo ghofotji, thika di gha karapo makurupero ghofotji agha gha mwithera Nyambi.

⁵ Fumu ne yofotji, matawero ghofotji, no diyoghero dyofotji.

⁶ Nyambi ne yofotji no yoWiha wawahe. Oyu gha piterera wahe noyu gha rughanene wahe no gha tunga mwawahe.

⁷ Kwakehe yu ghopapetu oyu gha wana thitapa thon̂eke thika di gha taperire Kristusi yitapa yendi kwawahe.

⁸ Yo yina kuningera yitjanga ngeno: “Apa gha dhinine kudiwiru, gha shimbire hakan̂otwa no gha taperire yitapa kwawanu.”

⁹ N̂ando dhi dhokuninga eshi: “Aye gha dhinine” kuninga dhina kuninga eshi, Aye ne gha shurukire pakutanga kwawakamwishi kuningashi pamuve.

¹⁰ Oyu gha shurukire pamuve, yoYu gha dhinine karo, kundagha‐ndagha dhodiwiru dyodihe eshi, gha yarithe yoyihe papendi.

¹¹ No eyi ne “yoyitapa” eyi “gha taperire Ye” hapostoli haporofeta, ha yuvithe mbudhi dhodhiwa, nawadithi nawakungi nawahongi.

¹² Thitambo thendi tha karire eshi, gha roghithere hatawi kuyirughana yawo no thokutenda yirama yaKristusi.

¹³ Kemo kate mbo tu kakume kughufotji ghoshemwa mumatawero ghetu noyidimuka yaMwana Nyambi.

¹⁴ Po mbo tu dhira kukara shime twanuke no mbadi mbo tu kara yira mangumbi ghokukupingana gha yendahuka‐huka kukehe mupepo, thika hahongi hombango awa hana kupemukitha hamweya mughunya‐nyami wawo.

¹⁵ Mbadi kemo, mbo tuna kara muruhakitho mughushemwa no kemo dyo mbo tu kundama kwaKristusi. Aye, gha kara roruheya mutwi.

¹⁶ No Papendi yema yipo yoyihe. Yipo yokukutjaka-tjaka, ya kurikanya no yakara yinu yofotji. Kehe thipo, tha rikanyitha thirughana thatho. No kemo ya kutenda yirama yothinda muruhakitho.

Yipara yopatukuru no yon̂anyi‐n̂anyi

¹⁷ Mu Dina dyaFumu na kumukanderera eshi: Mwa para shime rure yira hahayidena. Yighayara yawo, yawatwara kunyara‐nyara.

¹⁸ Maghano ghawo ne ghamakokore. No mbadi ha yerana kuthitapa thaNyambi. Yoyishi, ghukukutu wawo, mukupira maghano wa tanara thikuma.

¹⁹ Awo ha kasha no ha kutapa kudidovo dyorungu eshi, ha tende yinu yodidhiro yoyihe.

²⁰ Amwe ne kadi kemo mwa kuhonga yokwaKristusi.

²¹ Amwe ne mwa mu yuvire, no yoyishi mwe mwakathishongero wendi mwa karire, yo gha mu hongerire mughushemwa ghu wa kara mwaJesusi.

²² Mu thighe ne keho yipara yenu yokare‐kare: mu tundithe munu mumitjima dhenu, oyu yapetha yirumbera yoyimango.

²³ Mupepo wenu no yighayara yenu, yikare ghupya.

²⁴ Mu pare yira hanu hohapya, awa gha varekire Nyambi popanungu dhendi mughuhunga ghoshemwa no mughupongoki.

Miragho no yipara yoyipya

²⁵ Kenge muna thighi mbango, mwa kona keho kughambanga ghushemwa mukatji kenu. Yoyishi twe twayipo yoyirama yofotji.

²⁶ Ngeshi ha mu pata, mwa harura, ene mukuthigherere kughutho ghokuwa diyuwa.

²⁷ Mwa tapa dyango kwaShatani.

²⁸ Ngeshi ghumweya mwidhi, gha kona kushagheka widhi wendi, aye gha kona kuwana muparo wendi pakurughana thikuma thinda. Po mbo gha wana yinu yokukona kutapa kwawahepwe.

²⁹ Man̂ando ghomayi, kadi wa kutunda gha shwaghe mutunwa twenu. Mu kone kughamba yoyiwa keho no kushambereritha hanu wahe, thika di yakara muyikara yawo, kate yi wa roghere thiwana hateghereri wenu.

³⁰ No mwa tokotitha Mupepo Ghokupongoka waNyambi. Yoyishi Aye yo gha mutambithire eshi mu kare nothitamba thaNyambi thodiyuwa dyomakomweneno.

³¹ Amwe ne mbadi mwa kona kupata wangu, ngambi kuvundhadhara, mwa tuka endi kushamuna, mbadi mwa kona kutenda thinu thothiyi.

³² Mu kuhake no mu kuferange n̂eke. No mu kuthighererange thika di gha mu thighereranga mwe Nyambi mwaKristusi.