Hakaefesusi 3 - Testamende Ghomupya Nopisalemi 1986

Yirughana yaPaghulusi mwawahayidena

¹ Yodigho na kumukanderera mwe mwa dhira kukara Hajuda, ame Paghulusi no mukan̂otwa pathirughana thange thokwaKristusi.

² Amwe mwa yuvire pakare marawero ghaNyambi muthin̂eke thendi, ethi gha ni pire eshi ni mu rughanene muyihaka yenu.

³ Aye gha dimukithire thithithatero thendi muyihokora kukwange, thika di na yitjanga pawiru.

⁴ No ngeshi ha mu yitoyo, mbo muna tjwathana ghudhungi ghothithithatero thaKristusi.

⁵ Pakare‐kare, mbadi ha dimukire hanu no kamanana temba muyithimwethwedha thithithatero thika di gha yihokora Nyambi paMupepo, no kwawapostoli wendi hokupongoka no pawaporofeta.

⁶ Ethi ne thothidimukitho: pakuyuvitha mbudhi dhoyishamberera no ghundambo wawo naKristus Jesusi. Wa kara pofotji karo nawa ha dhira kukara Hajuda netu. No diko dyaNyambi no hahateri ghoyirama yaKristusi. No mbo tuna yoro pofotji nawo, eyi gha tu turekera Nyambi.

⁷ Pamurandu ghombudhi dhino dhodhiwa, po na karera nomukareri ghoyitapa yi gha ni pire Nyambi pathin̂eke thendi eshi, thirughane mumwange pangcamu dhendi.

⁸ Ngambi kenge di na kara nomumbiru kwawatawi wahe. Aye gha ni pire thitapa eshi, ni yuvithe mbudhi dhokudhira kuthothonona ghutungi waKristusi.

⁹ Ame na kona kuyuvitha waheya eshi Nyambi ghoMuvareki ghoyinu yoyihe, ngepi di ghana kurughanitha pan̂anyi‐n̂anyi dighano dyendi dyokunda, kutunda pa gha dyundeka mumyaka mathere nomathere.

¹⁰ Ene pan̂anyi‐n̂anyi, Nyambi ghana hokora ghunyanyami wendi ghoghukuru pangirishe dhendi, kwawaraghuri no kumangcamu ghomudiwiru.

¹¹ Thika di gha yiturekire thinda roruheya pakare eshi paKristus Jesusi, ghoHekudyetu, po mbo thirikanyenena mo thitambo thendi.

¹² Pamakupakerero pofotji Nendi, no pamatawero ghetu ghoMumwendi, atwe twa kona kuyenda kwaNyambi, kupira nowoma temba no ghukurupera.

¹³ Yo na kumukanderera eshi, mwa kasha pamurandu ghu na kumunyandera. Amwe, mwa kona kuyimona yira fuma.

Ndapero dhaPaghulusi kwaWakaefesusi

¹⁴ Yodigho na kutongamena ghurapera kughutho waTate.

¹⁵ Oku gha tunda mambunga ghomahe ghawatawi homudiwiru no hopamuve.

¹⁶ Ame kurapera na kurapera eshi, paMupepo wendi mughutungi wendi ghoghufumu mbo ha mupe ngcamu dhokumutanaritha.

¹⁷ Eshi Kristusi mbo gha tunge mumitjima dhenu pamatawero ghenu no mbo mu hoke muruhakitho no kutanara.

¹⁸ Ame na kumukanderera eshi, ngo mu tanare pofotji nawatawi wahe, ho mu tjwathane ghuyaghayu no kayenda no ghure no ghudhungi ghoruhakitho rwaKristusi eshi, papi rwahura.

¹⁹ Mu dimuke ruhakitho rwendi. Ruhakitho ru rwa piterera maghano ghetu. No ghuyara waNyambi ghumuyarere shemwa.

²⁰ Kukwendi yu twa wana ngcamu dhi dhina kurughana mumwetu, edhi dhina kututanaritha eshi, tu tende yishawingi yokupiterera yira yi twa kumberanga, ngambi yi twa ghayaranga.

²¹ Kukwendi difumanekero mumbunga, mumakupakerero naKristus Jesusi, pawakerekandongo wahe kate kuroruhe nororuheya. Amen.