Hakaefesusi 1 - Testamende Ghomupya Nopisalemi 1986

Mbapira Kwawakaefesusi

¹ Edhi dha tunda kwaPaghulusi, ghomupostoli waKristus Jesusi pamahimeno ghaNyambi. Kwawahe hoMuefesusi wa ha tawa mwaNyambi no mwaKristus Jesusi.

² Neke nothiraro thaNyambi kukwenu ghoWihetu no thaFumu Jesus Kristusi!

Makughero kwaNyambi kuthin̂eke thendi

³ Makughero kwaNyambi ghoWiha Hekudyetu Jesus Kristusi! Aye gha tu kandadheka mwaKristusi no makandadhekero ghaMupepo ghomahe agha ghadi mudiwiru.

⁴ Aye dyo gha tendire karo kughutho ghokuvareka kaye. Eshi twa pwire kutorora mwaKristusi, tu pongoke no tu tjimape kughutho wendi.

⁵ Paruhakitho rwendi, Aye mbo ghana tu tambwera pamahimeno ghendi ghothin̂eke, thika di gha yi pakirepo eshi, tu kare hanendi paJesus Kristusi.

⁶ Yodigho tu kughe Nyambi pathin̂eke thendi thothikuru, pakutapa Mwanendi nyara‐nyara kukwetu paruhakitho rwendi.

⁷ Pamanyinga ghaMwanendi, gha tu shuturire no gha dhimithire mirandu dhetu, pathin̂eke thaNyambi thothikuru,

⁸ ethi gha tupa mughunya‐nyami wendi ghoghuhe no thi tha vuritha yidimuka yetu.

⁹ Aye gha hima no gha nunga eshi gha tu yuvithe thithithatero thendi.

¹⁰ No yirikanye paKristusi mu nako dhi gha paka po. Yighayara yendi ne eshi, yoyihe yomudiwiru no yopamuve, yi kare kwishi dhomutwi ghofotji, eshi kwishi dhaKristusi.

¹¹ PaKristusi twa karera twe diko dyaNyambi, thika di gha yi pakire po Ye pamutango. Kemo dyo gha himine Ye. Aye yu gha kona kutenda thika di gha yi hima, kudinungo dyodighano dyendi.

¹² Yodigho, atwe twa kurupera mwaKristusi, twa kona kukugha ghukuru ghoghuhunga waNyambi.

¹³ PaKristusi mwa karera mwe diko dyaNyambi apa ha mu yuvithire ghushemwa, ghomakomweneno ghenu. Mwa dhi yuvire kate mwa tawire. MwaKristusi gha mu tarekire Nyambi naMupepo ghoKupongoka, pamaturekero ghendi eshi, mu kare hana Nyambi.

¹⁴ Mupepo ghoKupongoka ne thipaka po eshi natwe mbo tu wane eyi gha turekera Nyambi, apa mbo ha komonoka wahe wa, ha kundama kukwendi. Podigho ne, tu kone kutumera ghukuru wendi.

Ndapero dhaPaghulusi

¹⁵ Yodigho, kutunda pa na yuvire matawero ghenu ghokwaFumu Jesusi, noruhakitho rwenu rokwawatawi wahe.

¹⁶ Mbadi na shagheka karo mukumutumera Nyambi. Apa na mu vurukanga mumandapero ghange.

¹⁷ Na rapereranga eshi, Nyambi waHekudyetu Jesus Kristusi, Wiha ghodiko dyodiheya. Gha tape ghunyanyami kukwenu paMupepo no gha mu hokwere eshi, amwe ne mwa mu dimuka shemwa.

¹⁸ Ame na kumukumbera eshi, gha kuvishure mupepo ghomeho ghenu, mu kone kudimuka methero ghomakurupero ghenu, no ghutungi munye ghu mwa kuyora, oghu ha turekera hatawi.

¹⁹ No ngepi ghukuru ghongcamu dhendi dhi dha rughana mumwetu twatawi. Edhi dhongcamu dhofotji dhi dha rughana pangcamu dhendi.

²⁰ Edhi gha rughanithire apa gha tumunine Kristusi mwawafu, no dhi gha mu kun̂umekire kurudyo rwendi mudiwiru.

²¹ Oyu ne gha pitererire makuto ghomahe nomangcamu ghomahe, ngcamu noghuraghuri no kehe ghufumu ghu ghuna kuraghura, kadi ghonako dhino keho ene no ghu ghonako dhokughutho.

²² Kwishi dhendi gha tura Nyambi yoyihe. Aye gha mu yeyura kughutho ghoyoyihe, no gha mu paka gha kare yomutwi ghongirishe.

²³ Ngirishe ne yirama yendi, mayeraneno gha, gha rikanyithera mwawahe.