Haheburayi 6 - Testamende Ghomupya Nopisalemi 1986

¹ Twa porera kukuyuvitha pakutanga yinu yaKristusi. Atwe ne tu rikanyithe ghushemwa ghombudhi. Karo mbadi tuna kuhukuruka kughamba, kumapirukero ghomuyiparitha eyi ya reta, kufa, endi kumatawero ghomwaNyambi.

² Ngambi kumatawero ghomwaNyambi, yihonga yodiyoghero no makambekero ghonyara, muvumbukero wawafu no ndhango dhororuhe.

³ Yo tuna kuyirundurura shime kughutho oku ghana yi tutawedha Nyambi.

⁴ Ngeshi ghawa munekerire Nyambi hanu pakutanga no ha wanine yitapa yomudiwiru no ha yeranine kwaMupepo ghoKupongoka,

⁵ no kudimuka n̂ando dhodhiwa dhaNyambi nongcamu dhokaye kokughutho,

⁶ munyima ne gho ha wire karo, eyi ne ghukukutu kukwawo mu kuwahutha karo kumapirukero. Yoyishi, mumwawo hathinda ha pamarera shime no kumushamuna thitunumeho pakumusherera.

⁷ Eyi ne ya kara muve ghomushuwi‐shuwi ghomvura ghororuhe. Ngeshi ha ghu reta mukesho mwene kwawakakughuvunda, ghuna kupwa kukandadheka kwaNyambi.

⁸ Ene ngeshi ha ghu ngambwathana nomakona noghurugha, wa pira mudyo no nako dhina kukokere eshi, Nyambi gha tupe thikuto. Ghuhura wagho ne mudiro.

⁹ Keho mwahakwa, ngambi kenge tuna kughamba kemo tuna mu kurupera eshi, amwe ne mwahunga no mbo muna pu kughamwena.

¹⁰ Nyambi ne kadi muyi: Aye, mbadi mbo gha vurama yirughana yenu no ruhakitho ru mwa neghedha kuDina dyendi no kukarera hayendhenu thika di muna kuwakarera.

¹¹ Eyi ne yo twa hima thikuma eshi, kehe yu ghopapenu gha kare noghutoghoro ghogho, yira pakutanga kate mbo yirikanye yinu yi mwa kurupera.

¹² Yodigho ne mbadi mwa kona kukara nowoma. Ene mu kuthe thitamenedhi thawa ha dhidhimekire mumatawero no ha yeranine kuyinu yi gha wa turekerire Nyambi.

Ghushemwa ghomaturekero ghaNyambi

¹³ Apa gha tapire Nyambi maturekero kwaAbrahamu, mbadi pakarire ghumweya ghokupiterera yira Ye thinda, oyu sho gha tanarithere medhero. Yo gha kutanaritherire Thinda medhero,

¹⁴ no gha ningire eshi: “Yashemwa, Ame ne mbona, kukandadheka noghutungi no mbona kuvurithera thikuma hanahoka woye.”

¹⁵ Kemo dyo gha wanine Abrahamu eyi gha mu turekerire Nyambi, munyima dhokutaterera ghudhidhimeka.

¹⁶ Hanu ne ha tapa medhero koyu ghawapiterera. Kukwawo yi ne matanaritho ghon̂ando, nomedhero gha, gha tunditha po n̂anani dhodhihe.

¹⁷ Ene yoyishi Nyambi gha turekire kwawakakuyora matoyedhero eshi, manungero ghendi ghashipiraghuka, gha gha tanarithire Ye nomedhero ghomaturekero.

¹⁸ Yinu yiwadi yi, yishipiraghuka, maturekero nomedhero ya negha ghushemwa eshi, n̂ando dhaNyambi ne mbo dhina kara po. Ene kukwetu twe twa kara nomatjirero ghokukwendi, dha tu tjokedha nongcamu, mu kukwata makurupero agha gha tu turekera.

¹⁹ Makurupero ghetu, gha kara yira thidhughekitho thomoyo ethi tha tanara thokudhira kukunyunga‐nyunga no thi thonda muthifikitho thodiwiru.

²⁰ Omu mo gha tangerire kwingena Jesusi ghoMukamiti wetu, pamurandu wetu. No Aye mupristeri Shokuru yira Melgisedeki.