Filemoni 1 - Testamende Ghomupya Nopisalemi 1986

Mbapira dhokwaFilemoni

¹ Edhi dhina kutunda kwaPaghulusi, mukan̂otwa pamurandu waKristus Jesusi, namuyendhetu Timoteghusi. KwaFilemoni, ghomuyendhetu nomurughani pofotji netu,

² no kwan̂amba dhetu Afiya naArgipusi, ghomukayita muyendhetu no kwawambungakriste awa ha kongananga kehe pano mundhugho dhoye.

³ N̂eke nothiraro thaNyambi Wihetu naHekudyetu Jesus Kristusi thi kare nenu!

Ruhakitho rwaFilemoni nomatawero ghendi

⁴ Roruhe apa na raperanga, na kuvurukanga we no kutumera Nyambi.

⁵ Yoyishi ame, kuyuva na kuyuva ruhakitho nomakurupero ghoye ghokwaFumu, agha ghuna kunegha kwawatawi wahe.

⁶ Ndapero dhange ne dhino eshi, mbunga edhi twa wana pamatawero ghetu, mbo dhi kupe ghudhungi ghoghudimuka ghoyinu yoyihe yoyiwa, eyi twa kona kutenda kwaKristusi.

⁷ Ruhakitho roye rwa reta yishamberera yoyikuru nomatjokedhero. Yoyishi, owe muyendhange, yowe wa tanaritha mitjima dhawatawi.

Paghulusi ghana kughamwena Onesimusi

⁸ Yodigho, ngambi kenge na kara mwaKristusi nongcamu dhodhihe eshi, ni kuneghedhe yirughana eyi wa kona kurughana,

⁹ na kukukanderera pamurandu ghoruhakitho. Ethi no tho na kutenda me Paghulusi ghokukurupara nomukan̂otwa muDina dyaKristus Jesusi.

¹⁰ Ame kukanderera na kumukanderera pamwanange Onesimusi. Muno mun̂otwa mo na kara nowihe mumudhimu.

¹¹ Pakutanga, mbadi gha karire mudyo, pan̂anyi‐n̂anyi ne ghana kara mudyo kukoye no kukwange.

¹² Ame ne kutuma na kumukutumena ni mu kuhuthere, nomutjima wange ghoghuheya ghu yende nendi.

¹³ Yoyishi, kukwange pithange, ngo na mu pungura kukwange, gha ni karere oku me shime mun̂otwa pamurandu ghombudhi dhodhiwa.

¹⁴ Ene mbadi na kuhima kuyitenda oku mbadi ghuna ni tawedhera we. Yoyishi maghana sho yikare yirughana yoye yira yamuthineneko. Eyi no ne kumahimeno ghoye ghothinda.

¹⁵ Ngwa yo ya mu tundithire Onesimusi kukoye karuvedheghana eshi mbo gha kare ghoye roruhe.

¹⁶ Pan̂anyi‐n̂anyi, kadi shime yira mupika ene gha piterera thikuma mupika, ghomuyendhetu ghomuhakwa. Aye ne yomuhakwa ghokupiterera kukwange, ngepi keho mbo gha piterera thikuma kukoye yira munu nomuyendha mwaFumu.

¹⁷ Yodigho, ngeshi ho ni mono we yira nomuyendha mumatawero, mu tambure naye yira yame ghuna kutambura.

¹⁸ No ngeshi ghuyi gha kutenda endi mukudi gha kudyera, yipake pambapira dhange dhomukudi.

¹⁹ Apa no, yame Paghulusi na kuyitjanga nonyara dhange nothinda eshi: “Mbo na yiruwera.” Ame mbadi na nyanda kukuvurukitha eshi yowe dye ho ghu pire matumero ghokukwange.

²⁰ Kemo minange muDina dyaFumu ni ghamwene muyinu yino. Shambererithe mutjima wange yira mina mwaKristusi.

²¹ Ame na kurupera pakukutjangera eshi n̂anyi wa kutende, eyi na kwipura. Karo na dimuka eshi mbo ghuna yitendi ghothinda kupiterera yi.

²² Ni roghithere karo ndhugho dhange. Yoyi na kurupera eshi mumandapero ghenu mbo ghana ni hutha karo Nyambi kukwenu.

Marumeritho nofiyaghudhi

²³ Epafrasi muyendhange oyu twa kara nendi mun̂otwa, pamurandu waKristus Jesusi, naye ghana kutumena dirumeritho.

²⁴ Kemo karo nawarughani hayendhange haMarkusi, Arisitagusi, Demasi naLukasi, nawo hana kutumena dirumeritho.

²⁵ N̂eke dhaFumu Jesus Kristusi dhi kare nenu!