3 Johannesi 1 - Testamende Ghomupya Nopisalemi 1986

Mbapira Dhoghuhatu dhaJohannesi

¹ Mbapira dhino kukwange me mukuru dhina kutunda. Ho dhina kutamba kwaGayusi, ghomuhakwa wange shemwa.

² Gayusi ghomuhakwa, ame ne na kurupera eshi, owe ne mundjewandjewa ghu di, no yoyihe thiwana yina kukuyenda thika di wa rogha mupepo mumoye.

³ Ame na shamberera thikuma, apa heyire hatawi hayendhetu kuno, no kuthimwetwedha eshi ngepi di wa kara ghutjima mughushemwa no ngepi di wa para mughushemwa.

⁴ Mbadiko yishamberera yoyikuru yi ya kara mumwange, yokupiterera pakuyuva eshi, hanange ne mughushemwa hana kupara.

Maghamweno ghokwawa ha yuvitha Kristusi

⁵ Gayusi ghomuhakwa, owe wa tenda ghuhunga koyi wa rughana kwawatawi hayendhoye, nawa wa dhira kudimuka.

⁶ Awo heyire kuno no ha thimwetwedhire kughutho wawatawi yoruhakitho roye. Na kukanderera eshi, wa ghamwene kuruyendo rwawo rokughutho, thika di gha yi hima Nyambi.

⁷ Yoyishi awo ne muruyendo rokuyuvitha Kristusi ha di, no mbadiko thi ha wana kwawahayidena.

⁸ Atwe thothirughana thetu, thokutambura hanu ho kenge yoyi eshi, tu wane maghamweno ghokutapathanitha ghushemwa.

Mu koneke kwaDiyotrefesi

⁹ Ame ne na tjangire mbapira kumbunga dhawakriste wenu. Ene Diyotrefesi, oyu gha haka kukara mukamiti wawo, mbadi gha tawa kuyihima yetu.

¹⁰ Yodigho, apa mbo niya ko, mbo na na tuyaghura yinu yoyiheya yi gha tenda: Yoyishi aye ne gha tu yukitha momumango nombango edhi gha tongora kukwetu. Ene kadi yoyi pithayo keho, aye mbadi wa kutambura hayendhetu pakwiya. No awa ha haka kutenda yi, ghana kuwashinga no kuwatjidha mumbunga dhawakriste.

¹¹ Owe Gayusi ghomuhakwa, mbadi wa kona kukutha thitamenedhi thothimango. Kuthe thitamenedhi thothihunga. Yoyishi, oyu ghana kutenda yoyiwa ne waNyambi. Noyu ghana kwipitha, mbadi gha mona Nyambi.

¹² KwaDemetirighusi, ha nongonona wahe yoyiwa kukwendi, no ghushemwa ne wa yi tanaritha. Natwe karo kunongonona tuna kuyinongonona. Nowe ghuna dimuka eshi, yinongonona yetu ne yaghushemwa.

Mahurero

¹³ Na kona karo kukutongwera yinu yoyingi. Ene mbadi na haka kuyitjanga.

¹⁴ Ame na kurupera eshi, na kukumone wangu, ndani po twa kona kughambaghura pithetu pofotji.

¹⁵ Thiraro thi kare noye. Hayendhetu wano kuno, hana kutumena dirumeritho. Tape karo dirumeritho dyange kwawayendhetu awa ha di ko, ene kwakehe yu pithendi‐pithendi.