2 Hakorinte 3 - Testamende Ghomupya Nopisalemi 1986

Hakareri hoghundambo ghoghupya

¹ Tu tangeo karo kukukugha twathinda ndi? Endi tu mu rawere pakumutjangera mbapira, yira hamweya ngambi yi mwa haka mwe?

² Amwe ne yamwe mwathinda mwambapira dhomarawero ghetu, edhi dhapwa kutjanga mumitjima dhetu. Edhi sho ha toye wahe no kudhitjwathana.

³ Eyi ne kuyimonenena vene eshi, yamwe mwambapira dhaKristusi, edhi dhapwa kutjanga payikarera yetu. Kadi noingi, ene noMupepo waNyambi ghomuyumi. Kadi payikwere yomawe, ene mumitjima dhawanu.

⁴ Eyi tuna kuyighambera yino, yoyishi paKristusi twa wana makurupero ghokuyara kwaNyambi.

⁵ Kukwetu twathinda ne, mbadi twa kona kukughayarera eshi, n̂anyi kushwaghe thinu. Eyi ya tu fumanena ne, kwaNyambi ya tunda.

⁶ Oyu gha tu tenderire yi ya tu fumanena, tu kare twakareri hoghundambo ghoghupya. Kadi pathitjanga, ene paMupepo. Thitjanga ne kupagha, Mupepo ne kuparitha.

⁷ Muragho ghu ha tjangire payikwere yomawe, wa hokokire muyishamberera. Yishamberera yi ya shanine kutunda po wangu, ya rwedhimine thikuma murupara rwaMosesi. Kate ha dhirire Haisraghelite kukona kumukenga. Ngeshi ghukareri oghu wa tambire kuyifa, weyire rwingi mughuwa,

⁸ ngepi di mbo ghudhira kupiterera ghukareri ghokutunda muMupepo?

⁹ Ghukareri ghu ha teterire ndhango hanu, weyire mughushemwa. Ene ghukareri ghu ha thighererire hanu wa yakunukire thikuma kughushemwa.

¹⁰ Twa kona kuninga eshi, ghuwa ghopakare‐kare, mbadi twa kona kughurikanyitha kughuwa ghu ghuna kupiterera pashadyarero.

¹¹ Ngeshi wa dhongonoka ghuwa ghuya wa rwedhimine, mbo ghuna rwedhima shime kupiterera pakutanga.

¹² Yoyishi oku shime twa kuruperera, tuna kutjinaghana po noghutjimapa ghoghukuru.

¹³ Atwe ne kadi thika Mosesi yu gha kufikererire thihina kumeho ghendi. Eyi gha yi tenderire yi, eshi maghana sho di mone diko dyaIsragheli, edi sho thi dhongonoke thishe.

¹⁴ Yighayara yawo ne, ya yandherire. No pashadyarero shime ya yandherera yighayara yawo, nothihina pakutoya ghundambo ghoghukuru‐kuru. Ene thihina thiya kuthifikura Kristusi, kwamunu yu ghana kutawa mumwendi.

¹⁵ Ngambi pashadyarero karo, ngeshi ku hana kutoya miragho dhaMosesi, shime tha wa fikerera thihina kumaghano ghawo.

¹⁶ Muragho waMosesi ne wa ninga ngeno: “Roruhe ngeshi yu ghana kupiruka kwaFumu, hana kumufikura thihina.”

¹⁷ “Fumu” yu hana kuninga pano ne “Mupepo” no oku wa kara Mupepo waFumu ne, horo kwakara.

¹⁸ Yodigho twahe, twa dimuka ghuhunga waFumu. Yoyi hana tu fikura thihina kurupara. Twaheya gha hima kutupituritha thikuma kuthishwi thaKristusi. Ghuwa ghu wa tu rwedhimenine, shime ha ghu runduruka kughutho. Eyi yo ghana kutenda Fumu ghoMupepo.