1 Petrusi 3 - Testamende Ghomupya Nopisalemi 1986

Yikara yopakatji kamurume namukamadi

^1-2 Mwakamadi, mu kare ghutawedhi kwawatutughuru wenu. Ngeshi pohadi papenu awa ha kara nawatutughuru wa ha dhira kutawa n̂ando dhaNyambi, nawarume ha mone eshi, ngepi di mwa yapa Nyambi mwe, no ngepi di muna kukara thitamenedhi thothiwa. Awo nawo mbana kara hakaKristusi payikara yawakamadi wawo. Namwe mbadi mbo mu nyanda karo kughamba n̂ando.

³ Ghuwa vene wa kara peghuru keho, yira ndjendja, mangondo no yivata yokukuyenga.

⁴ Eyi ne mbadi kemo, Yikuyenga yenu ya kona kukara mwimi dhamunu: Ayo ya kona kukara yihunga no muthipore thoMupepo. Yinu yino ne ya kara mudyo thikuma kwaNyambi.

⁵ Pakare‐kare, kemo ha kuyengangire karo hakamadi awa ha kuruperire mwaNyambi. Keho awo, ha karire ghutawedhi kwawanu wawo.

⁶ Sara ne yothitamenedhi kwaAbrahamu no gha mu fumanekire. Ngeshi ha mu tendi ghuhunga no mbadi wa kuyapa mushedho, amwe ne mwa kara mwan̂amba dhendi.

⁷ Mwatutughuru, mwa kona kupara pofotji thiwana nawakamadi wenu. Mu neghedhe dikuto kukwawo. Yoyishi, awo ne hanu hohakashu awa mbo mu kayora nawo mumoyo yitapa yothin̂eke. Munyima, po mbo mu kona kuraperera no mbadiko thi mbo thi mu shinga.

Ngepi di sho gha kone kukara kehe yu

⁸ Paghuhura: Mu kare mwahe nomutjima ghofotji, yighayara yofotji, mu kare noruhakitho rokuyara, nothin̂eke no mukukumbirupitha.

⁹ Mwa kuhutheranga maghuyi ghenu, ngambi dishamu nodishamu. Karo ne mukuhuthangere nofiyaghudhi. Yoyishi, yo gha mwithera mbo mu kone kuwana makandadhekero ghaNyambi.

¹⁰ Yapwa kutjanga eshi: “Ngeshi yu gha haka moyo no kurumbera moyo ghorure noyipara yoyiwa, gha shinge ndani rudimi rwendi kuyighamba yoyiyi no miromo dhendi dhi thighe yishewe.

¹¹ Tunde kughuyi no tende ghuhunga, shane thiraro no ghuthitambe!

¹² Fumu ne gha kenga kwawanongo no gha tegherera kumaghamweno ghawo, ene wa hana kutenda ghuyi, gha weman̂anyena.”

Eyi ne, ya roha mukunyandera yoyiwa

¹³ Yidye gha kumunyandeka oku muna kutoghoropa kuyinu yoyihunga?

¹⁴ Ngambi yamwe mwathinda, ngeshi ha munyanda yoyishi yoyihunga muna kutenda, ene mwa kona kuyimona yira yiwa, mwa yapa kwawanu ngambi kwahe yu no mwa kudhekera kokuhe thinu.

¹⁵ Mumitjima dhenu ghu kare mo ghupongoki no fuma dhokwaKristusi ghoFumu. Mu kwinduke roruhe kumahuthero gha kehe yu ghana kumwipura matjwathanithero ghomoyo wenu.

¹⁶ Ene muyitende mumakukongwero, nomumakutekero ghokwaNyambi. Mu koneke eshi yihima yenu ne yiroghe ndani, eshi awa, kemo hana kumushwahura muyikara yenu yoyiwa yomwaKristusi, hafe honyi, yoyishi ha mu nyandeka.

¹⁷ Ngeshi ngo ghomahimimeno ghaNyambi eshi, mukone kunyanda, yoyishi ghuhunga muna kutenda. Eyi ne hasha mukunyanda kemo, kupiterera mukutenda ghuyi.

¹⁸ Naye Kristusi karo gha nyandire parofotji kumaharwero, mukakupira murandu, kwawayiharuri, mukutwara mwe kwaNyambi. Aye ha mu paghire yira munu, ene paMupepo gha karire muyumi.

¹⁹ Kemo dyo gha yendire kwawadhimu homun̂otwa, no ko gha ka yuvithire mawithero ghendi.

²⁰ Awa ne wodiwo wa ha karire ghuthururu kwaNyambi, awa gha kudhekerire apa gha tapire kwaNoghe nako dhokutenda dyato. Awo ne hapu awa ha karire mudyato, hanu kwoko nohahatu vene muthitara,

²¹ awa ha parire kumeyu, eyi ne kunegha yina kukunegha padiyoghero, apa muna pu kughamwena namwe karo pan̂anyi‐n̂anyi. Diyoghero ne mbadi dya kushura didhiro dyopayirama vene, ene dya kumbera kwaNyambi ghukushuki ghoyighayara no dina di dya mu ghamwena pamuvumbukero waJesus Kristusi.

²² Pan̂anyi‐n̂anyi, Aye ne kurudyo rwaNyambi gha di kumupa marawero ghokwawaengeli no ghawakamakuto nawakamangcamu no gha dhinine mudiwiru.