1 Petrusi 2 - Testamende Ghomupya Nopisalemi 1986

Diko dyaNyambi dyapwa kushokeka pakashemandhugho mwene

¹ Mu thighe ne keho yinu yoyiheya yoyimango, mbango dhodhihe difurumeko, nya, no ghuhothi.

² Thika di ha shananga hatumbututu wa hana shamuruka dyarero manhwe, kemo sho mu kone namwe kurura manhwe ghomumupepo mwene eshi, mbo mu kone kukukorera papagho no mbo mu wane ruvigha.

³ Amwe ne mwa dimuka kare eshi, Fumu ne munongo.

⁴ Mwiye kuKwendi, diwe dyomoyo, edi ha nyatha hanu. Ene Nyambi gha di torwera kudyango dyodikuto.

⁵ Mwiye yira mwamawe ghomoyo, ha mu tende ndhugho dhokupongoka. Omu sha kare hapristeri hokupongoka no kuyamba miyambo dhokupongoka, paJesus Kristusi edhi gha menya‐menyenaNyambi.

⁶ Yodigho ya ninga muYitjanga eshi: “Mu mone, Ame ne diwe dyodishonga na kupaka muSiyoni edi na torwera mudyango dyodikuto. Oyu ghokutawa muMwendi, mbadi mbo gha fa honyi.”

⁷ Amwe mwa tawa ne, mwa yerana kufuma dhi. Ene kwawa ha dhira kutawa, gha tamba kukwawo man̂ando ghano eshi: “Diwe di ha mwagha hakakumba, shemwa dyo dina kara mudishonga.”

⁸ No karo eshi: “Dyodiwe di ghana kupunduka munu no dyodimuwe di dya kukuwitha.” Awo ne kupundadhoka hana kupundadhoka, yoyishi ha thururu kun̂ando. Eyi ne dyo gha yi wa himenine Nyambi.

⁹ Yoyishi, amwe karo mwadiko di dyapwa kutorora, mbunga dhoghupristeri dhodhifumu, diko edi gha kupongwera Nyambi kukwendi, diko dyaNyambi thinda, diko edi dya yuvithire yitenda Yendi yomakomweneno, yoyu gha mu tundithire mumakokore nothishe thendi thothitetu.

¹⁰ Pakutanga, mbadi mwa karire mwe eshi mwadiko. Ene pan̂anyi‐n̂anyi, mwakadiko dyaNyambi mwe.

Mu roghithe kehe pano yikara yenu

¹¹ Mwahakwa, muno mukaye mwagenda no mwanumaghana. Yodigho na kumutongwera ghumutjokedha eshi, ngo mu yakunuke kuyirumbera yoyiheya. Eyi ne ya pagha vene moyo wamunu.

¹² Mu kare roruheya thiwana mukatji kawahayidena, no ku hana kughamba kukwenu eshi amwe ne mwapaghi, awo ne mbo ha kone kumona thitamenedhi thoyipara yenu, no kufumaneka Nyambi mudiyuwa dyondhango.

¹³ Yoyishi, kemo gha yi hima Fumu. Amwe mwa kona kukutapa kwawamayami, ngambi kwamuraghuri shokuru oyu gha kara nongcamu pan̂anyi‐n̂anyi,

¹⁴ ngambi kwawamarena awa ha wana ngcamu dhokukona kutetera yu ghana kutenda ghuyi, ene kwamukakutenda ghuhunga ne hana kumukugha.

¹⁵ Agha ne mahimeno ghaNyambi eshi, amwe ne mu kone kutenda ghuhunga. Mahurero ne mbo ghana kara koyu ghana kughamba ghuthuta.

¹⁶ Amwe ne muhoro mudi. Ene mwa tenda horo mudifurumeko pakutenda ghuyi. Horo dhenu ne mu dhirughanithe mukukarera Nyambi.

¹⁷ Amwe ne mwa kona kufumaneka hanu wahe no mu hake hatawi hayendhenu. Mu yape Nyambi. No mu kutekere muraghuri.

Kristusi ne thitamenedhi thawakakunyanda

¹⁸ Mwapika, mukutape no kukumbirupitha kwawahekudyenu, ngambi ku ha kara nothin̂eke noghunongo, ngambi ha kenya.

¹⁹ Mukathin̂eke, oyu gha dhidhimeka tjitju dhoyinyanda eyi ya dhira kumutamba. Yoyishi makurupero ghendi ne mwaNyambi gha kara.

²⁰ Ngeshi ha mu humbitha mwe oku muna reghi, fuma munye mbo mu wana oku muna yikakatera yoyo? Ene mukukara ghudhughutjima muyinyanda yenu, oku ghuhunga muna kutenda, mwa wana n̂eke dhaNyambi.

²¹ Shemwa payinu yino namwe mwapwa kwitha ko. Yoyishi naye Kristusi gha mu nyanderire no gha mu pire thitamenedhi karo eshi, mu kone kukutha ndhira dhendi.

²² “Aye ne mbadi gha tendire murandu no mbadiko n̂ando dhombango.”

²³ Apa ha mu shamunine, Aye ne mbadi gha huthire dishamu, apa gha nyandire, Aye ne mbadi gha kunyanganyine, ene gha thighire yoyiheya koYu gha pangura ghuhunga.

²⁴ Aye thinda gha shimbire mirandu dhetu muyirama yendi kuthikurushe. Opo, po twa fera kumirandu no twa tumuka paghuhunga. Payitombo yendi po mwa pwire kwirukitha mwe.

²⁵ Amwe ne mwa yongarire yira ndjwi. Apa no ne muna huka kwaMudithi wenu no mukungi ghomoyo dhenu.