1 Johannesi 3 - Testamende Ghomupya Nopisalemi 1986

¹ Mu mone kuruhakitho rorukuru oru gha tu neghedha Wihetu: Aye kutoya ghana kututoya eshi twana Nyambi. Ene shemwa yatwe twanendi. No kaye mbadi ka tu dimuka, yoyishi, mbadi ka mu dimuka Naye.

² Mwahakwa, pan̂anyi‐n̂anyi, twana Nyambi tudi twe. Apa no mbadi yina hokoka eshi ngepi di mbo tu kara. Ene tuna dimuka eshi, apa mbo gheya Jesusi, mbo tuna kara thika Ye. No mbo tuna ka mu mona thika di gha kara.

³ Yomuhe ghokundhundha kumataterero ghokuKwendi, ghana kushuka thinda thika di gha kushuka Jesusi.

⁴ Kehe yu ghokuharura, ghana reghi muragho waNyambi. Yoyishi roruhe diharwero ne mareghero ghokumuragho waNyambi.

⁵ Amwe mwa yidimuka eshi, Jesusi ne gheyire kukutunditha maharwero. Aye ne mbadi gha karire nodiharwero muMwendi.

⁶ Oyu ghokukara muMwendi, mbadi ghana kuharura shime. Oyu ghana kuharura mbadi gha mu mona panganyi no mbadi gha mu dimuka.

⁷ Mwanange homwahakwa, mwa kutoperera eshi gha mu pemukithe ghumweya: Yoyishi kehe yu ghokupara ghuhunga ne muhungami, thika di gha kara Ye muhunga.

⁸ Thiharuri ne gha kara washadipinyi. Yoyishi shadipinyi, thiharuri kutunda kumatangero. No Mwana ne gheyire na gha tundithe po yitenda yashadipinyi.

⁹ Oyu gha kara mwana Nyambi, mbadi ghana kuharura shime, yoyishi Mupepo waNyambi mumwendi wa kara. No mbadi gha kona kuharura karo. Yoyishi ye ne mwana Nyambi.

¹⁰ Apa no po sho tu dimukere eshi, hadye hana Nyambi no hadye hana shadipinyi. Oyu ghokudhira kupara mughuhunga no ghokudhira kuhaka muyendhendi, aye ne mbadi mwana Nyambi.

Mukuhake pofotji

¹¹ Edhi ne dhombudhi dhi mwa yuvire pakutanga eshi: Tu kuhake.

¹² Mbadi mwa kona kukara yira Kaghini. Aye ne kwaMwipithi gha kundamine, kate kupagha minendi. No pashanye gha mu pagherire? Yoyishi, yitenda yendi thinda, yimango ya karire. Yaminendi ne yihunga.

¹³ Mwayendhange, mwa tetuka ngeshi ha ka mu dhimbi kaye.

¹⁴ Twa yidimuka eshi, twa tunda mukufa ho twa yenda kumoyo. Yoyishi, twa haka hayendhetu. Oyu gha pira ruhakitho, mukufa gha kara.

¹⁵ Kehe yu ghokudhimba muyendhendi ne mupaghi. No mwa dimuka eshi, mupaghi ne mbadi gha kara nomoyo ghororuheya mumwendi.

¹⁶ Apa no po sho tu dimukere eshi gha tapire moyo wendi kukwetu. Natwe karo twa kona kutapa moyo wetu kwawayendhetu.

¹⁷ Oyu gha kara noghushwi ghopamuve no mbadi ghana kuthotera kunyanda kwamuyendhendi — ngepi di rwa kona kukara ruhakitho rwaNyambi mumwendi?

Yikara mwene kughutho waNyambi

¹⁸ Mwanange homwahakwa, ruhakitho rwetu mbadi rwa kona kukara pan̂ando no pamiromo keho. Ene twa kona kuruhokora noyitenda yetu, no mughuhunga.

¹⁹ Apa no po twa kona kuyidimukera karo eshi, atwe twa kundama kwaNyambi ghoshemwa, no mitjima dhetu dhi kone kuhedhumuka thiwana kughutho Wendi.

²⁰ Ngeshi ha yi tu tetera yighayara yetu — Nyambi ne gha piterera yighayara yetu. No gha dimuka yoyiheya.

²¹ Mwahakwa, ngeshi ha yidhiri kututetera yighayara yetu, twa kara nomatjimapero ghokuyenda kwaNyambi.

²² No eyi tuna kukumbera, tuna kuyiwana kukwendi. Yoyishi twa kara noghutawedhi kumiragho dhendi no kutenda eyi ya mu roghera.

²³ Muragho wendi ne ghuno eshi: Twa kona kutawa mwaMwanendi Jesus Kristusi, no tu kuhake ho tu kupakerere mumuragho oghu gha tu pire Ye.

²⁴ Oyu ghokukara ghutawedhi kumiragho dhendi, mwaNyambi gha kara naNyambi ne mumwendi. Twa kona kuyidimuka pano eshi mumwetu gha kara: Yoyishi Mupepo wendi gha tu pa.