1 Johannesi 1 - Testamende Ghomupya Nopisalemi 1986

Mbapira Dhokutanga dhaJohannesi N̂ando dhomoyo

¹ Kutunda pamatangero, Aye gha kara po kare. Atwe twa mu yuva twathinda. Kemo, natwe twa mu monine nomeho ghetu twathinda no twa mu kundamine nonyara dhetu.

² Aye ne yoN̂ando no Moyo. Moyo ne ghuneya. Natwe tuna mu mono no twatunonga, ho tuna kumuyuvitha Moyo Ghororuheya oghuwa karire kwaWihe, no ghu wa hokoka kukwetu.

³ Oyu twa monine no kuyuva, Aye ne yo tuna kumuyuvitha eshi, ngo mu kone kuyerana kumakupakerero ghetu. No makupakerero gha twa yerana twe ne, pofotji naWihe naMwanendi Jesus Kristusi.

⁴ Eyi tuna kuyitjangera yi ne eshi, yishamberera yetu ne yi kone kuyarerera.

Nyambi ne munyenge

⁵ Edhi no ne dhombudhi twa yuvire no dhi twa mu yuvithire eshi: Nyambi ne yoMunyenge. No muMwendi ne mbadimo makokore.

⁶ No ngeshi ha tu ghayara eshi twa yerana kukwendi no kupara mumakokore, twakambango twe no mbadi tuna kutenda thika di wa yenda ghushemwa.

⁷ Ene ngeshi ha tu para mumunyenge thika di gha kara Ye mumunyenge, tuna kuyererana mumakupakerero ghofotji Nendi, manyinga ghaJesusi ghoMwanendi ghana kukushura maharwero ghetu.

⁸ Karo ngeshi ha tu ghayara eshi, twa pira maharwero twe, twathinda tuna kukwangera no mbadimo ghushemwa mumwetu.

⁹ Ene ngeshi ha tu nongonona maharwero ghetu, Nyambi ne mutawedhi no muhungami. No ghana kututhigherera maharwero ghetu, no kutukushukitha kumaghuyi ghomahe.

¹⁰ Shime ngeshi ha tu ningi eshi, kadi wa kuharura twe, tuna kumutenda Ye eshi, mukambango no n̂ando dhendi ne mbadimo mumwetu.