1 Hakorinte 4 - Testamende Ghomupya Nopisalemi 1986

Ghukareri wawapostoli

¹ Dyo sho mu tu mone eshi twe ne twakareri waKristusi. No hayendithi wa ha taperire yithithatero yaNyambi.

² Kwamuyendithi ya kara eshi shimengwa yu ha kurupera.

³ Ene kukwange, mbadiko no kamana temba makurupero ghopapenu, ghokutetera ngambi ndhango dhodipuna dyopathinaghunu. Karo kemo mbadi na kona kukutetera nothinda ndhango.

⁴ No mbadiko karo thi thina kupetha manghano ghange. Ene mbadi yina kuninga karo eshi me ne ha yi ni fundhwera.

⁵ Yodigho mbadi mwa kona kutetera kughutho, oku mbadi gha neya Fumu. Oyu mbo gha reta yinu yokunda muthishe no kuhokora yighayara yomumitjima. No kehe yu mbo ghana tambura makughero kwaNyambi. Agha mbo gha tunda kwamunu thinda.

⁶ Mumatjwathanithero ghano mwayendhange, na karire nothinda naApolosi yira yitamenedhi yokumuhonga, eyi dya ninga ditandhi dino eshi: “Kare mumiyindha dhi gha paka po Nyambi.” No mbadiko yu mbo gha kumona thinda yira ghumweya eshi, gha piterera mitiri wendi.

⁷ Yidye gha kuhokora kughutho? No nye yi wa muna yi wa dhira kutambura?

⁸ Mwa wana yoyihe yi mwa rumbera: Amwe kare mwa tunga! Atwe ne mbokapwe. Ngeshi ngo mwa karire shemwa mwafumu, ngo pofotji twa raghurire nenu.

⁹ Ame na kuyimona eshi, Nyambi gha tupire twapostoli dyango dyoghuhura yira hanu wa ha teterire mukufa muarena. Atwe tuna kara twayineghidhitho yokaye, no yawaengeli no yawanu.

¹⁰ Atwe ne twathuta pamurandu waKristusi, amwe ne mwakamaghano mwaKristusi, atwe ne twakashu, amwe ne mwatanavu, mudikuto mwa kara mwe, atwe ne mudishamu.

¹¹ Kate pakapupi kano, ndhara no dinota tuna kufa, ghuhepwe ne ghuna tu kokera no kunyandeka hana kutunyandeka. Kufambaghera tuna kufambaghera

¹² no ghukukutu tuna kurughana nonyara dhetu. Kusherera hana kutusherera, mahuthero ghetu ne makandadhekero ghofiyaghudhi, hana kutukutha‐kutha, atwe ne pakudhidhimeka.

¹³ Kushamuna hana kutushamuna, atwe ne pakuwanongopa. Atwe ne twayinu yoyimango pano pamuve, twadikangafudhi dyoyipara, nopashadyarero shime kemo.

¹⁴ Yinu yino, mbadi na kuyitjanga kukumufitha honyi. Ene kukumuneghedha ghuhunga, mwanange homwahakwa.

¹⁵ Yoyishi ngambi ngo mu kare nohahongi mayovi mwaKristusi, mbadi mwa kara nawawihenu hohengi. Pamayuvithero ghombudhi dhodhiwa, na kara nowihenu mwaKristus Jesusi.

¹⁶ Yo na kumutjokedhera eshi: Mu kuthe thitamenedhi thange!

¹⁷ Payinu yino, po na tumena Timoteghusi ghomuhakwa kukwenu. Mwanuke ghomatjimapero mwaFumu. Aye mbo ghana mu vurukitha yipara yange noyihonga yomwaKristus Jesusi, eyi na mu hongire kokuhe mu kehe mbunga.

¹⁸ Hamweya hopapenu, ha ghayarire eshi mbadi na kwiya karo kukwenu no ha tangire kunyeghenya.

¹⁹ Ene tamba na kwiye kukwenu ngeshi gha kuhime Fumu. Po mbo na ni dimuka nothinda hakadihuna. Kadi payighamba yawo, ene payitenda yawo.

²⁰ Yoyishi ghutungi waNyambi, mbadi wa kara muman̂ado, ne mungcamu.

²¹ Nye muna torora po? Na kwiye notjupa kukwenu ndi, endi muruhakitho no mumupepo ghoghuhunga?