Zephaniah 3 - Ohiatonhseratokénti

¹ Ah, sateʼnikonraksáton, tánon senhtatsáton, iakothorahrákon kanatowanenhkó꞉wa.

² Iáh tehiotewenhnaráhkwen nowén꞉na; iáh tehioienàhon nahonsakonwatakwahríshion; iáh teoniahésen ne Roiá꞉ner; iáh ákta teiawéton ne aoní꞉io í꞉ken.

³ Ne rathirihwakweʼní꞉ios nahonkweʼtashón꞉as kwáh né꞉ne kénreks ronatonhriáien, nahonkweʼtashón꞉as ratirihwéntha kwáh né꞉ne oʼkarasné꞉ha nokwáho rotistsiokánon tsi nió꞉re ienhiórenhne

⁴ Nahonkweʼtashón꞉as ne rotitokénhse, kwáh iáh othé꞉nen tehonsterístha, iotonhkweʼtákterons; nahotsihénstatsis rotihetkénhtons ne iotokéntis nahoʼténhsons; tehotihiákon ne kaianerénhsera.

⁵ Ne Roiá꞉ner ahotióhkwakon í꞉res kwáh rorihwakwahríhshion; kwáh iáh tahóthen thatahaterientawénhrie. Niatehioronhketsherá꞉ke iáh taorihwanó꞉ron naontahátkawe ne raorihwenhtátshera, Ók ne iáh tehiakoiánere iáh teierihwaienté꞉ri onhní꞉ioht nahiontéhen.

⁶ Khehiákse nonkweshón꞉as; ne tsi kanikató꞉tons ne tsi tekashiosakérons ne wathenhénrote iorihwenhtásherons; wakatieshatánion ne tsi tekanatokenhátons ne raotinatákons, ne káti ne kwáh tó꞉sa ónhka thóh nón꞉we nahiontohéstake; iáh ónhka ne rónhkwe thóh nón꞉we tehanákere ne raotinatá꞉kons.

⁷ Waʼken, “Orihwiiohón꞉we tsi kwáh ensetkweniénstake tánon enshéna naká꞉wenk ne tiakohaharáhtha. Káti iáh tahonatsiatʼse tsi nón꞉we nihatinákere akwé꞉kon nienhatiié꞉na tsi nahoʼténhsons káhi ne rononhà꞉ke.” Ók iostó꞉re tsi wathatí꞉taʼne tánon iahontashónteren wahatirihwahetkénte akwé꞉kon tsi nihonatiéren.

⁸ “Ne káti aorí꞉wa, takwahteráhrat” ráton ne Roiá꞉ner, “asè꞉ken ne thóh enwenhniserá꞉teke kwáh thentekʼtane tsi ní꞉ioht ne ronwathonkwetawenhtháton; asè꞉ken tsi natewatiatoréton ne nakheiataró꞉roke nonkweshón꞉as, nakeró꞉roke tsi nionakeráhsera ne ronnontí꞉io ne nahontakawé꞉ron nakenakwáhtshera rohnonhà꞉ke; akwé꞉kon tsi niiotarí꞉hen nakenakwáhtshera kwáh ohontsakwé꞉kon otsiráhke enwát꞉tsa ne tsi niwakatekéffen.

⁹ “Asè꞉ken ethò꞉ne kwáh tensetʼteni nonkweshón꞉as tsi ní꞉ioht tsi ronhtátis né꞉ne orihwí꞉io tsi ahonsahontrorísehke, ne káti ratikwé꞉kon ahónton nahatináton ne raoshén꞉na Roiá꞉ner, ne nahonwahiò꞉tenhse skaʼnikónhrat khók akénhake.

¹⁰ Tsi nieiawè꞉non ne kaionhatátie ne Cush, ne tehonaréhnion akonkweʼtashón꞉as entiontʼkhawíthen naká꞉wenk athatawí꞉tshera.

¹¹ Ne é꞉tho enwenhniserá꞉teke, kwáh iáh tesatehénsehke nakwé꞉kon tsi nisahiothénhen ne tsi thóh nitsawéhnon tsi wasehrihwanérake ne tsi naskatkónten; asè꞉ken ethò꞉ne kwáh é꞉ren enkheiathenháwite ne sewanenhrí꞉hen ne ionhtatón꞉ni ne iontaʼtsenhnakaráhtats, tánon iáh shé꞉kon nahonsashatatkowánenhke nakenonhtatokentíke.

¹² Tánon thóh sewanenhrí꞉hen enkhetéron ne iakonithénton tánon ne iáh tehionthatón꞉ni; tánon kwáh ne enhiakésake nahiontekwáhsen thóh raoshén꞉nakon ne Roiá꞉ner.

¹³ Ne niateonathaténhron ne Israerró꞉nonhke kwáh iáh othé꞉nen thatahonterienʼtawénhrie, khés ne thé꞉nen ahontá꞉ti nonhó꞉wen; iáh ó꞉ni ne kaʼnikonhráthon nawenhnáson thakaktséronhke ne tsi ratisakáronhte; tsi thenhonskáhon tánon enhontsiatiónhnite, tánon iáh ónhka tahonwatiʼterónhkwen.”

¹⁴ Tesahénret, saiénha Zion; tesahénret, Israel; satonhnáren tánon satonhnárat kwáh serhiasakwé꞉kon, saiénha Jerusalem.

¹⁵ Ne Roiá꞉ner éhren rohawí꞉ton ne karewathátshera ne shonhà꞉ke; sehsakoktháton ne iesásons; ne Ronhnontí꞉io Nisraeró꞉nonke, né꞉ne Roiá꞉ner, sewanenhrí꞉hen í꞉res tánon iáh shé꞉kon tahonsehsewatkátho ne karihwahetkénhsera.

¹⁶ Ne thóh enwenhniserá꞉teke enkonwénhase ne Jerusalem, “Tó꞉sa satéron, ó꞉ni ní꞉se Zion! Tó꞉sa tasanéntʼtsen!”

¹⁷ Né Roiá꞉ner sah Ní꞉io sewanenrí꞉hen í꞉res; roshatstenhserowá꞉nen tánon énthion natesenhniétshera; kwáh shonhà꞉ke nón꞉we nenhatonhnáren, kwáh atsenhnonhniatsherá꞉kon tsi á꞉se enshiónhni ne raonoronhkwahtsherá꞉kon, tenhohénrehte tsi nihotsenhnón꞉ni ne shonhà꞉ke tsi natehorihwákwen,

¹⁸ kwáh thoʼnenhiotonhake tsi niiot newatenikonrori. Kwáh é꞉ren etkháwite ne kakaronhniá꞉tshera ne shonhà꞉ke; ne káti ne tó꞉sa asatkéthate ne atehénhsera.

¹⁹ Ensewatkáto, ne thóh nenkahá꞉wike kwáh í꞉ih enkherewate nonkweshohas ne ietsironhiakentha; kwáh ensekhetsénhte ne iontsinokátha tánon ensekhehiaʼtaró꞉roke ne teiakoréhnion; tánon kwáh ne thensetkarateniáte ne raonatehénsera nahonsahonatkwenienstónhake, tánon kwáh tesetkhetáste tánon enhatiié꞉na ne kakwenienstátshera kwáh tsi niateionhontsáke tsi nón꞉we nihonatehén꞉en.

²⁰ Né thóh nenhkahá꞉wike, kwáh tentkwahiathénhawe tánon skátne tsi enskwahiaʼtaró꞉roke, asè꞉ken kwáh enkwasenhnowánate tánon thenkwarenhsarónhnion tsi ratinakerénion nonkweshón꞉as ne tsi ionhontsá꞉te; ne nó꞉nen satontakwáhion ne sewathatewenhnihiósera ne ohénton tsi natesewakanérakwe, ráton ne Roiá꞉ner.