Zephaniah 2 - Ohiatonhseratokénti

¹ Sewatkenhní꞉sa tánon skát꞉ne sewatsataró꞉rok, í꞉se tiónkwe ne iáh tesewatehenserá꞉ien,

² nohénton ne kaianerénhsera aontónnhete nohénton ahontenhniseró꞉hetste, tsi ní꞉ioht ne káwahe ne tsi iahóte ká꞉tses; nohénton ne nón꞉we nahisewárane tsi niotenakwawenhráti Roiá꞉ner ahisewárahne nohénton ne raonhakwáhtshera ne Roiá꞉ner ahisahráne.

³ Tsi sewahiatí꞉sak ne Roiá꞉ner í꞉se seweriasí꞉ios ne tsi nionhontsá꞉te, ronónha ratísehre ne raorihwataʼtsheras; sewésak ne karihwakwahrihsónhtsheras; sewésak ne skén꞉non nonhtié꞉rek kwáh enietsihiataséhte nenhtewenhniseráteke ne Roiá꞉ner.

⁴ Asè꞉ken ne Gaza kwáh kíʼ enhionhnakeráko ne nón꞉we niwatená꞉taien, tánon ne Ashkelon kwáh ne enkarihwahiésah; ne Ashdod nón꞉we nonkweshón꞉as kwáh nenhné꞉e enhiontatsatí꞉nekenhwe nénhtie nenhkárake, tánon ne Ekron kwáh nenhné꞉e okenhrá꞉ke enwá꞉ton.

⁵ Tsi nihiá꞉kon ne kaniataraktónhtie ienakerénion, tánon ne Cherethró꞉nons raotitióhkwas, ne raowén꞉na ne Roiá꞉ner sewatkónhte; Canaan, né꞉ne tsi rononhontsá꞉ien ne Philistiaró꞉nons, kwáh enkwahtónhte iáh ónhka thahonsaienákereʼke.

⁶ Tánon ne tsi niwatenáskwah ne kaniataraktónhtie kwáh thóh nón꞉we nenhtsiónhtsien ne teiotinakaronhtón꞉a sakotinikónhrare, tánon thóh nón꞉we nenhkonhwanatenhenrónhnien ne kontiʼtshé꞉nens.

⁷ Tánon tsi niwatenáskwah ne kaniataraktónhtie ne kaniatarakeʼkowáhne kwáh ne enhonawenhkónhweke tsi ronónhshote ne Judah, tánon thóh nón꞉we nenkonwahnatʼkháwe ne rahothitsenenhó꞉kons nakonthihóntake; tánon thóh enhonhnónhwete tsi ronónhshote ne Ashkelon noʼkarasnéha; asè꞉ken ne Roiá꞉ner kwáh ensakonatarená꞉se tánon tentesakáwenh ne raonatatewenhnihiósera.

⁸ Wakathontéhon tsi nihotirihwakathénhen ne Moab, tánon tsi thisakotiiéron ne raonekenteronhtseraʼshón꞉as ne Ammon, thóh nitsawénhnon tsi nasakotiʼnikonhratsáte nakonkweʼtashón꞉as, tánon tsi nihonatatkowanáton ne tsi ronateristhatátie.

⁹ É꞉tho ká꞉ti, tsi nikónhnhe, ráton ne Roiá꞉ner ne kwáh è꞉neken tókte ne ratironhiaʼkehró꞉nons, ne Sakoní꞉io Israerʼró꞉nons; ne Moab thóh nenhiohiatáwen tsi nihiohiatawénhon ne Sodom tánon nahonkweʼtashón꞉as ne Ammon thóh nenhotihiatáwen tsi nihioiatawénhon ne Gomorrah, thóh nón꞉we niwatonhniátha ne kahontátsens tánon ne hiosonhwakarónhtons ne tiohió꞉tsis tánon kariwaiesáton né꞉ne tsi nén꞉we enkénhake; ne iatehonathaténhron nakonhkweʼtashón꞉as Judahró꞉nons kwáh enhatinenskwenhá꞉ton, ne nakonkweʼtashón꞉as ensatihiatakwení꞉ioke.

¹⁰ Thóh kí꞉ken nenhotihiatáwen tiorì꞉wa tsi nateonathaterénhsaron tánon sakonahtatkowanathén꞉ni tsi nokwáh ne rahonkweʼtashón꞉as ne Sakoiá꞉ner ne ratironhiaʼkerononó꞉kons.

¹¹ Ne Roiá꞉ner kwáh tenhiotenonhianí꞉tonke tsi nensakokʼkónhten; kwáh ensakahonkárhiakte ratikwé꞉kon ne nihioʼokón꞉as ne tsi ionhwenhtsá꞉te; tánon nonkweshón꞉as kwáh tenhionhtsákete ne raohénton, tsehiatátions tsi nón꞉we niienákere, ratikwé꞉kon nonkweshón꞉as ne kawenokwakʼtóntie ienakerénion.

¹² Kwáh ó꞉ni í꞉se Cushró꞉nons kwáh ne ensawénhto nakasareʼkó꞉wa.

¹³ Tánon kwáh iathenhatsátate tsi enhatkónhten nothorè꞉ke tánon enhatónhte ne Assyria tánon kwáh ne enrónhniate ne Nineveh enkarihwaiésa enhastatʼthate kwáh tsi ní꞉ioht ne iahonwenhtsathénhake.

¹⁴ Tánon ne kontiʼtshé꞉nens kwáh thóh nón꞉we nenhkontenaskwáhkeron; kontikwé꞉kon tsi nihiotitsiokó꞉tens. Tetsáron né꞉ne roniakwahkwáronhte tánon ne anéntaks kwáh thóh nón꞉we nenhontenakʼtón꞉ni ne kanawahatowá꞉nen nonhontsá꞉ke káien; tsi iononstonhkwahkarónhtons nón꞉we nathenhatirihwà꞉kwe. Karihwaiesáhton ne tsi kanónshote, asè꞉ken kwáh enharahnenhtashiónko nonenhtakwénte kaskwenhkaranenhtakʼtons.

¹⁵ Ne kí꞉ken ne iotsenhnónhniat kanatowanénhke, ne thóh ratinákere kwáh skenenʼkó꞉wak thí꞉ken, tsi niká꞉ien ne rónhton ne raonerhià꞉ne “Í꞉ih ne keʼshátste iáh nó꞉ia teká꞉ien.” Tsi nió꞉re tsi iorihwaiesáhon; thóh nón꞉we ne kontiʼtshé꞉nens nenkontenaskwahientáhseke. Tsi nihiá꞉kon ne nón꞉we nenhiontohéstake kwáh enhionhnákare tánon thenhionnakʼtsatení꞉hon.