Zephaniah 1 - Ohiatonhseratokénti

¹ Ne raowén꞉na ne Roiá꞉ner waohiatórenhne ne Zephaniah ne roʼní꞉ha né꞉ne Cushi né꞉ne roʼní꞉ha ne Gedaliah né꞉ne roʼní꞉ha ne Amariah né né꞉ne roʼní꞉ha ne Hezekiah, né꞉ne sihothenhniseraténionskwe ne Ronhnontí꞉iokwe Josiah né꞉ne roʼní꞉ha ne Amon ne Judahró꞉non.

² Kwáh orihwakwé꞉kon tsi enkerihwaʼthón꞉te ne tsi ionhontsá꞉te, rá꞉ton ne Roiá꞉ner.

³ Kwáh enkhehiátonte nonkweshón꞉as tánon ne kontiʼtshé꞉nens; Kwáh enkhehiá꞉tonte notsitenhokón꞉as ne tsi iowé꞉rahre kontitses tánon ne kentsonʼshón꞉as ne kaniatarakeʼkowáhne. Kwáh ne enkhehión꞉ni ne ionhkweʼtahétkens tahatirakwenhtá꞉raʼne tánon enkhehiátonte nonkweshón꞉as ne tsi ionhwenhtsá꞉te, ráton ne Roiá꞉ner.

⁴ Kwáh Iathenkanentséste tsi nokwáh ne Judah; tánon enkhehiatʼkónhten ne thóh nón꞉we nihatinákere ne Jerusalem; tánon kwáh enkhehiákse ne ken nón꞉we niwatená꞉taien ó꞉ni ne konwashén꞉naiens ne Baal, ó꞉ni ne raotisenhnashón꞉as ne kahiatón꞉ni ó꞉ni ne ratitsihénstatsis;

⁵ tsi niiákon thenhiontsákete ne tsi karonhkwenáhere raotihénton ne ratironhiakerononókons; tánon tsi nihiákon thenhiontsákete tánon enhonwarihwanirát꞉tse ne Roiá꞉ner, ók ethosà꞉ne ronhwariwaniráti ne raotiní꞉io Milcom;

⁶ Tsi nihiákon ne tsakokton tsi ronhwanonhterá꞉tsene ne Roiá꞉ner, ronónha ne iáh tehonwaiatísaks ne Roiá꞉ner khés ne thé꞉nen ahonwarihwanóntonhse.

⁷ Sak thasatatón꞉ni raohénton ne Roiá꞉ner Rawenni꞉io! Asè꞉ken ne rawenhní꞉sera ne Roiá꞉ner ákta í꞉wes; ne Roiá꞉ner roweienhnenhtàhon rokʼkhwáhere, sakohiatatokenhtíston ne sakohonkará꞉wi.

⁸ Tánon ne kwáh thóh enwenhniserá꞉teke ne Roiá꞉ner tsi rokhwáhere kwáh enkheréwate ne ronaterihóntons tánon ne ronhnontí꞉io raonekenteronhtseraʼshón꞉as tánon tsi niiákon né꞉ne iakotseronhniáton ne tiwakwéniate.

⁹ Ne thóh enwenhniserá꞉teke kwáh enkheréwate ratikwé꞉kon ne iáh tsiahatiratane ne tsi tekanoháronkwe nó꞉nen ienhontawehiate, ne rotinenskwenhaton oni rotinikonraton tanon ne wahatinonsitkon ne tsi rotinonhshotons ne raotikoswetsera.

¹⁰ Tánon ne kwáh é꞉tho enwenhniserá꞉teke, ráton ne Roiá꞉ner, enwatsaróko tsi nationsentóhseron ne tsi tsothenhenrakàronte ne kénktionk ratinatónhkwa, tánon tehiotenonhianì꞉ton oktsitóko ne ase iokwenrare tsi kanatowanen, tsi niiorakareni natewaktoko ne tsi ionhnonhtarón꞉nions.

¹¹ Tesewahénret, í꞉se ne Mortar nón꞉we nisewanákere! Asè꞉ken onhkweʼtakwé꞉kon sakotónhton ne Canaan nón꞉we nihatinákere; ratikwé꞉kon ne rotiwistákete kaswistará꞉ken tsi enhonwenhnónhniake.

¹² Tánon kwáh é꞉tho nenhkaháwike entiatísake ne Jerusalem iehasehrénhas énkatste, tánon kwáh enkheréwate nonhkweshón꞉as ne iontatón꞉ni ók thóh ratitskwáhere raotiriwanerathatʼtserakon, tsi nihiákon ne iónhton nakawériane, “Né Roiá꞉ner kwáh iáh thahóthen tahontaharihwaié꞉rihte khés ne thé꞉nen karihwahétken aohiò꞉then.”

¹³ Tanon ne raonawenhshón꞉as kwáh enkanenskwenhátonke tánon ne tsi rotinonhshó꞉tons kwáh enkanonsaiésa; tánon enhontenonhshonhniánion ók iáh kíʼ nonhwén꞉ton tsahontsá꞉ien; enhatinenharahienʼthohseron ók iáh kíʼ nonhwén꞉ton né꞉ne ahatinekírahte nonenharákeri.

¹⁴ Ne wenhniseró꞉wahne tewenhniserónhte ne Roiá꞉ner rawenhní꞉sera ákta í꞉wes, tánon thentsawénhstsi tsi nonhtaiawenhnonhátie; tsi nenhiorahkáre ne rawenhní꞉sera ne Roiá꞉ner ne kwáh ronikonhraktshen; otsitó꞉wa tenhasénhto ne ronikonratsani ratiriios ne nón꞉we.

¹⁵ Né꞉tho ne enwenhniseronhtákwen ne kanakwáhtshera, ne enwenhniseronhtákwen ne ahienikonhraronhiáken tánon nateraswatsénhtshera, ne enwenhniseronhtákwen nakarihwentʼthonke tánon ne karihwaiesátshera, ne enwenhniserontákwen ne tetioʼkarásheke tánon né꞉ne kwáh iáh tetiò꞉ken tsi natentioʼkarásehke, ne enwenhniserontákwen nahiotsatarónhnionke tánon iáh thahonsahiokéntonhke,

¹⁶ ne enwenhniserontákwen nahiehonhráwate tánon sotar ateriiosera ratiwenhnote ne wathenhénrote ne tekanatanákton kanatowanénhhke tánon ne tsi tekahiosakérons kanikató꞉tons.

¹⁷ Tánon kwáh entekháwe ne kaʼnikonhraronhiákenhse nonhkwè꞉ne tánon thóh ní꞉ioht tsi enhonhnésehke tsi ní꞉ioht ne tehieronhwékon ne tiorì꞉wa tsi rotirihwanéren tsi nokwáh ne Roiá꞉ner. Tánon ne raotinekwénhsa entewawerónhtake tsi ní꞉ioht nokénhra tánon ne raotikaróstha thóh nenhióton tsi ní꞉ioht nóta.

¹⁸ Sénha í꞉si nón꞉we ne raotiwístas kawistará꞉kens khés ne owistanó꞉rons iáh tkakakwé꞉ni nahiakonónsthate né꞉tho tewenhniséronhte ne Roiá꞉ner raonakwáhtshera; ók onhontsakwé꞉kon ótsire enwatsáhate ne tsi nihotekéfen, asè꞉ken ne enronhniáte ne tsi iehiotókte tenhiotenonhianí꞉tonhke kwáh ratikwé꞉kon tsi nihiákon ienákere ne tsi ionhontsá꞉te.