Zechariah 6 - Ohiatonhseratokénti

Ne Atetʼtsénsera Ne Otiónhkwas Ká꞉sehre

¹ Seh ó꞉ia shonkwatetʼtsen. Ne nón꞉wa sahkatkáto ne kaié꞉ri nikasehréhtake otiónhkwas koshá꞉tens iothihiaténtons thóh tahiotihiakenʼenhátie tsi naʼthetiátere ne tehionónhtahke ne teiotwistáron otsí꞉nekwar karístatsi.

² Ne tiotierénhton otiónhkwa ká꞉sehre kaié꞉ri nikón꞉ti koshá꞉tens tsonahthíronte né꞉ne onekwénhtara kikonsohkó꞉ten, ne tekeníhaton kahón꞉tsi ne kikonsohkó꞉ten,

³ nahsénhaton kará꞉ken ne kikonsohkó꞉ten, tánon ne kaieríhaton iothirahkwahʼrónnion nenhné꞉e.

⁴ Ethò꞉ne wahirihwanón꞉tonhse ne raronhiakehró꞉non, “Sénshion, nahó꞉ten kí꞉ken otiónhkwas ká꞉sehres kentons?”

⁵ Watharihwaʼserá꞉ko, “Ne kí꞉ken ne kaié꞉ri nikahwerá꞉kes; né꞉ne Roiá꞉ner rashá꞉rine nonhwenhtsiakwé꞉kon né꞉ne rahohén꞉thon kaienthákwe tánon ónhwak thóh nahthonhtahkón꞉ne.”

⁶ Ne otiónhkwa ká꞉sehre ne khonthihóntsi koshá꞉tens iothihiaténton othorè꞉ke niahonehnonhátie né꞉ne Babylonia nón꞉we, ne konhthirá꞉kens kohshá꞉tens tsi iaʼtewatshénthos ne niahonenonhátie, tánon ne iothirahkwarónnions koshá꞉tens tsik kanakerahserá꞉ien ne entiè꞉ne ne niakónhne.

⁷ Tsi tahkonhthihiá꞉kenʼne ne iothirahkwarónnion kohshá꞉tens kwáh tehiotistheríhes niakónhʼne tánon nahkonhthikenhenhiónna tsi ionwenhtsá꞉te. Ne raronhiakeró꞉non wahèn꞉ron, “Wás tánon kenshenhiónʼna nowénhtsia!”—tánon thóh nahkonhthí꞉hiere.

⁸ Ethò꞉ne ne raronhiakeró꞉non thontahakeʼnháton, “Ne koshá꞉tens nothorè꞉ke niehionè꞉nonh tsi nón꞉we ne Babylonia thontahkonhsehrónhnenthe ne Roiá꞉ner rahonhakwáhtshera.”

Ne Roiá꞉ner Wahonhaʼne Ne Zechariah Nahononhwaró꞉rohke Ne Ratsihenstowá꞉nen Joshua

⁹ Ne Roiá꞉ner tahá꞉kon kí꞉ken ateriwahnhothátshera.

¹⁰ Wahèn꞉ron, “Hiahásaf nahthatahwí꞉tsheras tsi nithonatkawáhnion ne ronwahthinahkerahkwáhthons Heldai, Tobijah, tánon ne Jedaiah, tánon ó꞉nenk thóh iaháseh tsi thóh nónhsohte ne Josiah ne roiénha ne Zephaniah. Rathikwé꞉kon sóhthi ne Babylonia tsi rohnahnakerahkwénʼne.

¹¹ Ne shanonhwarohtsherón꞉niat ne kawistará꞉ken ó꞉ni ne owistahnó꞉ron thóh nahkáhwenh, tánon ne tianonhwaró꞉rot ne ratsihenstowá꞉nen, Joshua ne roʼní꞉ha né꞉ne Jehozadak.

¹² Tiorì꞉wa né꞉tho Roiá꞉ner Roshatstenhserowá꞉nen ráton, ‘Rónkwe ne Onénhrah ronwáhiats kwáh enhohianerásten tsi nonhwehnenhréhseke tánon enshanonhsón꞉ni ne Roiá꞉ner raononhsatokénhti.

¹³ Kwáh raónha enshanonhsón꞉ni tánon enhaié꞉na ne kakweniensthátshera tsi ní꞉ioht ne Rononhtí꞉io, tánon enteshakoniarotáhrohke ne rahonkweʼtahshón꞉ʼa. Tánon ratsihénstahtsi enhoterihóntahke ne raononhthiiotsherá꞉kon, tánon tetiá꞉ron tsi enhothiiò꞉ten ne skén꞉nonh ó꞉ni shahothirì꞉wa enkénhake.’

¹⁴ Nahnonhwaróh꞉re ne enwehiarasthákwen ne Roiá꞉ner Raononhsatokenhtí꞉ke tsi enhonwahtikwénienste ne Heldai, Tobijah, Jedaiah, ó꞉ni ne Josiah.”

¹⁵ Ronhnón꞉kwe nahinónhson nón꞉we thathinahkerénion eʼthò꞉ne nahonshahatinonhsón꞉ni ne Raononhsatokénhti ne Roiá꞉ner. Tanon nó꞉nenh enskanónhshison, enshaterienʼtá꞉rahne né꞉tho tsi Roiá꞉ner iehakató꞉rion ne shonhà꞉ke. Tóh꞉ki nenhiá꞉wenhne tó꞉ka kwáh entiewén꞉narahkwe ne Roiá꞉ner Saní꞉io.