Zechariah 4 - Ohiatonhseratokénti

Ne Atetʼtsénsehra Ne Watʼthaseranihiontháhkwa,

¹ Ne raronhiakeró꞉nonh ne tehionkenithá꞉rahkwe shé꞉kon thontáhre tánon wahakathontó꞉rhathe tsi shí꞉ken ní꞉ioht nahonkitáhsehke.

² “Nahò꞉ten satkáthos?” wahariwanónhton. “Watʼthasehrahnihiontháhkwa owisthanó꞉ron ionniáhton,” watʼkeriwahserá꞉ko. “Ne è꞉neken thón káhere kátʼtse ne watehienaráhkwa. Ne watʼthasehranihiontháhkwake thóh iorenthónʼnion tsáta ní꞉kon kaháhseras, ne skátʼtions tsáta ní꞉kon ioiénhton nahontháwah ne kénhie ahosehríhies.

³ Tekaróntahke iakeniewáhtha iorón꞉tote ákta ne waʼthasehrahnihiontháhkwa, énska ne skatí꞉sons nokwá꞉ti.”

⁴ Ethò꞉ne wahiriwahnón꞉tonhse ne raronhiakeró꞉nonh, “Nahoʼténhsons ki konhtí꞉tons, sénshion?”

⁵ “Iáh ken teshaterièn꞉tahre?” wahakerihwanón꞉tonhse. “Iáh tewahkaterièn꞉tahre, sénshion,” watʼkerihwaʼserá꞉ko.

^10b Ne raronhiakeró꞉nonh wahakénhase, “Ne tsáta nikaháhserake ne tsi tsáta natehákarahs ne Roiá꞉ner, ne kontkáthos akwé꞉kon ratʼkátos ne tsi nihiowénhtsia.”

¹¹ Ethò꞉ne wahiriwahnón꞉tonhse, “Nahò꞉ten kéntons thí꞉ken tekaróntahke iakeniewáhtha ne skatí꞉sons nokwá꞉ti iohnhóton ne watʼthaserahnihiontháhkwa?

¹² Tánon nahò꞉ten kéntons ne thekanhátahke ne iakeniewáhtha ákta ne tékeni owistanó꞉ron ohorhótas tsi nitewahwéhrons ne iakeniehwáhtha kénʼhie?”

¹³ Wahakerihwahnón꞉tonhse, “Iáh ken teshaterièn꞉tare?” “Iáh, tewahkaterièn꞉tahre, shénshion,” Waʼkeriwahserá꞉ko.

¹⁴ Ethò꞉ne wahèn꞉ron, “Ne kí꞉ken ne tehnihiá꞉se tsi niká꞉ien ne Rawenni꞉io shakohiatahrákwen tánon ne tahonwahriwasniéhse, raónha ne Roiá꞉ner rashá꞉rine nowenhtsiakwé꞉kon.”

Ne Rawenni꞉io Rorahratstén꞉ni Ne Zerubbabel

⁶ Ne raronhiakeró꞉nonh wahakró꞉ri ne Zerubbabel ahontahíhion kí꞉ken ateriwahnhothátshera né꞉ne Roiá꞉ner nón꞉we nitsawè꞉non: “Iatensotkáwe, iáh ne tahkarihón꞉ni ne ronterí꞉ios rahothishatsténhsera tóka ó꞉ni ne shonháhak sashatsténhsera akénhake, ók ne nahkeʼnikòn꞉ra.

⁷ Ne ononhwénhseras thóh natehiotenonhianì꞉ton tsi ní꞉ioht ne iononhtahrónnions tók tenwáhton ne shahén꞉ton. Kwáh enshesenonhsón꞉ni nononhsatokénhti, tánon tsi ní꞉ioht tsi énshien ó꞉ni enskwahtáhko nonhakénkha onénhia, nonhkweshón꞉ʼa tenhiakohén꞉rehte, ‘Ioráse, ioráse.’”

⁸ Shé꞉kon ó꞉ia nateriwanhothátshera sontiató꞉renʼne Roiá꞉ner thontahathéniete.

⁹ Wahèn꞉ron, “Zerubbabel tehostenró꞉the nononhsatokenhtí꞉ke, tánon ienhásha tsi rotenonhsonnihátie. Nó꞉nen kí꞉ken é꞉tho nenhiá꞉wenhne, nakonkweʼtahshón꞉ʼa enhonahterienʼtá꞉rahne tsi Í꞉i hiekwahtó꞉rion ne rononhà꞉ke.

^10a Thóh thinikonrén꞉en shótsi iáh wé꞉so tekahioʼtén꞉en. Ók ki enhonwáhken ne Zerubbabel rotenonhshonhnihátie Nononhsatokénhti, tánon enhontonhnháren”