Zechariah 2 - Ohiatonhseratokénti

Nahsénhaton Ateʼtsénsera: Ne Ne Rón꞉kwe Rahá꞉we Iontenenhtensthákwa Asé꞉riie

¹ Wakatarakétsko tánon rón꞉kwe wahí꞉ken iontenientensthákwa asehiéie rahá꞉we.

² Eʼthò꞉ne wakariwanón꞉ton “Kanonwewáse?” Watharihwaʼserá꞉ko, “ne nahkatenienténhstakwe Jerusalem, ne nahontʼtokénhse tohnahtewahthákaron ó꞉ni tsi nahiónshonke.”

³ Ethò꞉ne ne raronhiakeró꞉non tsi niká꞉ien ne tehionkenithá꞉rahkwe ohén꞉ton nontá꞉re, tánon thiháte raronhiakeró꞉non thontahoteráhte.

⁴ Tánon wahawénhase, “Tesharáhtat, tsióri thí꞉ken nithohiónha: ne Jerusalem kwáh tsi enhathiʼteróntake thóh nenhiotón꞉hake tsi ní꞉iot ne tsi kanatakérons iáh othé꞉non tewashontó꞉tons, tiorì꞉wa tsi nihiakotiohkowá꞉nen nonkwehó꞉kons ó꞉ni khonthiʼtsé꞉nen thóh kontinákere.

⁵ Ne Roiá꞉ner rorahrátston raónha ne tekensténrote nótsire neh tekanhathanákton nahonthashá꞉kohne tánon thóh nón꞉we nenhenterónthake skatʼke ne rahohiathanerahkwátshera.”

Ne Ronwahthinakerahkwáton Ionshahonwatínonhke Ne Thahontahón꞉ne

^6-7 Ne Roiá꞉ner washakawénhase ne rahonkweʼtashón꞉ʼa, “Tekwahrehniáton kwák tsík nitsiotserahthánions. Ók nihnónhwa, ne sehwanhakeráhkwen, shasehwaniáken ne Babylonia nón꞉we tánon Jerusalem nionshá꞉sehwe.

⁸ Nónhka akénhake nahieshakahré꞉wahte wahekahré꞉wahte tsi nahò꞉ten ne kwáh kanó꞉ron nakerihwà꞉ke.” Káti ne Roiá꞉ner Roshatstenhserowá꞉nen tahakahthéniete nahontatʼkháwe kí꞉ken aterihwahnhothátshera ne rahothirihwà꞉ke tsi nihá꞉ti ne shakothinénhskwen ne rahonkweʼtashón꞉a:

⁹ “Ne Roiá꞉ner iatenhohiátisthe tsi ensehwaterí꞉io, tánon kwáh ronónha entieshanénhsko tsi niká꞉ien ne shanhatserahkén꞉en kénʼne.” Nó꞉nen kí꞉ken é꞉tho nenhiá꞉wenhne, kwáh onhkweʼtakwé꞉kon tsi enhiakoterienʼtá꞉rahʼne né꞉tho Roiá꞉ner Roshatstenhserowá꞉nen thakható꞉rion.

¹⁰ Ne Roiá꞉ner wahèn꞉ron, “Tesherí꞉wak natonnharáhtshera, tiónkwe ne Jerusalem! Thónkak kontáhtie ne sehwenhtióhkwakon akitehrónthake!”

¹¹ Ne thóh nenhkahá꞉wike iakotiohkowá꞉nen rahonhà꞉ke ne Roiá꞉ner niénhien tánon rahonkwè꞉tah enhiónton. Skátke entewenterontake, tánon ensehwaterienʼtá꞉rahne tsi raónha thakató꞉rion ne tionhá꞉ke.

¹² Shé꞉kon énska iensehwaterátsthe ne Judah kwáh kahtokénston rahonhatsí꞉wa ne Roiá꞉ner enhahiathakwénhioke thóh nón꞉we rahonwenhtsiatokenhtí꞉ke, tánon Jerusalem ne kanahtowá꞉nen ne tsiahonhà꞉a entahnatanorónhkwake.

¹³ Sak thikénhak, sewakwé꞉kon, ne rahohén꞉ton ne Roiá꞉ner, asè꞉ken thóh nón꞉we nonhthahawehnonhátie ne iotokénhti thonónhsote.