Zechariah 14 - Ohiatonhseratokénti

Jerusalem Tánon Nakaonhwentsiakwé꞉kon

¹ Nenhní꞉sera nó꞉nenh ne Roiá꞉ner enhátsien ne tahahiató꞉rete ákta í꞉wes. Ethò꞉ne ne Jerusalem kwáh enkonhwanenskwenhá꞉ton, tánon ne kanénhskwen kwáh tenkaiákhonke ne sahénton.

² Ne Roiá꞉ner akaonwenhtsiakwé꞉kon enteshakohiaʼténhawe nahonteriiosehrón꞉ni ne Jerusalem. Ne kanahtowá꞉nenh enkonwahsén꞉ni, ronwahthinonhskarhiáshion, tánon ne konhnón꞉kwe thitkonhwanahnonhthón꞉ni. Sahtekanenhrí꞉hen enhionhnahkerá꞉ko, ók ne ronáhtiaʼkes iáh ne tahonwahnatekwáhte tsi nahnatowá꞉nen.

³ Ethò꞉ne ne Roiá꞉ner ienhahiá꞉kenhne tánon enhonterí꞉io nonhkweshón꞉ʼa, tsi ki ní꞉ioht tsi rohterí꞉io ne tiotohesthánion.

⁴ Ne thóh nenhkahá꞉wike tsi ionónhte ne Olives nón꞉we natenhátahne, né꞉ne tsitkarahkwí꞉nekens nokwá꞉ti ne Jerusalem. Ethò꞉ne ne tsi iohnónhte ne Olives tenwahtó꞉ren tsitkarahkwí꞉nekens tsi nió꞉re ne tsi iaʼtewatséntos kowá꞉nenh ahonráhkwakon enwá꞉ton. Sahtehionnonhtí꞉en othorè꞉ke nienkaié꞉rahte nenhiotáhtere entiè꞉ne ne nienhkaié꞉rahte.

⁵ Tsi ensheniá꞉kenhne iatensoʼhéste kí꞉ken ahonráhkwakon né꞉ne tékeni tsi ní꞉ioht tsi tehiotó꞉ren tsi iohnonhtáhere. Enshá꞉teko tsi nihotihié꞉ren ne sehsothonkonhkén꞉en nó꞉nen satsahontsí꞉sonkwe né꞉ne Uzziah shihononhtí꞉io ne Judah. Ne Roiá꞉ner á꞉ke Ní꞉io kwáh éntʼre, rathikwé꞉kon ne ratironhiakeró꞉nonhs enteshakohiaʼténhawe.

⁶ Nó꞉nenh ienkáhewe, iáh ó꞉nenh tahonshontó꞉rahte keks nahonsahkenhserá꞉ien;

⁷ Iáh ó꞉ni ne tetiò꞉karas. Kwáh tió꞉konhte tsi teioswatʼtheke, shé꞉kon noʼkarasné꞉ha nikahá꞉wi tenioswatʼtehke. Nó꞉nen kí꞉ken é꞉tho nenhiá꞉wenhne Roiá꞉ner khók nenhné꞉e roterièn꞉tare.

⁸ Nó꞉nen énwahwe né꞉tho enhní꞉sera, ne kahnekí꞉io Jerusalem nón꞉we nénhtewe, ashén꞉non Dead Sea nienhénwe tánon nó꞉ia ashén꞉non Mediterranean ne nienhénwe. Kwáh oserahkwé꞉kon tsi enhionekótahke, nó꞉nen iokennátʼten ó꞉ni nó꞉nen ionahná꞉wenh.

⁹ Ethò꞉ne ne Roiá꞉ner kwáh onhwenhtsiakwé꞉kon tsi enhonnonhtí꞉ioke; kwáh onkweʼtakwé꞉kon tsi enhonwahshén꞉naien tsi raónha ne Nʼi꞉io tánon ronwahienté꞉ri tsi ne shahoshén꞉na.

¹⁰ Kwáh atenahthakwé꞉kon, tsi nió꞉re ne Geba né꞉ne othorè꞉ke ne Rimmon nieniawé꞉nonh ó꞉ni entiè꞉ne, kwáh enkahtahkwarí꞉shionke. Jerusalem ienhioniashakethótahke ne tsi ionwenhtsá꞉ien ne aktónties; ne kanatowá꞉nenh ienkanihá꞉rahne tsi nió꞉re ne Benjamin tiotenhenrénton tsi nió꞉re tsi iatekahiosáhien tiotenhenrénton, thóh nón꞉we nohén꞉ton tiotenhenrentónhakwe, tánon tsi nió꞉re tkanikáhthote ne Hananel né꞉ne thóh nón꞉we ne ronnonhtí꞉io nihanekonhniátha notsí꞉tsa.

¹¹ Thóh nón꞉we nonhkweshón꞉ʼa kwáh skén꞉nonh tsi enhatinákerehke, iáh ó꞉nenh tesohtì꞉terons nahonwanáhthonte.

¹² Ne Roiá꞉ner tehiotenonhianì꞉ton tehatenhrókwahte ne kannrahtariné꞉tsheras nonhkwè꞉ne nenhonteriiohserón꞉ni ne Jerusalem. Tsienhonnónhneke tsi enhothihiatátken; tsi rothikhá꞉ra ó꞉ni ne ronnáhhsahke enhiótʼken.

¹³ Ne thóh nenhkahá꞉wike ne Roiá꞉ner kwáh í꞉ken tsi tenshakonithonniáten tánon enshakoterónkwen kwáh niatehionkwè꞉take tsi tenhiakorihwahráhseron ó꞉ni enhonterihioháton.

¹⁴ Iekaníhare ne Judah iekonhwatiaʼtón꞉ti ne Jerusalem. Tánon nahkotsokowahtié꞉ras nonhkweshón꞉ʼa naktatsésons káti enkaró꞉ron, ne nowistanó꞉ron, kawistará꞉ken, ó꞉ni kwáh iawehtowá꞉nen natsherón꞉nia.

¹⁵ Kahnratarinhetserowá꞉nen ó꞉ni enhiotinhratá꞉rine ne koshá꞉tens, tewahòn꞉tes, iotiniakwáhere, ó꞉ni ne kenséhris—konhtikwé꞉kon ne kaʼtshé꞉nens tsi konhtì꞉terons ne tehontátswenhs.

¹⁶ Ethò꞉ne ne iatehonahthatén꞉ron nonhkweshón꞉ʼa ne iekonhwatsiathóntion ne Jerusalem kwáh iatehiosehráhke thóh ienhonhnéthake nahonwahshén꞉naien ne Roiá꞉ner Roshatstenhserowá꞉nen tsi ronhnontí꞉io í꞉ken tánon nahonteʼnikonhró꞉ri tahontenonhwerá꞉ton ne tsi rahthiterón꞉tons.

¹⁷ Ne niateiakahontiákes ne iáh thahontʼthontátʼthe ne thóh iáhien nahonwashenhnaiénhna ne Roiá꞉ner Roshatstenhserowá꞉nen tsi ronhnonhtí꞉io í꞉ken, iáh ki tahonsahhiokén꞉nore ne rahononhontsá꞉ke.

¹⁸ Ne Egyptró꞉nons ne iáh tahonthónthate nahonteʼnikonhró꞉ri tahontenónhweron ne tsi rahthiʼterón꞉tons, ethò꞉ne ki kwáh ne sahkánhrah tenhothikwáhte ne Roiá꞉ner ienshakothénieten tsi nihá꞉ti ne iáh tehonatʼthontháton iahonéhnonh.

¹⁹ Ne kí꞉ken ne karewahthátshera enkahié꞉na ne Egypt ó꞉ni nonhwenhtsiakwé꞉kon tó꞉ka iáh tahonteʼnikonhró꞉ri ó꞉ni tahontenonhwerá꞉ton tsi rathiʼterón꞉tons.

²⁰ Ne thóh nenhkahá꞉wike iekaní꞉hare ne ionatwistahnihióntons ne koshá꞉tens enkahiá꞉tonke kí꞉ken owenhnaʼshón꞉as “Rohiatatokénhti ne Roiá꞉ner” Tánon ne katsahsónhas thóh nenhiotokenhtí꞉ke tsi ki ní꞉ioht ne katsahsónhas ne kahkérons ohén꞉ton ne ietsienharáhkwa.

²¹ Tánon kwáh ne iatekatsáhkes ne Jerusalem ó꞉ni ne Judah kwáh káti enhiotokenhtí꞉ke rahohén꞉ton ne Roiá꞉ner Roshatstenhserowá꞉nen. Nonhkweshón꞉ʼa ne iétats ne karihwiiosehiohonkón꞉as ne enhiónste tsi tehienekónhtiesthe noʼwá꞉ron. Nó꞉nen ienʼkáhewe, iáh ó꞉nenh tahonsahenteróntahke ne ratenhní꞉nonhs ne Rahononhsahtokenhtí꞉ke ne Roiá꞉ner Roshatstenhserowá꞉nen.