Zechariah 12 - Ohiatonhseratokénti

Tsi Nienhénwe Enskonwahiatáko Ne Jerusalem

¹ Ne kí꞉ken nateriwanhothá꞉tshera tsi nokwáh ne Israel Roiá꞉ner nón꞉we nitsawé꞉nonh, ne Roiá꞉ner raónha tehotakwahrí꞉ton ne tsi karonhiá꞉te, róshon nonhwénhtsa, tánon teshakó꞉wi natónhnhets nonhkweshón꞉ʼa. Rá꞉ton,

² “Kwáh ne enkonhiá꞉te ne Jerusalem tsi ní꞉ioht ne káksa akaneká꞉rahke notsí꞉tsa; nonhkweshón꞉ʼa ne tekonhwatiatháton enhatiní꞉rah tánon tenhothihiaténthonwe tsi ní꞉ioht ne iakoné꞉ka. Tánon nó꞉nenh tenhatinahthánahke ne Jerusalem, ne kanahtowá꞉nenhs ne kenhiotié꞉ton ne Judah kwáh nónhne tenhathinahthánahke.

³ Ók nó꞉nenh ienkáhewe, kwáh ne enkonhiá꞉te ne Jerusalem tsi ní꞉ioht ne ionenhiáste—nakentiokó꞉ten ahonteniénten tahónhnekwe enhothikaré꞉wahte. Kwáh kanenrahkwé꞉kon ne tsi ionwenhtsá꞉te enʼthonténrohwe ne iakonhwatiaʼtón꞉ti.

⁴ Ne nenhkahá꞉wihke kwáh enkheterónhkwen ne koshá꞉tens tánon ne enkonhniá꞉te ne rothishá꞉tens ne tahonhnonhwarahwénrie. Kwáh ne enkhehiatenhnikónhraren nonhkweshón꞉ʼa ne Judah nón꞉we, ók kwáh ne enkonhniá꞉te ne tehontátʼtions ne rahothitienenhó꞉kons ne koshá꞉tens tahathironhwéhke.

⁵ Ethò꞉ne ne rohthitahrahiéntons ne Judah nón꞉we enhontahténhase, ‘Ne Roiá꞉ner Ní꞉io Roshatstenhserowá꞉nen teshakó꞉wis ne kaʼshatsténhsera ne rahonkweʼtahshón꞉ʼa tsi niká꞉ien ne Jerusalem nón꞉we nihatináhkere.’

⁶ “Ne nenhkahá꞉wike kwáh enkhehiónnenh ne rothitahrahién꞉tons ne Judah nón꞉we tsi ní꞉ioht nahiothékhake karáhkon tó꞉ka ó꞉ni tsi ní꞉ioht ne onátsia ionoráhri kahentà꞉ke—kwáh akwé꞉kon enhonwanahthón꞉te nonhkweshón꞉ʼa ne ákta rahthinákere. Nonhkweshón꞉ʼa ne Jerusalem kwáh nenhné꞉e sak tenkénhake ne kanathakónhson.

⁷ “Í꞉i ne Watiá꞉ner, entkahénte entekhéhion nathesenhnié꞉tshera ne Judah ahonkweʼtahshón꞉ʼa ronterí꞉ios, né꞉ne kakwenienstháhtshera tsi nithotʼwahtsirí꞉nonh ne Táwit ó꞉ni nonhkweshón꞉ʼa ne Jerusalem nón꞉we kwáh enhatihié꞉na iáh sénha tahkowanénhake tsi ní꞉ioht nakorénhsons ne Judah nón꞉we.

⁸ Ne nenhkahá꞉wike ne Roiá꞉ner enteshá꞉kone tsi nihiá꞉kon ne Jerusalem nón꞉we nihienákere, shé꞉kon ne kwáh tiakotsihióha thóh nenhieshátstehke tsi nihiothónhne ne Táwit. Tsi nienhontwatsirí꞉ne ne Táwit rahowá꞉tsire enshakothihenténhse tsi ní꞉ioht ne Roiá꞉ner rahoronhiakeró꞉nonh, kwáh thóh nenhiothónhake tsi shí꞉ken ní꞉ioht ne kwáh raónha Ní꞉io akénhake.

⁹ Ne nenhkahá꞉wike kwáh onhkweʼtahkwé꞉kon enkhehiathónte nenhontheniénten niakonwahtiaʼtón꞉ti ne Jerusalem.

¹⁰ “Kwáh enkenáhʼne tsi nithotwatsirí꞉nonh ne Táwit ó꞉ni ne ronahtiakhésons ne Jerusalem nón꞉we né꞉ne kenténrat ó꞉ni aterén꞉naient. Enhonwakenhénhion tsi niká꞉ien ne ronwaháson tsi rawenhé꞉ion, kwáh enhothinikonratsénhsehke ne rahonhà꞉ke tsi ní꞉ioht tsi enhiakonikonrátsen ne enskakʼkok iakowí꞉raien nenhiahié꞉heie. Kwáh kátsi towá꞉nenh tsi tenhonsénhtho, kwáh tsi ní꞉ioht nahiakothónse nénhskak khók iakonekenterontsherá꞉ien.

¹¹ Ne nenhkahá꞉wike tsi nihiakotsionhniónkwen ne Jerusalem nón꞉we thóh nahtenhiotenonhianí꞉thonke tsi nihiakotsiónhnionkwe ne Hadad Rimmon thóh nón꞉we ne Megiddo kahentahkeʼkó꞉wa.

^12-14 Skawatsiráktion ne tsi ionwenhtsá꞉te tiehiatáktion tsi enhiontsiónnion: ne kahwá꞉tsire tsi nitiakokwatsirí꞉nonh ne Táwit nón꞉we, ne Nathan nón꞉we nitiakokwatsirí꞉nonh, ne Levi nón꞉we nitiakokwatsirí꞉nonh, ne Shimei nón꞉we nitiakokwatsirí꞉nonh, tánon notiakhésons kahwá꞉tsires. Skawatsiráktions tsi enhiontʼtiónnion, tánon ne ronhnón꞉kwe ne skawatsiráktions iáh ne tiatahontiéste ne konhnón꞉kwe tsi enhontiónhnion.