Zechariah 10 - Ohiatonhseratokénti

Ne Roiá꞉ner Rarahrátstha Nathatewenhnihió꞉tshera

¹ Tsi seh wariwahnónhtons ne Roiá꞉ner nahiokén꞉nore ne kokwitè꞉ne. Roiá꞉ner seh thateniéhtha tsi nikanekarión꞉nion notsiátas ó꞉ni tsi iohtsatharáhties, ne nakwé꞉kon ahiakohianeráhsten ne kaienʼthó꞉tsheras.

² Nonhkweshón꞉ʼa ne shakotinikonríhsats ne kahiatón꞉nis tánon ne rontthiathonsehratkénses, ók tsi tehonwahthirihwasehrahkwén꞉nis ne nonhówenh ó꞉ni ononhwahrohríhtha. Ó꞉tiaʼkes tehierihwakʼthétha nateʼtsénhseras, ók kwáh ne khók nahieshanikonráhten; ne kaʼnikonranirákʼtshera teshakoná꞉wis iáh othé꞉nen tehiorihón꞉te. Káti nonhkweshón꞉ʼa tsi tehiakotawénhhre kwáh thóh ní꞉ioht tsi shí꞉ken ní꞉ioht ne teiotinakarontón꞉a ahionahtiathatónʼon. Rothiʼnikonrahronhiáken né tsi iáh tehononhkwè꞉thaien nahshakohén꞉thenhse.

³ Ne Roiá꞉ner ráton, “Khenáhkwase né꞉tho thihononhontsá꞉tes tsi rohnónha tsieshakotihiaʼthakwehní꞉io nakonhkweʼtahshón꞉ʼa, tánon kwáh enkheré꞉wahte. Nonhkweshón꞉ʼa ne Judah Í꞉i akonhkweʼtashón꞉ʼas, tánon í꞉ih ne Watiá꞉ner Wakeshatstenhserowá꞉nen, enkhehiatenhnikónhraren. Kwáh rohnónha enkénhake ne konhthiʼshátses koshá꞉tens né꞉ne iakoshaténhstas tsi wahterí꞉io.

⁴ Rahothitióhkwakon nón꞉we nenhtón꞉ne ne rathikoráhshons, ronateriónton, sakotihén꞉tenhse, tánon ne ronterihiosehrakweʼní꞉ios nahonwahnatʼkórasthe nakonkweʼtashón꞉a.

⁵ Ne nonhkweshón꞉ʼa ne Judah nón꞉we kwáh enhonatʼkwénionke tsi ní꞉ioht ne ronterí꞉ios ne teshakonaskwasheronkwáhton ne ronwahthí꞉sons nonahwásthakes ne tsi tekanatokenhá꞉tons. Kwáh enhonterí꞉io tiorì꞉wa ne Roiá꞉ner tsi ratikwekonháties, kwáh ó꞉ni enshakothishén꞉ni ne tehontátʼtsions ne rohtishá꞉tens tsi ronterí꞉ios.

⁶ “Kwáh enkheshatsténhseron nonhkweshón꞉ʼa ne Judah nón꞉we; Kwáh ensehkheniá꞉kente ne Israerʼró꞉nons. Kwáh tenkhehiaró꞉ton tánon rahthikwé꞉kon thentekhehiaʼténhawe tsi nón꞉we nihothinonhsóhton. Kwáh thonenhʼhiotónhake tsi shí꞉ken ní꞉ioht ne iáh nonhwén꞉ton takhekenronhní꞉onhke. Í꞉i ne Watiá꞉ner ne Raotiní꞉io; kwáh tekheriwahserá꞉kwaʼse ne raonahterén꞉naient.

⁷ Nisraheró꞉nonhs kwáh thonenhathiʼshátstekes tsi ní꞉ioht ne ronterí꞉ios, ronatʼtsenhnón꞉ni tsi ní꞉ioht ne ónhkak otsí꞉tsa iakonekí꞉ren. Ne iesheshakotiienokónha kwáh enhonnehiá꞉rahke kí꞉ken atesenhnié꞉tshera tánon enhonahthonnharahke tiorì꞉wa tsi nihoié꞉ren ne Roiá꞉ner.

⁸ “Ienkhenónhke nakonhkweʼtashón꞉ʼa tánon skatʼke tsi enkhehiaʼtaró꞉rohke. Kwáh enkheniá꞉kente tánon ensehkhehiónnien ne thóh nahonsahonhatiohkowanahʼne tsi nihothirenhnhahón꞉ne.

⁹ Ethosà꞉ne tekhehiareniáhton tsi rahthinahkeréhnion nonhkweshón꞉ʼa, Shé꞉kon ki nahinónhsons nióre tkanahkerahseraké꞉rons kwáh ki enhionkhehiá꞉rahke. Ronónha tánon ne sakothiʼienhokón꞉a enhonhnón꞉neke ki tánon skátke tsi ienshón꞉ne tsi tohthinonhsóhton.

¹⁰ Tsi nió꞉re ne Egypt tánon Assyria tsi kwáh tethekhehiaʼténhawe tánon ensehkhéteron ne rahothinakerahserá꞉kon. Kwáh ó꞉ni Gilead tánon Lebanon nón꞉we nenhkhetéron; kwáh owenhtsakwé꞉kon ónhkwe enhienáhne.

¹¹ Nó꞉nenh thóh nón꞉we nenhontó꞉hetsthe ne kaniatarakeʼkó꞉wa ne tekanihkónhrare, Í꞉i ne Watiá꞉ner, enkenonhwáhrehke ne iononhthakwahronhthónties, tánon tsi nihionótes ne Nile kwáh enwastátʼten. Tsi niwahthatón꞉ni ne Assyria kwáh tenkonhwenhtsó꞉ten, tánon tsi nihioshatstenhserowá꞉nen ne Egypt kwáh enhiothónse nahoshatsténhsera.

¹² Kwáh enkhéhion nahkonhkweʼtashón꞉ʼa nahathishátsteke; kwáh enhiontsén꞉nahien ó꞉ni enhionkewenhnaráhkwake.” Ne Roiá꞉ner rothatí꞉hon.